အာရက္ခတပ်တော်က ဖမ်းဆီးထိန်းသိမ်းထားပြီးစစ်ဆေးမှုတွေ ပြုလုပ်နေတဲ့ တတိယမြောက်ကုန်တင်သင်္ဘောကို အာရက္ခတပ်တော်က ပြန်လွတ်ပေးခဲ့တဲ့ အတွက် ဖေဖော်ဝါရီလ ၁ ရက်နေ့မှာ ဘင်္ဂလားဒေ့ရှ် တက်ကနပ်ဖ် (Teknaf) ဆိပ်ကမ်းကို ပြန်လည်ရောက်ရှိခဲ့တယ်လို့ ဘင်္ဂလားဒေ့ရှ်နိုင်ငံ သတင်းဌာန တစ်ခုဖြစ်တဲ့ TTN သတင်းဌာနက ဖော်ပြထားပါတယ်။
အာရက္ခတပ်တော်ဟာ ပြီးခဲ့တဲ့ ဇန်နဝါရီ ၁၆ နဲ့ ၁၇ ရက်နေ့တွေမှာ ရန်ကုန်ကနေ ဘင်္ဂလားဒေ့ရှ်နိုင်ငံတက်ကနပ်ဖ်ဆိပ်ကမ်းကို ကုန်ပစ္စည်းအပြည့် နဲ့ ထွက်လာတဲ့ ကုန်တင်သင်္ဘော ၃ စီးကို အာရက္ခရေပိုင်နက်ဖြစ်တဲ့ နတ်မြစ်အတွင်းမှာ ဖမ်းဆီးခဲ့တာလည်းဖြစ်ပါတယ်။
အဲဒီထဲက ကုန်တင်သင်္ဘော ၂ စီးကိုတော့ အာရက္ခတပ်တော်ဟာ စစ်ဆေးမှုတွေပြုလုပ်ခဲ့ပြီးနောက် ဇန်နဝါရီလ ၂၀ ရက်နေ့မှာ ပြန်လည်လွတ်ပေးခဲ့တာ ဖြစ်ပြီး ကျန်နေခဲ့တဲ့ ကုန်တင်သင်္ဘောတစ်စီးကိုတော့ ဖေဖော်ဝါရီလ ၁ ရက်နေ့မှာ ပြန်လည်လွတ်ပေးခဲ့တဲ့ အတွက် တက်ကနပ်ဖ် ဆိပ်ကမ်းကို ရောက်ရှိလာပြီးဖြစ်တယ်လို့ မန်နေဂျာ ဆိုင်းယက်မိုဟာမတ်အာနွာဟိုဆိန်း (Syed Mohammad Anwar Hossain) က ပြောဆိုထားပါတယ်။
“အရင်ကလည်း နှစ်စင်းလွှတ်ထားပြီးဖြစ်တယ်။ အဲဒီ သင်္ဘောတွေကလည်း ဒီမှာကုန်ပစ္စည်းတွေ ချပြီးတော့ ရန်ကုန်ကို ပြန်ထွက်ခွါသွားကြပြီဖြစ်တယ်။အခုကျန်နေတဲ့ သင်္ဘောကိုလည်း ၁၆ ရက်ကြာစစ်ဆေးပြီးနောက်မှာ အာရက္ခတပ်တော်က ပြန်လွတ်ပေးလိုက်တာဖြစ်တယ်။အခု အဲဒီသင်္ဘောလည်း ဆိပ်ကမ်းကို ရောက်နေပြီးဖြစ်တယ်လို့ “ ဆိုပါတယ်။
အဲဒီသင်္ဘောတွေမှာ ၃ စီးထဲမှာ မြန်မာနိုင်ငံကအတွင်းက သယ်ယူလာတဲ့ သစ်၊ ငါး၊ ကွမ်းသီးခြောက်၊ ကြက်သွန်နီ၊ ဂျင်း၊ ငါးခြောက်၊ အုန်းသီး အစရှိတဲ့ ကုန်စည်တွေကို ဘင်္ဂလားဒေ့ရှ်နိုင်ငံ အတွင်းကို တင်ပို့နေတာ ဖြစ်ပြီး ဘင်္ဂလားဒေ့ရှ် နိုင်ငံအတွင်းကနေ အာလူး၊ ပလတ်စတစ် ထွက်ကုန်၊ ဘိလပ်မြေ၊ အဝတ်အထည်၊ ဘီစကွတ်နဲ့ အချိုရည်တွေ အပါအဝင် ပစ္စည်းမျိုးစုံကို မြန်မာနိုင်ငံ အတွင်းကို ပြန်လည်တင်သွင်းနေတဲ့ သင်္ဘောတွေ ဖြစ်ကြတယ်လို့လည်း ဖော်ပြထားပါတယ်။
