CNA ၊ မြတ်သူ။
ဂွမြို့နယ် ကျိန္တလီမြို့ကို စစ်ကောင်စီက ဒီနေ့ နေ့လယ် ၁ နာရီကျော်လောက်မှာ လေကြောင်းကနေတဆင့် ထပ်မံ ဗုံးကြဲတိုက်ခိုက်ခဲ့တာကြောင့် အရပ်သား ၁ ဦးသေဆုံးပြီး ၆ ဦးဒဏ်ရာ ရရှိခဲ့ရတယ်လို့ ဒေသခံ လူမှုကူညီရေး အဖွဲ့အစည်းတွေက ပြောပါတယ်။
စစ်ရှုံးစစ်ကောင်စီဟာ ဒီနေ့ နေ့လယ် ၁ နာရီကျော်လောက်မှာ ကျိန္တလီမြို့နယ်အတွင်းက ဗိုလ်တဲ (ခေါ်) အစိုးရတည်းခိုရိပ်သာ ဆိုတဲ့ နေရာကို လေကြောင်းကနေတဆင့် ဗုံးကြဲတိုက်ခိုက်ခဲ့တာကြောင့် အခုလို အရပ်သားတစ်ဦး သေဆုံးပြီး ၆ ဦးဒဏ်ရာ ရရှိခဲ့ရတာဖြစ်တယ်လို့ ဆိုပါတယ်။
“ကျနော်တို့ အခုသိရသလောက်ကတော့ ၁ ဦးသေတယ် ၆ ဦး ဒဏ်ရာရတယ် အဆောက်အဦးတချို့ ပျက်စီးသွားတယ်။ဒဏ်ရာရတဲ့ သူတွေကိုတော့ လုံခြုံတဲ့နေရာမှာဆေးကုသပေးနေတယ်။ နောက်ထပ်အချက်အလက်တွေကိုတော့ ကျနော်တို့လည်း ကောက်နေတုန်းဖြစ်တယ်”လို့သူကပြောပါတယ်။
စစ်ရှုံးစစ်ကောင်စီဟာ ပြီးခဲ့တဲ့ဖေဖော်ဝါရီလ ၄ ရက်နေ့ကလည်း ကျိန္တလီမြို့နယ်အတွင်းမှာရှိတဲ့ ကန့်ကော်တောင်ကျေးရွာကို လေကြောင်းကနေတဆင့် ဗုံးကြဲတိုက်ခိုက်ခဲ့တာကြောင့် နေအိမ် ၇ လုံးအပါအဝင် ကျေးရွာအတွင်းမှာ ရှိတဲ့ ဘုန်းတော်ကြီးကျောင်းဟာလည်း ပျက်စီးမှု ရှိခဲ့ရပါတယ်။
ဒီလို ကျိန္တလီမြို့ကိုစစ်ကောင်စီက ဆက်တိုက် ဗုံးကြဲတိုက်ခိုက်မှု လုပ်ဆောင်ခဲ့တဲ့ အပေါ် ကျိန္တလီမြို့အတွင်းက ပြည်သူတွေကို လူမှုကူညီရေးပေးနေသူတစ်ဦးသုံးသပ်ပြောဆိုတာက “ကျနော့်အထင်ပြောရရင် ဒီရက်ပိုင်း ကျိန္တလီမှာ ဖုန်းလိုင်းရနေတာရှိတယ် အထဲမှာ ဒလန်ရှိတော့ ဖုန်းလိုင်း ရတာ နဲ့ ဗုံးကြဲတိုက်ခိုက်မယ့်နေရာတွေကို သတင်းပေးနေတာဖြစ်တယ်။ အဲဒါကြောင့် စစ်ကောင်စီက အခုလို ဗုံးဆက်တိုက် ကြဲလာတာ ဖြစ်တယ်”လို့ သူက သုံးသပ်ပြောဆိုပါတယ်။
အခုလို အေးချမ်းစွာနေထိုင်နေတဲ့ ပြည်သူတွေကို သေဆုံးဒဏ်ရာ ရအောင် သတင်းပေးနေတဲ့ စစ်ကောင်စီသတင်းပေးတွေကို အာရက္ခတပ်တော် အနေနဲ့ စုံစမ်းဖော်ထုတ်မှုတွေ ပြုလုပ်ပြီး ကြီးလေးတဲ့ အပြစ်ဒဏ်ပေးစေချင်တယ်လို့လည်း သူကတောင်းဆိုပါတယ်။
အာရက္ခတပ်တော် အေအေဟာ ဂွမြို့ နဲ့ ကျိန္တလီမြို့တစ်ခုလုံကို ပြီးခဲ့တဲ့ ၂၀၂၄ ခုနှစ် ဒီဇင်ဘာလ အတွင်းမှာ အပြီးသတ်သိမ်းပိုက်ရရှိထားပြီးဖြစ်တဲ့ မြို့တစ်ခုလည်းဖြစ်ပါတယ်။
ဒါပေမယ့်စစ်ကောင်စီဟာ ဂွမြို့ နဲ့ ကျိန္တလီမြို့တွေမှာ ဒေသခံ ပြည်သူတွေ နေထိုင်လို့ မရအောင် လေကြောင်းတိုက်ခိုက်တာကို မကြာခဏဆိုသလို လုပ်ဆောင်နေတာကြောင့် ပြည်သူတွေ ထိခိုက်သေဆုံးတာ နဲ့ နေအိမ်အပါအဝင် သာသနိကအဆောက်အဦးတွေ ပျက်စီးတာတွေလည်း များစွာရှိလာနေပါတယ်။
