CNA ၊လင်းလင်း။
စစ်ကောင်စီက ပေါက်တောမြို့က ကျေးရွာတွေကို ဒီနေ့ နေ့လယ် ၁ နာရီကတည်းကပင် ၂ နာရီကျော်အထိ လေကြောင်းက အပြင်းအထန် ဗုံးကြဲတိုက်ခိုက်တာကို လုပ်ဆောင်ခဲ့တယ်လို့ ပေါက်တောမြို့ဒေသခံတွေက ပြောပါတယ်။
အဲဒီလို ဗုံးစစ်ကောင်စီက ဗုံးကြဲတိုက်ခိုက်ခဲ့တဲ့ အတွက် ပေါက်တောမြို့နယ်အတွင်းက ငပီကျွန်းရွာ၊ဆင်တက်မော်ဘော်ဒလီရွာ၊တောင်ချောင်ရွာ၊ဆင်တက်မော်တောတန်းကျေးရွာ၊မညင်းကိုင်းကျေးရွာ နဲ့ ဆင်တက်မော်မူဆလင်ရွာကျေးရွာတွေကို ဗုံးအလုံးရေ ၄၀ ထက်မနည်းကြဲချတိုက်ခိုက်ခဲ့တာ ဖြစ်တယ်လို့ ဆိုပါတယ်။
ဒီတိုက်ခိုက်မှုကြောင့် ကျေးရွာအတွင်းမှာ ရှိနေတဲ့ ဒေသခံ ပြည်သူတွေ ထိခိုက်ဒဏ်ရာရတာတွေ ရှိနေသလို လူနေအိမ်တွေလည်း များစွာပျက်စီးသွားခဲ့ရတယ်လို့ ကနဦးသိရှိထားရကြောင်း ပေါက်တော မြို့ခံတစ်ဦးက ပြောပါတယ်။
“စစ်ကောင်စီက ဗုံးကြဲတာက Y – 12 နဲ့ကြဲတာပါ အလုံးရေ ၄၀ ကျော်လောက်ကြဲတယ်။လူနေအိမ်တွေ မီးလောင်ပျက်စီးတာတွေ လူတွေ ထိခိုက်ဒဏ်ရာရတာတွေ ရှိတယ်လို့ သိထားရတယ် အရေအတွက်ကိုတော့ လက်ရှိကျနော်တို့ အတည်မပြုနိုင်သေးဘူး။စာရင်းတွေ ကောက်နေတုန်းရှိသေးတယ် နေအိမ်ပျက်စီးမှုတွေလည်းတော်တော်တော့များတယ်လို့”ပြောပါတယ်။
အဲဒီလို လေကြောင်းတိုင်ခိုက်မှုလုပ်ဆောင်ခဲ့တာနဲ့ အတူ စစ်တွေ မြို့တွင်းမှာ ရှိတဲ့ စစ်ကောင်စီတပ်စခန်းတွေကလည်း ပေါက်တောမြို့နယ်အတွင်းကို လက်နက် ကြီးတွေ နဲ့ ပစ်ခတ်တာကိုဆက်တိုက်လုပ်ဆောင်ခဲ့တာတွေလည်း ရှိတယ်လို့ စစ်တွေမြို့ဒေသခံတစ်ဦးကပြောပါတယ်။
“စစ်တွေမြို့စစ်ကောင်စီတပ်ရင်းတွေကလည်း လက်နက်ကြီးတွေ နဲ့ ဆက် တိုက်ပစ်တာရှိတယ် အဲဒီအချိန်လောက်မှာ လေယာဉ်က ဗုံးကြဲသံတွေကိုလည်း ကြားရတယ် ပေါက်ကွဲသံ အကျယ်ကြီးကြားရတာလည်း ရှိတယ် ဘယ်နေရာတွေကို ကျတယ်ဆိုတာတော့ကျနော်တို့လည်း ထွက်မကြည့်ရဲဘူး။ပေါက်တောကိုတော့ ဒီနေ့တော်တော် ပြင်းပြင်းထန်ထန်တိုက်ခိုက်တာကို လုပ်ဆောင်ခဲ့တယ်”လို့ သူကပြောပါတယ်။
စစ်ကောင်စီတပ်တွေဟာ ပြီးခဲ့တဲ့ ဖေဖော်ဝါရီလ ၁၇ ရက်နေ့ မနက်ပိုင်းကလည်း ပေါက်တောမြို့နယ်အတွင်းက သဲခုံကျေးရွာ အပါအဝင် နေရာတော် တော် များများကို စစ်ကောင်စီက လေကြောင်းတိုက်ခိုက်တာတွေ လုပ်ဆောင်ခဲ့တဲ့ အတွက် နေအိမ်တွေ မီးလောင်ပျက်စီးသွားခဲ့တာတွေလည်း ရှိခဲ့ရပါတယ်။
လက်ရှိ ပေါက်တောမြို့ကို စစ်ကောင်စီက လေကြောင်းဗုံးကြဲတိုက်ခိုက်မှု ဖြစ်စဉ် နဲ့ပတ်သက်ပြီး ထိခိုက်ဒဏ်ရာရရှိမှု နဲ့ ပျက်စီးမှုအခြေအနေကို သိရှိနိုင်ဖို့ အတွက် CNA က ဆက်လက်စုံစမ်းနေဆဲဖြစ်ပါတယ်။
