CNA ၊ မြတ်သူ။
နေ့စဉ်ရက်ဆက် ဗုံးကြဲတိုက်ခိုက်ခံနေရတဲ့ ဂွမြို့အတွင်းက ကျိန္တလီမြို့ကို စစ်ကောင်စီက ဒီနေ့ နေ့လယ်မှာလည်း လေကြောင်းကနေတဆင့် ဗုံးထပ်မံလာရောက် ကြဲချတိုက်ခိုက်ခဲ့တာကြောင့် အမျိုးသမီး ၁ ဦး နဲ့ ကလေးငယ် ၁ ဦးထပ်မံသေဆုံးခဲ့ရတယ်လို့ ဒေသအတွင်းက စစ်ဘေးရှောင်ကူညီရေး အဖွဲ့တွေ ဆီက သိရပါတယ်။
စစ်ကောင်စီ ကြဲချလိုက်တဲ့ ဗုံးဟာ ကျိန္တလီမြို့ အမှတ် (၃) ရပ်ကွက် အတွင်းကို ကျရောက်ပေါက်ကွဲကာ အခုလို ကလေးငယ် ၁ ဦး နဲ့ အမျိုးသမီး ၁ ဦးသေဆုံးခဲ့ရတာ ဖြစ်တယ်လို့ ဒေသအတွင်းက စစ်ဘေးရှောင်အရေးကူညီပေးနေသူတစ်ဦးကပြောပါတယ်။
“ဟုတ်တယ်အကိုရယ် ဒီနေ့လည်း လေကြောင်းက ဗုံးကြဲတိုက်ခိုက်လို့ ၂ ဦးသေသွားတယ်။အခုတလောက ရက်ဆက်ဆိုသလို လေကြောင်းတိုက်ခိုက်တာကိုက ခံနေရတယ်။နာမည်တွေကတော့ မရသေးဘူးအကို ကလေး ၁ ဦး နဲ့ အမျိူသမီးတစ်ဦးသေတယ်ဆိုတာပဲ သိရသေးတယ်”လို့သူကပြောပါတယ်။
စစ်ကောင်စီတပ်တွေဟာ ပြီးခဲ့တဲ့ ဖေဖော်ဝါရီလ ၁၂ ရက်နေ့ညနေ ၄ နာရီလောက်ကလည်း ကျိန္တလီမြို့က အမှတ် ၂ ရပ်ကွက်ကို လေကြောင်းက ဗုံးကြဲတိုက်ခိုက်ခဲ့တာကြောင့် လူးနေအိမ် ၂ ဆောင်ပျက်စီးခဲ့ရသလို ဒေသခံတစ်ဦးမှာလည်း ဗုံးစထိမှန်ဒဏ်ရာရရှိတာရှိခဲ့တာလည်း ရှိခဲ့ပါတယ်။
ဒါ့အပြင် ဖေဖော်ဝါရီလ ၈ ရက်နေ့ကလည်း ကျိန္တလီမြို့နယ်အတွင်းက ဗိုလ်တဲ (ခေါ်) အစိုးရတည်းခိုရိပ်သာ ဆိုတဲ့ နေရာကို လေကြောင်းကနေတဆင့် ဗုံးကြဲတိုက်ခိုက်ခဲ့တာကြောင့် အခုလို အရပ်သားတစ်ဦး သေဆုံးပြီး ၆ ဦးဒဏ်ရာရရှိခဲ့သလို ဖေဖော်ဝါရီလ ၄ ရက်နေ့ကလည်း ကျိန္တလီမြို့နယ်အတွင်းမှာရှိတဲ့ ကန့်ကော်တောင်ကျေးရွာကို လေကြောင်းကနေတဆင့် ဗုံးကြဲတိုက်ခိုက်ခဲ့တာကြောင့် နေအိမ် ၇ လုံးအပါအဝင် ကျေးရွာအတွင်းမှာ ရှိတဲ့ ဘုန်းတော်ကြီးကျောင်းဟာလည်း ပျက်စီးမှု ရှိခဲ့ရပါတယ်။
စစ်ခေါင်းဆောင် မင်းအောင်လှိုင်ဟာ တစ်ဖက်မှာ ဘုရားတည်ကျောင်းဆောက်တာတွေ နဲ့ စစ်ရေးကို နိုင်ငံရေးနည်းလမ်းနဲ့ ဖြေရှင်းနိုင်ဖို့ ငြိမ်းချမ်းရေးတံခါးကို အမြဲဖွင့်ထားတယ်လို့ ပြောဆိုနေပေမယ့် တိုင်းရင်းသားလက်နက်ကိုင်တွေ ထိန်းချုပ်ထားတဲ့ နေရာတွေကို လေကြောင်းကနေတဆင့် ဗုံးကြဲတိုက်ခိုက်ကာ အပြစ်မဲ့ အရပ်သား ပြည်သူတွေကို နေ့စဉ် နဲ့ အမျှ သတ်ဖြတ်နေသူလည်း ဖြစ်ပါတယ်။
