CNA ၊ လင်းလင်း။
ပြီးခဲ့တဲ့ ဖေဖော်ဝါရီလ ၂၃ ရက်နေ့က မြိုလူမျိုးတွေ အနေ နဲ့ အာရက္ခတပ်တော် ဆီမှာ စစ်သင်တန်းတက်ရောက်ဖို့အတွက် တိုက်တွန်းတောင်းဆိုခဲ့တာဟာ ဘယ်အဖွဲ့အစည်းတွေ ရဲ့ ဖိအားကြောင့်မှာ တိုက်တွန်းတောင်းဆိုခဲ့တာ မဟုတ်ဘဲ လိုအပ်ချက်အရ တိုက်တွန်းတောင်းဆိုခဲ့တာ ဖြစ်တယ်လို့ Mro Youth Union အဖွဲ့က ပြောဆိုလိုက်ပါတယ်။
ပြီးခဲ့တဲ့ ဖေဖော်ဝါရီလ ၂၃ ရက်နေ့မှာ မောင်တောမြောက်ပိုင်းမှာ ရှိနေတဲ့ မြိုလူမျိုး ၁၀၀ ကျော်လောက်ဟာ အာရက္ခတိုင်ပြည်ဟာငါတို့ပြည်၊အာရက္ခတိုင်းပြည်ကိုငါတို့ပါဝင်တည်ဆောက်ဖို့ နဲ့ အာရက္ခတိုင်းပြည်ကိုငါတို့ ကိုယ်တိုင်ပါဝင်ကာကွယ်ဖို့ဆိုတဲ့ ကြွေးကြော်သံတွေ နဲ့ အတူ ဒေသမှာ ရှိနေတဲ့ မြိုလူမျိုးတွေ အနေ နဲ့ အာရက္ခတပ်တော်ဆီမှာ စစ်သင်တန်းတက်ရောက်ကြဖို့ တိုက်တွန်းခဲ့တာကို လုပ်ဆောင်ခဲ့ပါတယ်။
အဲဒီလို ကြွေးကြော်ကာ တိုက်တွန်းတောင်းဆိုခဲ့ရတာဟာ မိမိတို့လူမျိုး မိမိတို့ ရပ်ရွာကို မိမိတို့ကိုယ်တိုင်ကာကွယ်နိုင်ဖို့ အတွက် မည်သူ တစ်ဦးတစ်ယောက် ရဲ့ ဖိအားမျှ မပါဘဲ မိမိတို့ သဘောဆန္ဒအရတိုက်တွန်းတောင်းဆိုခဲ့ကြတာ ဖြစ်တယ်လို့ Mro Youth Union အဖွဲ့ရဲ့ တာဝန်ရှိသူ တစ်ဦးက CNA ကိုပြောပါတယ်။
“ကျနော်တို့ တိုက်တွန်းတောင်းဆိုခဲ့တာကတော့ ဘယ်သူ တစ်ဦးတစ်ယောက်ရဲ့ ဖိအားပေးလို့ လုပ်ခဲ့တာမဟုတ်ဘူး ကျနော်တို့ သဘောအရ ဒီဟာကို လုပ်သင့်တယ်လို့ ထင်လို့ လုပ်ခဲ့တာဖြစ်တယ်။ပြီးတော့ ဒီကိစ္စက ကျနော်တို့ ရပ်ရွာလုံခြုံရေးအတွက် လိုအပ်လို့ လုပ်ဆောင်ခဲ့တာ ဖြစ်တယ်”လို့ သူကဆိုပါတယ်။
