CNA ၊ လင်းလင်း။
စစ်တွေမြို့အတွင်းမှာ ရှိတဲ့ စစ်ကောင်စီ ရဲ့ စစ်စခန်း ၅ ခုထက်မနည်းကို အာရက္ခတပ်တော် က တပြိုင်းတည်း စစ်မျက်နှာစာဖွင့်တိုက်ခိုက်တာတွေကို လုပ်ဆောင်နေတယ်လို့ အာရက္ခတပ်တော်ရဲ့ စစ်ရေးသတင်း နဲ့ နီးစပ်သူ တစ်ဦးကပြောပါတယ်။
လက်ရှိအာရက္ခတပ်တော်က တိုက်ခိုက်နေတဲ့ စစ်ကောင်စီတပ်စခန်းတွေကတော့ ကုလားတန်မြစ်ဝ၊ပါဒလိတ်၊ရွှေမင်းဂံ၊အမြင့်ကျွန်း နဲ့ ရေချမ်းပြင်က တပ်စခန်းတွေကို အာရက္ခတပ်တော်က လက်နက်ကြီး လက်နက်ငယ်တွေ နဲ့ ပစ်ခတ်ကာတိုက်ခိုက်နေတာလည်း ဖြစ်ပါတယ်။
စစ်တွေမြို့ကို အာရက္ခတပ်တော်က ထိုးစစ်ဆင်တိုက်ခိုက်နေမှုအခြေအနေ နဲ့ ပတ်သက်ပြီး အာရက္ခတပ်တော်ရဲ့ စစ်ရေးသတင်းနဲ့ နီးစပ်သူတစ်ဦးပြောပြတာက “ပြီးခဲ့တဲ့ ဖေဖော်ဝါရီလ ၇ ရက်နေ့ ညကပင် တပ်တော်က လက်နက်ကြီးတွေ နဲ့ ပစ်ခတ်တိုက်ခိုက်ခဲ့တာပေါ့။အဲဒီကတည်းကပင် တိုက်ပွဲက နေ့တိုင်းလိုလို အချိန်ပိုင်းအလိုက်ဖြစ်နေတာရှိတယ်။အခု တိုက်နေတဲ့ နေရာတွေက စစ်ကောင်စီရဲ့ ခုခံစစ်အတွက် စခန်းငယ်တွေ ဖြစ်တယ်။ဒီစခန်းတွေမှာက မွတ်ဆလင်(ဘင်္ဂလီ)စစ်သားတွေ များတယ်။အခုမြေပြင်က ထိုးဖောက်ဝင်ရောက်တိုက်ခိုက်တာတွေလည်း ရှိလာနေပြီ”လို့သူကပြောပါတယ်။
အာရက္ခတပ်တော်ဟာ ရခိုင်က မြို့နယ် ၁၇ မြို့နယ်ထဲက ၁၄ မြို့နယ်ကို အပြီးသတ်သိမ်းပိုက်ပြီးနောက်မှာ စစ်ရေးကို နိုင်ငံရေးနည်းလမ်း နဲ့ ဖြေရှင်းဖို့ စစ်ကောင်စီကိုဖိတ်ခေါ်ခဲ့ပေမယ့် စစ်ကောင်စီဘက်က ဆွေးနွေးဖို့ သဘောထားတစ်စုံတရာ တုန့်ပြန်ပြောဆိုလာခြင်းမရှိတဲ့နောက်မှာ စစ်တွေမြို့ကို အာရက္ခတပ်တော်က ထိုးစစ်ဆင်တိုက်ခိုက်လာခဲ့တာလည်းဖြစ်ပါတယ်။
လက်ရှိ အာရက္ခတပ်တော် ထိုးစစ်ဆင်တိုက်ခိုက်နေတဲ့ စစ်ကောင်စီတပ်စခန်း ၅ ခုထဲက ပါဒလိတ်ရှေ့တန်းစခန်းမှာစစ်ကောင်စီက ရက်တိုစစ်သင်တန်းပေးထားတဲ့ မွတ်ဆလင်(ဘင်္ဂလီ) စစ်သားအများအပြားကို အာရက္ခတပ်တော် နဲ့ တိုက်ခိုက်ဖို့အတွက် စစ်ကူးပို့ပေးနေတာတွေ ရှိပြီး အဲဒီစစ်ကူပို့ပေးနေတဲ့ မွတ်ဆလင်(ဘင်္ဂလီ)စစ်သားအများအပြားဟာလည်း သေဆုံးမှု ရှိနေရတယ်လို့ အာရက္ခတပ်တော်ရဲ့ စစ်ရေးသတင်းနဲ့ နီးစပ်သူက ဆက်လက်ပြောဆိုပါတယ်။
“အခုအပြင်စည်းမှာက စစ်ကောင်စီက သူတို့တပ်သားတွေကို မသုံးသေးဘဲ စစ်သင်တန်းပေးထားတဲ့ မွတ်ဆလင်(ဘင်္ဂလီ)စစ်သားတွေကို အသုံးချပြီးတိုက်ခိုက် နေတယ်။အဲဒီ ပါဒလိတ်ရှေ့တန်းစခန်းမှာတောင် တော်တော် သေတယ်လို့သိထားရတယ်။အရေအတွက် ဘယ်လောက်ထိသေတယ်ဆိုတာကိုတော့ ကျနော်လည်း မသိရဘူး။သေတာကတော့ တော်တော်သေတယ်ပြောတယ်။စစ်ကူတွေကလည်း ဆက်တိုက်ပို့ပေးနေတယ် စစ်ကောင်စီဘက်က”လို့ သူကဆိုပါတယ်။
စစ်ကောင်စီဟာ ရခိုင်တကျော့ပြန်တိုက်ပွဲစတင်ချိန်ကတည်းကပင် စစ်တွေမြို့ကို အာရက္ခတပ်တော်က တိုက်ခိုက်လာရင် ခုခံကာကွယ်နိုင်ဖို့ အတွက် ခံစစ်စခန်းအသစ်တွေ တည်ဆောက်တာတွေ အပြင် မြို့တစ်ခုလုံးကိုလည်း ခြံစည်းရိုးခတ် ကာရံထားတဲ့ အထိကို ခုခံစစ်အတွက် ပြင်ဆင်ထားတာလည်း ဖြစ်ပါတယ်။
ဒါ့အပြင် တစ်ဖက်မှာလည်း စစ်ကောင်စီဟာ စစ်တွေမြို့နယ်အတွင်းက ဒေသကွပ်ကွဲမှု စစ်ဌာနချုပ် ဒကစ ၊ ခလရ ၂၇၀၊ ခမရ ၃၄၄၊ ခမရ ၃၅၄ ၊ခလရ ၂၀၊ ခလရ ၂၃၂၊ အပါအဝင် အမြောက်တပ်၊ တပ်ရင်း၊ ရဲတပ်ရင်း ၁၀ ခုနီးပါးမှာလည်း စစ်သည်အင်အားလက်နက်အင်အား အပြည့် နဲ့ အာရက္ခတပ်တော် ရဲ့ ထိုးစစ်ကို ခုခံဖို့အတွက် အခိုင်အမာ ပြင်ဆင်ထားတယ်လို့လည်း သိရပါတယ်။
