စစ်ကိုင်းတိုင်းအတွင်းမှာ ၂၀၂၂ခုနှစ်၊ ဇန်နဝါရီလကနေ ၂၀၂၄ခုနှစ်၊ ဒီဇင်ဘာလအတွင်း အကြမ်းဖက်ဖြစ်စဉ်တွေကြောင့် အရပ်သား ၄၀၀၀ကျော်သေဆုံးခဲ့ရတယ်လို့ Data For Myanmarက ထုတ်ပြန်လာပါတယ်။
Data For Myanmarရဲ့ ထုတ်ပြန်ချက်အရ စစ်ကိုင်းတိုင်းထဲမှာ ရွှေဘိုခရိုင်ဟာ အရပ်သားသေဆုံးမှု အများဆုံးဖြစ်ပြီး၊ အရပ်သားသေဆုံးသူ စုစုပေါင်း ၁၀၇၄ဦး ရှိခဲ့တယ်လို့ ဆိုပါတယ်။
ဒါ့အပြင် မုံရွာခရိုင်မှာ ၆၇၇ ဦး၊ စစ်ကိုင်းခရိုင်မှာ ၅၄၇ ဦး၊ ကန့်ဘလူခရိုင်မှာ ၄၈၁ ဦး၊ ယင်းမာပင်ခရိုင်မှာ ၃၇၄ ဦးနဲ့ ကလေးခရိုင်မှာ ၃၇၀ ဦးရှိခဲ့ပြီး အခြားခရိုင်တွေထက် သိသိသာသာများပြားတယ်လို့လည်း ဖော်ပြထားပါတယ်။
သေဆုံးသူတွေထဲမှာ ၆၈ရာခိုင်နှုန်းလောက်ဟာ အသက် ၁၈နှစ်အထက် အမျိုးသားတွေဖြစ်ပြီး၊ ၁၈ရာခိုင်နှုန်းကတော့ ၁၈နှစ်အထက် အမျိူးသမီးတွေဖြစ်တယ်လို့ ဆိုပါတယ်။
အသက် ၁၈နှစ်အောက် ယောကျာ်းလေးသေဆုံးသူ ၄ရာခိုင်နှုန်း၊ အသက် ၁၈နှစ်အောက် မိန်းကလေးသေဆုံးသူ ၃ရာခိုင်နှုန်းနဲ့ ကျား/မ အတည်မပြုနိုင်သူ ၇ရာခိုင်နှုန်းရှိတယ်လို့လည်း ဖော်ပြထားပါတယ်။
ဖော်ပြပါစာရင်းတွေထဲက အရပ်သားသေဆုံးမှုရဲ့ ၇၀ရာခိုင်နှုန်းလောက်ဟာ အရပ်သားတွေကို ပစ်မှတ်ထား သတ်ဖြတ်မှုတွေကြောင့်ဖြစ်ပြီး၊ ၂၅ရာခိုင်နှုန်းကတော့ လက်နက်ကြီး၊ ဒရုန်း၊ မိုင်းနဲ့ လေကြောင်းတိုက်ခိုက်မှုတွေကြောင့်ဖြစ်တယ်လို့ အသိပေးထားပါတယ်။
လက်နက်ကိုင်အဖွဲ့အစည်းတွေရဲ့ အရပ်သားတွေကို ပစ်မှတ်ထားသတ်ဖြတ်မှုတွေကြောင့် သေဆုံးသူ ၂၉၃၂ ဦးနဲ့ ဒဏ်ရာရသူ ၄၉၇ ဦးရှိခဲ့ပြီး၊ လက်နက်ကြီး၊ ဒရုန်း၊ မိုင်းနဲ့ လေကြောင်း တိုက်ခိုက်မှုတွေကြောင့် သေဆုံးသူ ၁၀၃၀ ဦးနဲ့ ဒဏ်ရာရသူ ၂၄၈၁ ဦးရှိခဲ့တယ်လို့ ဆိုပါတယ်။
ကျူးလွန်တဲ့အဖွဲ့အစည်းအလိုက် အရပ်သားသေဆုံးမှုကိုကြည့်မယ်ဆိုရင်တော့ စစ်ကောင်စီတပ်ဖွဲ့ဝင်တွေကြောင့် အရပ်သားသေဆုံးသူ ၂၄၁၄ ဦးနဲ့ တော်လှန်ရေးအဖွဲ့အစည်းတွေကြောင့် အရပ်သားသေဆုံးသူ ၁၀၂၇ ဦးရှိတာကိုတွေ့ရတယ်လို့လည်း Data For Myanmarက ထုတ်ပြန်ထားပါတယ်။
ဒါပေမယ့် ကျူးလွန်တဲ့အဖွဲ့အစည်းနဲ့ပတ်သက်ပြီး အချက်အလက်ဖြည့်သွင်းတဲ့နေရာမှာ အချို့ဖြစ်စဉ်တွေဟာ နှစ်ဘက်တင်ပြချက်ကွဲလွဲမှုတွေ တွေ့ရတာကြောင့် ဖြစ်စဉ်တစ်ခုချင်းစီအလိုက် အသေးစိတ် စုံစမ်းစစ်ဆေးမှုတွေ လုပ်ဆောင်ဖို့ လိုအပ်နေတယ်လို့လည်းData for Myanmarက ဆိုပါတယ်။
ယခုဖော်ပြထားတဲ့အချက်အလက်တွေဟာ ပြည်တွင်းမီဒီယာတွေ၊ စစ်ကောင်စီရဲ့ ပြည်ထဲရေးဝန်ကြီးဌာနက ထုတ်ပြန်တဲ့ အချက်အလက်တွေ၊ ရင်းမြစ်မျိုးစုံကနေရရှိတဲ့ အချက်အလက်တွေ၊ ဒေသခံပရဟိတအဖွဲ့အစည်းတွေနဲ့ အရပ်ဘက် အဖွဲ့အစည်းတွေရဲ့ အချက်အလက်တွေကို ရနိုင်သလောက် တိုက်ဆိုင်စစ်ဆေးထားတာဖြစ်တယ်လို့လည်း Data for Myanmarက ထုတ်ပြန်ထားပါတယ်။
