CNA ၊ ဂူးဂူး။
စစ်ကောင်စီဟာ ဒီလထဲမှာ ဂွမြို့နယ်အတွင်းက ကျိန္တလီမြို့ကို လေကြောင်းတိုက်ခိုက်တာ ဆက်တိုက်ဆိုသလို လုပ်ဆောင်လာနေတာတွေ ရှိနေတယ်လို့ စစ်ဘေးရှောင် အရေးကူညီဆောင်ရွက်နေသူတွေက ပြောပါတယ်။
စစ်ကောင်စီတပ်တွေဟာ ပြီးခဲ့တဲ့ ဖေဖော်ဝါရီလ ၁၂ ရက်နေ့ညနေ ၄ နာရီလောက်ကလည်း ကျိန္တလီမြို့က အမှတ် ၂ ရပ်ကွက်ကို လေကြောင်းက ဗုံးကြဲတိုက်ခိုက်ခဲ့တာကြောင့် လူးနေအိမ် ၂ ဆောင်ပျက်စီးခဲ့ရသလို ဒေသခံတစ်ဦးမှာလည်း ဗုံးစထိမှန်ဒဏ်ရာရရှိတာရှိခဲ့ရတယ်လို့ စစ်ဘေးရှောင်အရေးကူညီဆောင်ရွက်နေသူတွေကပြောပါတယ်။
အဲဒီဒဏ်ရာရရှိသွားတဲ့ သူမှာ အမှတ် ၂ ရပ်ကွက်က အသက် ၄၁ နှစ်အရွယ် ဦးချက်ကြီးဆိုသူဖြစ်တယ်လို့လည်း ဆိုပါတယ်။
စစ်ကောင်စီဟာ ပြီးခဲ့တဲ့ ဖေဖော်ဝါရီလ ၈ ရက်နေ့ကလည်း ကျိန္တလီမြို့နယ်အတွင်းက ဗိုလ်တဲ (ခေါ်) အစိုးရတည်းခိုရိပ်သာ ဆိုတဲ့ နေရာကို လေကြောင်းကနေတဆင့် ဗုံးကြဲတိုက်ခိုက်ခဲ့တာကြောင့် အခုလို အရပ်သားတစ်ဦး သေဆုံးပြီး ၆ ဦးဒဏ်ရာ ရရှိခဲ့ရပါတယ်။
အဲဒီလိုပဲ ဖေဖော်ဝါရီလ ၄ ရက်နေ့ကလည်း ကျိန္တလီမြို့နယ်အတွင်းမှာရှိတဲ့ ကန့်ကော်တောင်ကျေးရွာကို လေကြောင်းကနေတဆင့် ဗုံးကြဲတိုက်ခိုက်ခဲ့တာကြောင့် နေအိမ် ၇ လုံးအပါအဝင် ကျေးရွာအတွင်းမှာ ရှိတဲ့ ဘုန်းတော်ကြီးကျောင်းဟာလည်း ပျက်စီးမှု ရှိခဲ့ရပါတယ်။
ဒီလို စစ်ကောင်စီက လေကြောင်းတိုက်ခိုက်မှု ဆက်တိုက်လုပ်ဆောင်နေတာကြောင့် ပြည်သူတွေ အနေ နဲ့ အကြောက်တရားတွေ နဲ့ ရင်ဆိုင်ကာနေထိုင်လာနေကြရတယ်လို့လည်း စစ်ဘေးရှောင်အရေး ကူညီဆောင်ရွက်နေသူ တစ်ဦးဆိုပါတယ်။
“လေယာဉ်ကဗုံးကြဲတာက ခပ်စိတ်စိတ်ဖြစ်လာတယ် ဒီလထဲမှာ လူတွေလည်း လေယာဉ်သံကြားရင် စားမဝင်အိပ်မပျော်တဲ့အနေအထားမှာ ရှိနေကြပြီ။ကျနော်တို့ အဓိကထင်တာကတော့ ဒေသအတွင်းမှာ သတင်းပေးတွေ ရှိနေလို့ အခုလို လေကြောင်းတိုက်ခိုက်တာ လုပ်လာနိုင်တာလို့တော့ထင်တယ်။ဒါပေမယ့် ဖုန်းနဲ့ပဲ သတင်းပို့လုပ်နေတာဆိုတော့ ကျနော်တို့ အနေ နဲ့ သိဖို့က ခက်တာပေါ့”လို့သူကပြောပါတယ်။
အာရက္ခတပ်တော် အေအေဟာ ဂွမြို့ နဲ့ ကျိန္တလီမြို့တစ်ခုလုံကို ပြီးခဲ့တဲ့ ၂၀၂၄ ခုနှစ် ဒီဇင်ဘာလ အတွင်းမှာ အပြီးသတ်သိမ်းပိုက်ရရှိထားပြီးဖြစ်တဲ့ မြို့တစ်ခုလည်းဖြစ်ပါတယ်။
ဒါပေမယ့်စစ်ကောင်စီဟာ ဂွမြို့ နဲ့ ကျိန္တလီမြို့တွေမှာ ဒေသခံ ပြည်သူတွေ နေထိုင်လို့ မရအောင် လေကြောင်းတိုက်ခိုက်တာကို မကြာခဏဆိုသလို လုပ်ဆောင်နေတာကြောင့် ပြည်သူတွေ ထိခိုက်သေဆုံးတာ နဲ့ နေအိမ်အပါအဝင် သာသနိကအဆောက်အဦးတွေ ပျက်စီးတာတွေလည်း များစွာရှိလာနေပါတယ်။
