မကွေးတိုင်းတိုင်း၊ ဆိပ်ဖြူမြို့နယ်အတွင်းက စစ်ကောင်စီရဲ့ က.ပ.စ(၂၁)ကနေ ထွက်လာတဲ့ ယာဉ်တန်းကို ကြားဖြတ်တိုက်ခိုက်ခဲ့တယ်လို့ Yenanthar Columnက ထုတ်ပြန်လာပါတယ်။
ဖေဖော်ဝါရီလ ၇ရက် မနက်ပိုင်းမှာ က.ပ.စ(၂၁)ကနေ ပစ္စည်းတွေသယ်ဆောင်ပြီး ထွက်လာတဲ့ စစ်ကောင်စီယာဉ်တန်းကို ဆိပ်ဖြူ-ကန်ဇွန်းမ ကားလမ်းတစ်နေရာမှာ ကြားဖြတ်တိုက်ခိုက်ခဲ့တာလို့ ဆိုပါတယ်။
အဲ့ဒီတိုက်ခိုက်မှုအတွင်း စစ်ကောင်စီဘက်က ကား ၂ စီး မီးလောင်ပေါက်ကွဲသွားခဲ့ပြီး၊ စစ်ကောင်စီအဖွဲ့ဝင် ၁၁ဦးသေဆုံးကာ အများအပြားထိခိုက်ဒဏ်ရာရရှိခဲ့တယ်လို့ ထုတ်ပြန်ထားပါတယ်။
တော်လှန်ရေးတပ်တွေဘက်က ထိခိုက်မှုရှိခဲ့လားဆိုတာကိုတော့ ထုတ်ပြန်ချက်မှာဖော်ပြထားတာ မတွေ့ရပါဘူး။
အဆိုပါတိုက်ခိုက်မှုကို မကွေးတိုင်း ပကဖရဲ့ရွေ့လျားစစ်ကြောင်းYenanthar Columnနဲ့ အတူ မကွေးတိုင်း ပကဖရဲ့ အထူးကွန်မန်ဒိုတပ်ဖွဲ့၊ မင်းဘူးခရိုင် အမှတ်(၁)တပ်ရင်း၊ပခုက္ကူခရိုင် တပ်ရင်း (၁၉)နဲ့ ဆိပ်ဖြူမြို့နယ် အနောက်ပိုင်းဇုန်(၁) ပ.က.ဖအဖွဲ့တို့က ပူးပေါင်းတိုက်ခိုက်ခဲ့တာလို့ သိရပါတယ်။
Yenanthar Columnနဲ့ ပူးပေါင်းအဖွဲ့တွေဟာ ဖေဖော်ဝါရီလ အစပိုင်းမှာဘဲ ပွင့်ဖြူမြို့နယ်ဘက်ကို စစ်ကြောင်းထိုးနေတဲ့ စစ်ကောင်စီစစ်ကြောင်းနဲ့ ထိတွေ့တိုက်ပွဲဖြစ်ပွားခဲ့ပါသေးတယ်။
