CNA ၊ ဂူးဂူး။
ကျောက်ဖြူမြို့နယ်အတွင်းမှာ ဆိုင်ကယ် နဲ့ လာတဲ့ ပြည်သူ ၂ ဦးကို စစ်ကောင်စီတပ်တွေက သေနတ်နဲ့ ပစ်ခတ်ခဲ့တဲ့ အတွက် ဆိုင်ကယ် နဲ့ လာသူ ၂ ဦးထဲက ၁ ဦးသေဆုံးခဲ့ရပြီး ၁ ဦးအပြင်းအထန် ဒဏ်ရာ ရရှိခဲ့ ရတယ်လို့ ဒေသခံတွေဆီက သိရပါတယ်။
စစ်ကောင်စီပစ်ခတ်လို့ သေဆုံး ဒဏ်ရာ ရရှိသွားသူ ၂ ဦးကတော့ စိုင်းခြုံကျေးရွာက ဦးသန်းအောင် နဲ့ ဦးသန်းမြင့်တို့ဖြစ်ပြီး ဦးသန်းအောင်ကတော့ စစ်ကောင်စီတပ်သားတွေ ရဲ့ ပစ်ခတ်မှုကြောင့် ပွဲချင်းပြီးသေဆုံးခဲ့ရပြီး ဦးသန်းမြင့်က တော့ ဒဏ်ရာအပြင်းအထန် ရရှိသွားခဲ့ရတယ်လို့ ဒီအခြေအနေကို သိရှိသူ ကျောက်ဖြူမြို့ ခံတစ်ဦးကပြောပါတယ်။
“သူတို့က စိုင်းခြုံကျေးရွာသားတွေ အရောင်းအဝယ် ကိစ္စတစ်ခု နဲ့ စိုင်းခြုံကနေ ရှောက်ချောင်းရွာဖက်ကို သွားတဲ့ နေရာမှ ပစ်ခတ်ခံခဲ့ရတာလို့ သိရတယ် ဦးသန်းအောင်ကတော့ မောင်းတဲ့ သူဖြစ်တော့ သေနတ်မှန်ပြီး ပွဲချင်းပြီးသေသွားတယ်။ ဦးသန်းမြင့်ကတော့ သေနတ်ထိမှန်တာ နဲ့ ဆိုင်ကယ်မှောက်တာ နှစ်ခုပေါင်းပြီးတော့ ဒဏ်ရာရတယ်။အခုဒဏ်ရာရတဲ့ သူကိုလည်း ပြန်လွတ်မပေးဘူး သူတို့ဖမ်းဆီးခေါ်ဆောင်သွားတယ်လို့ သိရတယ်”လို့ သူကပြောပါတယ်။
သူတို့ နှစ်ဦးဟာ ပြီးခဲ့တဲ့ ဖေဖော်ဝါရီလ ၉ ရက်နေ့ မနက်ပိုင်းမှာ ပစ်ခတ်ခံခဲ့ရတာလည်းဖြစ်ပါတယ်။
ကျောက်ဖြူမြို့နယ်အတွင်းမှာ စစ်ကောင်စီတပ်တွေ နဲ့ အာရက္ခတပ်တော် တို့ဟာ နှစ်ဖက်တိုက်ပွဲ ဖြစ်ပွါးတာမရှိပေမယ့် စစ်ကောင်စီတပ်တွေက မြို့ပတ်လည်မှာ မိုင်းထောင်တာ၊ကင်းပုန်းဝပ်တာ နဲ့ ညဖက်တွေမှာ ကျေးရွာတချို့ကို စစ်ကြောင်းထိုးဝင်ရောက်တာတွေ ရှိသလို ပြည်သူတွေကို သွားလာခွင့်ကန့်သတ်တာတွေကို ဆက်တိုက်လုပ်ဆောင်ခံထားရတာတွေလည်း ရှိနေတယ်လို့ဆိုပါတယ်။
“ကျောက်ဖြူအခြေအနေကတော့ စစ်ကောင်စီတပ်တွေက မိုင်းထောင်တာ၊ကင်းပုန်းဝပ်တာတွေဆက်တိုက်ရှိနေတယ်။ပြီးတော့ ညဖက်တွေမှာ စစ်ကြောင်းထိုးဝင်ရောက်ပြီးတော့ ပြည်သူတွေကို စစ်ဆေးဖမ်းဆီးတာတွေလည်း ရှိနေတယ်။တိုက်ပွဲ မဖြစ်ပေမယ့် စစ်ကောင်စီက အစစ အရာရာကို ပိတ်ပင်ကန့်သတ်ထားတာတွေ ရှိနေတဲ့ သဘောမှာ ရှိနေတယ်”လို့ သူကဆိုပါတယ်။
ကျောက်ဖြူမြို့အတွင်းမှာ စစ်ကောင်စီတပ်တွေဟာ ပြီးခဲ့တဲ့ ၂၀၂၄ ခုနှစ်ကတည်းကပင် လုံခြုံရေးအကြောင်းပြကာ အခုလို ပြည်သူတွေကို ပစ်ခတ်တာ၊အရပ်သားတွေကို ဖမ်းဆီးတာတွေ ဆက်တိုက်ရှိလာနေတဲ့ အတွက် ပြည်သူအများစုဟာ မိမိတို့နေအိမ်အတွင်းမှာ မနေရဲတော့ဘူး ဘေးလွတ်ရာနေရာတွေကို စစ်ရှောင်အဖြစ်နဲ့ ထွက်ပြေးတိမ်းရှောင်နေရတာတွေ ရှိနေပါတယ်။
အဲဒီလို ထွက်ပြေးတိမ်းရှောင်နေကြရတဲ့ ဒေသခံပြည်သူတွေ ရဲ့ နေအိမ်တွေက ပစ္စည်းတွေကို စစ်ကောင်စီတပ်တွေက ဖောက်ထွင်းခိုးယူရောင်းစားတာတွေလည်း ဆက်တိုက်ရှိနေတယ်လို့လည်းကျောက်ဖြူ ဒေသခံတွေက ပြောဆိုကြပါတယ်။
