ရခိုင်ပြည်ရဲ့ မြို့တော် ဖြစ်တဲ့ စစ်တွေ မြို့ကို အာရက္ခတပ်တော်က မနေ့က ညနေ ၁၁ နာရီဝန်းကျင်လောက်ကတည်းကပင် ဒီနေ့မနက်ပိုင်းထိ လက်နက်ကြီးတွေ နဲ့ စတင်ပစ်ခတ်ကာ ထိုးစစ်ဆင်တိုက်နေပြီးဖြစ်တယ်လို့ စစ်တွေ ဒေသခံတွေက ပြောပါတယ်။
အာရက္ခတပ်တော်ဟာ ရခိုင်က မြို့နယ် ၁၇ မြို့နယ်ထဲက ၁၄ မြို့နယ်ကို အပြီးသတ်သိမ်းပိုက်ပြီးနောက်မှာ စစ်ရေးကို နိုင်ငံရေးနည်းလမ်း နဲ့ ဖြေရှင်းကြဖို့အတွက် စစ်ကောင်စီကို ဖိတ်ခေါ်ခဲ့ပေမယ် နိုင်ငံရေး ဆွေးနွေးပွဲ လုပ်ဖို့အတွက် စစ်ကောင်စီက တစ်စုံတရာ လုပ်ဆောင်လာခဲ့တာ မရှိတဲ့နောက်မှာ အာရက္ခတပ်တော်ဟာ အပြီးသတ်သိမ်းပိုက်ဖို့ကျန်ရှိနေသေးတဲ့ မြို့နယ် ၃ မြို့နယ်ထဲက စစ်တွေမြို့ကို စတင်ထိုးစစ်ဆင် တိုက်ခိုက် လာနေတာလည်း ဖြစ်ပါတယ်။
အာရက္ခတပ်တော်ဟာ စစ်တွေ မြို့ မှာ ရှိတဲ့ ကျောက်တန်းကြီး၊ကျောက်တန်းချေ၊တေကန်၊ပါဒလိတ် ၊ အမြင့်ကျွန်း၊ ရွှေမင်းဂံ စတဲ့ နေရာတွေက စစ်ကောင်စီရဲ့တပ်စခန်းတွေကို လက်နက်ကြီးတွေ နဲ့ ပစ်ခတ်ကာ စတင်ထိုးစစ်ဆင်တိုက်ခိုက်နေသလို စစ်တွေ မြို့အနီးဝန်းကျင်မှာ ချထားတဲ့ ကင်းစခန်းငယ်တွေကိုပါ အာရက္ခတပ်တော်က တပြိုင်နက်တည်း ထိုးစစ်ဆင်တိုက်ခိုက်နေပြီး ဖြစ်တယ်လို့ ခိုင်လုံတဲ့ စစ်ရေး သတင်းအရင်း အမြစ်က CNA ကိုပြောပါတယ်။
” မနေ့ညနေကတည်းကပင် တပ်တော်က လက်နက်ကြီး လက်နက်ငယ်တွေ အပြင်းအထန်ပစ်ခတ်တိုက်ခိုက်ပြီးတော့ စပြီးတော့ ထိုးစစ်ဆင်တိုက်ခိုက်နေတာတွေလုပ်နေပြီ ။ စဖြစ်တာကတော့ မနေ့က ညနေ ၁၁ နာရီလောက်ကပင် မနက် ၅ နာရီကျော်လောက်အထိပစ်ခတ်မှုတွေ ရှိခဲ့တယ်။ကျနော်သိရသလောက် အခုတိုက်ခိုက်တာက အရင်တုန်းကနဲ့ မတူဘူး စခန်းတွေ အကုန်လုံးကို တိုက်ခိုက်တာ ပြီးတော့ လက်နက် ကြီးတွေ နဲ့ စပြီးတော့ တိုက်ခိုက်တာဖြစ်တယ်။ ဒီတစ်ကြိမ်တော့ မြို့သိမ်းတိုက်ပွဲ ဖြစ်တော့မယ်လို့ခန်းမှန်းရတယ်လို့”သူကဆိုပါတယ်။
စစ်တွေမြို့ကို ထိုးစစ်ဆင်တိုက်ခိုက်မှု အခြေအနေ နဲ့ ပတ်သက်ပြီး အာရက္ခတပ်တော် အေအေ ဖက်ကတော့ တစ်စုံတစ်ရာ ထုတ်ပြန်ပြောဆို လာတာတော့ မရှိသေးပါဘူး။
အာရက္ခတပ်တော် ဟာ ပလက်ဝဒေသအပါအဝင် ရခိုင်ပြည်အတွင်းမှာ ရှိတဲ့ မြို့နယ် ၁၇ မြို့နယ်ထဲက ၁၄ မြို့နယ်ကို အပြီးသတ်သိမ်းပိုက်ထားနိုင်ပြီးဖြစ်သလို အဲဒီသိမ်းပိုက်ထားတဲ့ မြို့တွေမှာလည်း ပြန်လည်ထူထောင်ရေး လုပ်ငန်းတွေ နဲ့ တရားဉပဒေစိုးမိုးရေး အပိုင်းတွေကို စတင်လုပ်ဆောင်နေပြီလည်းဖြစ်ပါတယ်။
