CNA ၊ လင်းလင်း။
ရခိုင်က ပုဏ္ဏားကျွန်းမြို့နယ်အတွင်မှာ ပုဏ္ဏားကျွန်းလူငယ်များအစည်းအရုံး (PYA) ကဦးဆောင်ကာ ကလေးသူငယ်ပြုစုစောင့်ရှောက်ရေးဂေဟာ ဖွင့်လှစ်သွားဖို့အတွက် ပြင်ဆင်နေတယ်လို့ (PYA) တာဝန်ရှိသူတွေက ပြောပါတယ်။
အခုလို ကလေးသူငယ်ပြုစုစောင့်ရှောက်ရေးဂေဟာဖွင့်လှစ်ရတာဟာ ရခိုင်ဒေသအတွင်းမှာ နယ်လည့်ကာ ကလေးတွေကို မွေးစားဖို့အတွက် ပေးကမ်းနေတာတွေ ကင်းမဲ့စေဖို့အတွက်၊ကလေးတိုင်း ကျန်းမာသန်စွမ်းစွာကြီးပြင်းလာနိုင်စေဖို့အတွက်၊ ကလေးတွေကို စွန့်ပစ်မှု မလုပ်ရအောင်ကင်းမဲ့စေဖို့အတွက် နဲ့ ကလေးမိဘတွေ အနေ နဲ့ ကလေးတွေကို စောင့်ရှောက်နိုင်ချိန်မှာ မိမိတို့ ဂေဟာအတွင်းကနေ ပြန်လည်ယူဆောင်ပေါင်းစည်းခွင့် ရရှိနိုင်ဖို့ အတွက် ရည်ရွယ် ချက် နဲ့ ဒီဂေဟာဖွင့်လှစ်ဖို့ကို စီစဉ်ရတာဖြစ်တယ်လို့ ပုဏ္ဏားကျွန်းလူငယ်များအစည်းအရုံးတာဝန်ရှိသူတွေက ပြောပါတယ်။
လက်ရှိမှာ ဒီဂေဟာတည်ဆောက်နိုင်ရေးအတွင် ပုဏ္ဏားကျွန်းလူငယ်များအစည်းအရုံးက မတည်အလှူရှင်တွေ နဲ့ အလှူငွေကောက်ခံတာတွေကို လုပ်ဆောင်နေတာ ရှိနေပြီး အခုလာမယ့် မတ်လအတွင်းမှာ စတင်ဖွင့်လှစ်နိုင်အောင်ပြင်ဆင်နေတယ်လို့လည်း ပုဏ္ဏားကျွန်းလူငယ်များအစည်းအရုံး ဥက္ကဌ ကိုပြည့်ဖြိုးနိုင်က CNA ကို ပြောပါတယ်။
“ကျနော်တို့ ရခိုင်ဒေသမှာက ကလေးတွေကို မကျွေးမမွေးနိုင်တဲ့ အနေအထားရောက်လာတဲ့ အတွက် ကလေးတွေကို တခြားလူတွေကိုလိုက်ပေးနေရတာတွေ ကို ကျနော်တို့ကိုယ်တိုင်မြင်တွေ့နေရတာတွေ ရှိနေတဲ့ အတွက် အခုဂေဟာဖွင့်ဖို့ဆိုတဲ့ဟာကို လုပ်လာရတာ ဖြစ်တယ်။ ဂေဟာဖွင့်ဖို့ အတွက်ကတော့ တခြားဆောင်တွေ ပြီးတော့ ကလေးအသုံးအဆောင်ပစ္စည်းတွေ အစစအရာရာ လိုအပ်ပါသေးတယ်။အခုလာမယ့် မတ်လအထဲမှာတော့ ကလေး ဦးရေ ၁၀ လောက်ကို တော့ စတင်လက်ခံသွားဖို့ လုပ်ဆောင်ထားတယ်”လို့ သူကပြောပါတယ်။
ဒါ့အပြင် ရခိုင်ဒေသအတွင်းမှာ မိမိတို့ကလေးကို ကျွေးမွေးစောင့်ရှောက်ဖို့ အမှန်တကယ်ခက်ခဲနေသူတွေ အနေ နဲ့လည်း မိမိတို့ကလေးကို တခြားနေရာတွေမှာ စွန့်ပစ်တာမျိူးတွေ မလုပ်ဆောင်ဘဲ ပုဏ္ဏားကျွန်းလူငယ်များအစည်းအရုံး (PYA) ကို လာရောက်ဆက်သွယ် အပ်နှံ့ကြဖို့ကိုလည်းတိုက်တွန်းတယ်လို့ဆိုပါတယ်။
ဒါ့အပြင် ကလေးတွေကို လာရောက်အပ်နှံတဲ့နေရာတွေမှာလည်း ပုဏ္ဏားကျွန်းလူငယ်များအစည်းအရုံး (PYA) က သေချာစီစစ်ကာ လက်ခံသွားဖို့ အတွက်ကိုလည်း စီစဉ်ထားတယ်လို့လည်းပုဏ္ဏားကျွန်းလူငယ်များအစည်းအရုံး ဥက္ကဌ ကိုပြည့်ဖြိုးနိုင်က ဆက်လက်ပြောဆိုပါတယ်။
“ကလေးလက်ခံရေး ကိစ္စ နဲ့ပတ်သက်ပြီးတော့ ကျနော်တို့ အသင်းမှာ ဆွေးနွေးနေတာတွေတော့ ရှိပါတယ်။ဘာတွေလည်းဆိုရင် အရမ်း လုံးဝစီးပွါးရေးအဆင်မပြေ ကလေးတွေကို မကျွေးနိုင် မမွေးနိုင်လုံးဝဖြစ်နေတဲ့သူတွေသာ လက်ခံသွားမယ်ဆိုတဲ့ စည်းကမ်းချက်တွေနဲ့ ချမှတ်ပြီးတော့ လက်ခံသွားမှာဖြစ်တယ်”လို့ သူကပြောပါတယ်။
ရခိုင်ဒေသအတွင်းမှာ စစ်ကောင်စီတပ်တွေ နဲ့ အာရက္ခတပ်တော်တို့ တကျော့ပြန်တိုက်ပွဲ ဖြစ်ပွါးခဲ့ပြီးနောက်မှာ စစ်ကောင်စီက ကုန်းလမ်း၊ရေလမ်း တွေ နဲ့ ကုန်သွယ်ရေးလုပ်ငန်းတွေကို အကုန်ဖြတ်တောက်ပိတ်ဆို့ထားခဲ့တဲ့အတွက် ရခိုင်ပြည်သူတွေဟာ စားဝတ်နေရေး အခက်ခဲများစွာ နဲ့ စစ်ဘေးရှောင် စခန်းတွေမှာ အလုပ်လက်မဲ့နေထိုင်နေကြရပါတယ်။
အဲဒီနောက် လက်လုပ်လက်စား ဒေသခံပြည်သူတွေဟာ မိမိတို့ရဲ့ ရင်သွေးငယ်တွေကို မကျွေးမွေးနိုင်တာကြောင့် မိမိတို့ရဲ့ ရင်သွေးငယ်တွေကို တခြားသူတွေကို မွေးစားဖို့ ပေးအပ်တာတွေလည်း ရှိလာနေခဲ့ရတာလည်း ဖြစ်ပါတယ်။
