ပလောင်ပြည်နယ်လွတ်မြောက်ရေးတပ်ဦး PSLF/TNLAထိန်းချုပ်ထားတဲ့ မြို့နယ်တွေကို စစ်ကောင်စီက တိုက်ပွဲဖြစ်ပွားခြင်းမရှိဘဲ လေကြောင်းကနေဗုံးကြဲတိုက်ခိုက်ခဲ့လို့ တစ်လအတွင်း ပြည်သူ ၁၃ဦး သေဆုံးခဲ့ရတယ်လို့ TNLA ကထုတ်ပြန်လာပါတယ်။
ဇန်နဝါရီလအတွင်း စစ်ကောင်စီရဲ့လေကြောင်းတိုက်ခိုက်မှုစာရင်းတွေကိုထုတ်ပြန်လာတာဖြစ်ပြီး ပြည်သူ ၁၃ဦးသေဆုံး၊ ၂၆ဦး ထိခိုက်ဒဏ်ရာရရှိခဲ့တယ်လို့ ဆိုပါတယ်။
ဇန်နဝါရီ ၈ရက်နေ့တုန်းကဆိုရင် မိုးကုတ်မြို့အရှေ့ပိုင်းကို စစ်ကောင်စီက တိုက်ပွဲဖြစ်ပွားခြင်းမရှိဘဲ လေကြောင်းကနေ ဗုံးအလုံးရေ ၂၀ခန့်နဲ့ ဗုံးကြဲတိုက်ခိုက်မှုပြုလုပ်ခဲ့တယ်လို့ ဖော်ပြထားပါတယ်။
အဲ့ဒီတိုက်ခိုက်မှုမှာ လူထိခိုက်သေဆုံးတာမရှိပေမယ့် ပြည်သူလူထုနေအိမ် ၅လုံး၊ ဘုန်းကြီးကျောင်း ၁ကျောင်းနဲ့ မော်တော်ယာဥ် ၁စီးတို့ ထိမှန်ပျက်စီးခဲ့တယ်လို့ ဆိုပါတယ်။
ဇန်နဝါရီလ ၂၁ရက်နေ့နဲ့ ၂၂ရက်နေ့တွေမှာလည်း နောင်ချိုမြို့နယ်ကို ဂျက်ဖိုက်တာလေယာဉ်နဲ့ ဗုံးကြဲတိုက်ခိုက်မှုတွေပြုလုပ်ခဲ့လို့ အမျိုးသား ၅ဦးနဲ့ အမျိုးသမီး ၄ဦး သေဆုံးခဲ့ရပြီး အမျိုးသမီး ၃ဦးထိခိုက်ဒဏ်ရာရရှိခဲ့တယ်လို့ အသိပေးထားပါတယ်။ဒါ့အပြင် နေအိမ် ၉လုံးနဲ့ ဘုန်ကြီးကျောင်း ၁ကျောင်းတို့ ထိမှန်ပျက်စီးခဲ့ရတယ်လို့ ဆိုပါတယ်။
အလားတူ ဇန်နဝါရီလ ၂၅ရက်နေ့မှာလည်း ကျောက်မဲမြို့နယ်အတွင်းကို စစ်ကောင်စီက ဂျက်ဖိုက်တာလေယာဉ်အသုံးပြုပြီး ဗုံးကြဲတိုက်ခိုက်ခဲ့လို့ အမျိုးသား ၂ဦးနဲ့ အမျိုးသမီး ၂ဦးသေဆုံးခဲ့တယ်လို့ ဖော်ပြထားပါတယ်။
ထိခိုက်ပျက်စီးမှုအနေနဲ့ အမျိုးသား ၅ဦး၊ အမျိုးသမီး ၁၈ဦး ထိခိုက်ဒဏ်ရာရရှိခဲ့ပြီး နေအိမ် ၁၂လုံး ထိမှန်ပျက်စီးခဲ့ရတယ်လို့ ဆိုပါတယ်။
အဆိုပါတိုက်ခိုက်မှုတွေအပေါ် TNLAက စစ်ကောင်စီတပ်ဟာ တအာင်းပြည်အတွင်းမှာ တိုက်ပွဲဖြစ်ပွားတာမရှိဘဲ ပြည်သူလူထုကို ဦးတည်ပြီး ရည်ရွယ်ချက်ရှိရှိ လေကြောင်းနဲ့ ဗုံးကြဲတိုက်ခိုက်နေတာဖြစ်တယ်လို့ ထုတ်ပြန်ထားပါတယ်။