ဒါ့အပြင် တစ်ဖက်မှာလည်း မောင်တောမြောက်ပိုင်းမှာ ရှိနေတဲ့ မြိုလူမျိုးတွေ နေထိုင်နေတဲ့ နေရာဒေသတွေဟာ အကြမ်းဖက် လက်နက်ကိုင်အဖွဲ့တွေ ဖြစ်ကြတဲ့ ARSA ၊ RSO နဲ့ ARA အဖွဲ့တွေ နဲ့ အနီးစပ်ဆုံးကျေးရွာတွေ ဖြစ်တဲ့ အတွက် အခုလို အခြေခံစစ်သင်တန်းကို တက်ရောက်ကာ မိမိရပ်ရွာကို မိမိတို့ အနေ နဲ့ ကာကွယ် ရမယ်ဆိုတဲ့ အသိ နဲ့ အခုလို တိုက်တွန်းနိုးဆော်ခဲ့တာ ဖြစ်တယ်လို့လည်းဆိုပါတယ်။
ဒါ့အပြင် အရင်တုန်းကလည်း အခုလို အခြေခံစစ်သင်တန်းတက်ရောက်ခဲ့သူတွေလည်း ရှိခဲ့ပြီး လက်ရှိ အဲဒီလူငယ်တွေဟာ မိမိတို့ဒေသအတွင်းမှာ ရပ်ရွာ လုံခြုံရေး အတွက် လုပ်ဆောင်ပေးနေတာတွေ လည်း ရှိတယ်လို့လည်း Mro Youth Union အဖွဲ့ တာဝန်ရှိသူက ဆက်လက်ပြောဆိုပါတယ်။
” ကျနော်တို့ နေထိုင်တဲ့ ရပ်ရွာ တော်တော်များများက နယ်စပ်ဒေသက ရွာတွေ ဖြစ်တယ် အကြမ်းဖက် အဖွဲ့တွေ နဲ့ ဆက်ဆံရတဲ့ နေရာတွေဖြစ်တဲ့အတွက် ဒီအခြေခံ ကာကွယ်ရေးသင်တန်းက မတက်မဖြစ်တက်ထားရမယ့် အနေအထားမှာ ဖြစ်နေတယ်။မဟုတ်ရင် ကျနော်တို့ အတွက် လုံခြုံမှု မရှိဖြစ်နေတယ် စိုးရိမ်တကြီး နဲ့နေနေရတဲ့ အနေအထားမှာ ရှိနေတယ်။ကျနော်တို့ကို အရင်ကတည်းကပင် အာရက္ခတပ်တော် ရဲ့ ဒေသအာဏာပိုင်တွေက အခုလို ရပ်ရွာလုံခြုံရေးအတွက် သင်တန်းတွေ တက်ဖို့ခေါ်တယ်။အရင်သွားတက်ခဲ့တဲ့ လူတွေကတော့ သင်တန်းပြန်ဆင်းလာပြီးတော့ ရပ်ရွာတာဝန်တွေကို ထမ်းဆောင်နေတာ ရှိနေပြီ ရှေ့တန်းစစ်မျက်နှာပြင်ကို လွတ်တာတော့ မရှိသေးဘူး”လို့လည်း သူကပြောပါတယ်။
မောင်တောဒေကို အာရက္ခတပ်တော်ဟာ စစ်ကောင်စီလက်ထဲကနေ အပြီးသတ်သိမ်းပိုက်ရရှိထားပြီးတဲ့ မြို့နယ် တစ်ခုဖြစ်ပြီးတော့ လက်ရှိမှာပြန်လည် ထူထောင်ရေး လုပ်ငန်းတွေကို စတင်လုပ်ဆောင်နေပြီးဖြစ်တဲ့ မြို့နယ်တစ်ခုလည်းဖြစ်ပါတယ်။
ဒါ့အပြင် တစ်ဖက်မှာလည်း အကြမ်းဖက်လက်နက်ကိုင်အဖွဲ့တွေ ဖြစ်ကြတဲ့ စစ်ကောင်စီ စစ်သင်တန်းပေးထားတဲ့ မွတ်ဆလင် လက်နက်ကိုင်တွေနဲ့ ARSA၊ RSO၊ ARA အပါအဝင် အကြမ်းဖက်တွေ သောင်းကျန်းနေတဲ့ နေရာတစ်ခုလည်း ဖြစ်ပါတယ်။
