တအာင်းပြည် ရဲ့ တပ်မဟာ(၂)နယ်မြေအတွင်းက နောင်ချိုမြို့ကို စစ်ကောင်စီက ဖေဖော်ဝါရီလ ၁၉ ရက်နေ့ ည ၈ နာရီကျော်မှာ လေကြောင်းကနေ ဂျက်ဖိုက်တာနဲ့ လေကြောင်းဗုံးကြဲတိုက်ခိုက်ခဲ့တာကြောင့် ဒေသခံ (၃)ဦး သေဆုံးခဲ့ပြီး (၄)ဦး ထိခိုက်ဒဏ်ရာရရှိခဲ့တယ်လို့ TNLA က သတင်းထုတ်ပြန်လာပါတယ်။
စစ်ကောင်စီက ဗုံးကြဲတိုက်ခိုက်ခဲ့တဲ့အတွင် နောင်ချိုမြို့ အတွင်းက ဘူတာရပ်ကွက် နဲ့ ပြည်သူ့ဆေးရုံကို ဗုံး ၂ လုံးကျရောက်ပေါက်ကွဲခဲ့တာဖြစ်တယ်လို့ ဆိုပါတယ်။
အဲဒီလို ပေါက်ကွဲတာကြောင့် ဘူတာရပ်ကွက် အတွင်းက ဒေသခံ (၂)ဦး သေဆုံးခဲ့ရပြီး (၃)ဦး ထိခိုက်ဒဏ်ရာရရှိခဲ့ရသလို ပြည်သူ့ဆေးရုံအတွင်းကလည်း ဒေသခံ (၁)ဦးသေဆုံးခဲ့ပြီး (၁)ဦး ထိခိုက်ဒဏ်ရာရရှိခဲ့တယ်လို့ ဆိုပါတယ်။
စစ်ကောင်စီဟာ ပြီးခဲ့တဲ့ ဖေဖော်ဝါရီ ၆ ရက်နေ့ကလည်း နောင်ချိုမြို့က သပြေတောင် ဘုရားကုန်းကို စစ်ကောင်စီတပ်က လေကြောင်းကဗုံးကြဲတိုက်ခိုက်ခဲ့တာ ကြောင့် ဒေသခံ (၁)ဦး ထိခိုက်ဒဏ်ရာရရှိခဲ့တာ ရှိခဲ့တယ်လို့ ဆိုပါတယ်။
စစ်ကောင်စီတပ်တွေ ဟာ တိုက်ပွဲဖြစ်ပွားတာမရှိဘဲ တိုင်းရင်းသားလက်နက်ကိုင်တွေ သိမ်းယူထားတဲ့ လွတ်မြောက်နေရာတွေက အရပ်သားနေထိုင်ရာနေရာတွေကို ရည်ရွယ်ချက်ရှိရှိနဲ့ ဦးတည်ပြီးတော့ လေကြောင်းက ဗုံးကြဲတိုက်ခိုက်တာတွေကို ဆက်တိုက်လုပ်ဆောင်နေတာတွေကြောင့် မြန်မာနိုင်ငံအတွင်းမှာ နေ့စဉ်နဲ့ အမျှ အရပ်သားထိခိုက်သေဆုံးတာတွေ ရှိနေရပါတယ်။
အဲဒီလို စစ်ကောင်စီက အရပ်သားတွေကို ပစ်မှတ်ထား တိုက်ခိုက်နေတဲ့ အတွက် အရပ်သားပြည်သူတွေ အနေနဲ့လည်း စစ်ကောင်စီရဲ့ လေကြောင်းတိုက်ခိုက်မှုကို ရှောင်ရှားနိုင်ဖို့ အတွက် စစ်ရေးသတိအမြဲရှိဖို့လိုအပ်သလို လေကြောင်းရန်ကာကွယ်ရေးဆိုင်ရာ နည်းလမ်းတွေကိုလည်း လိုက်နာဆောင်ရွက်ကြဖို့ကို TNLA က တိုက်တွန်းပြောဆိုထားပါတယ်။
