တိုက်ပွဲတွေ ဆက်တိုက်ဖြစ်နေတဲ့ တရုတ်စီမံကိန်းတည်ရှိရာ ကျောက်ဖြူမြို့အတွင်းမှာ စစ်ကောင်စီက လေကြောင်းဗုံးကြဲတိုက်ခိုက်တာကို ဆက်တိုက်လုပ်ဆောင်နေတယ်လို့ ကျောက်ဖြူ နဲ့ အဆက်အသွယ် ရရှိတဲ့ ဒေသခံ ပြည်သူတွေက CNA ကို ပြောပါတယ်။
စစ်ကောင်စီတပ်တွေ နဲ့ အာရက္ခတပ်တော်တို့ဟာ ကျောက်ဖြူမြို့နယ်အတွင်းက ဇိုင်ချောင်းနှင့် သစ်ပုတ်တောင် လမ်းဆုံအနီးမှာ စတင်တိုက်ပွဲဖြစ်ပွါးခဲ့တာဖြစ်ပြီး အဲဒီကတည်းက စတင်ဖြစ်ပွါးခဲ့တဲ့ တိုက်ပွဲဟာ တဖြေးဖြေးနဲ့ စစ်ကောင်စီရဲ့ ဓညဝတီရေတပ်စခန်းဌာနချုပ်အနီးထိရောက်ရှိလာခဲ့တာလည်းဖြစ်ပါတယ်။
အဲဒီလို နှစ်ဖက်တိုက်ပွဲ တွေ ပြင်းထန်လာတဲ့ နဲ့ အတူ စစ်ကောင်စီဟာ ဓညဝတီရေတပ်စခန်းဌာနချုပ်အနီး က စည်မော်၊ဦးကင် အပါအဝင် အဲဒီအနီးက ကျေးရွာတွေကို လေကြောင်းက ဂျက်ဖိုက်တာ နဲ့တိုက်ခိုက်တာ၊ဒရုန်းနဲ့ဗုံးကြဲတိုက်ခိုက်တာတွေ အပြင်လက်နက်ကြီးတွေ နဲ့လည်း ဒီနေ့မနက်ပိုင်းအထိ ဆက်တိုက် ပစ်ခတ်တိုက်ခိုက်နေတာရှိတယ်လို့သိရှိထားရကြောင်း ကျောက်ဖြူ နဲ့ အဆက်အသွယ် ရရှိသူ တစ်ဦးက CNA ကိုပြောပါတယ်။
“လေကြောင်းတိုက်ခိုက်တာ၊ဒရုန်းနဲ့တိုက်ခိုက်တာ၊နေဗီတွေက လက်နက်ကြီးနဲ့ ပစ်တာ အမှတ် (၃၂) ရဲ တပ်ရင်း ကလည်း လက်နက်ကြီးတွေ နဲ့ပစ်ခတ်တာက တော့ ဒီနေ့မနက်ပိုင်းထိ ရှိနေတုန်းလို့ ကျနော်သိရတယ်။လူထိခိုက်မှု ရှိ/မရှိကိုတော့ ကျနော်မသိရဘူး အခုက ဖုန်းက အဲဒီဖက်က ဆက်လာမှ ရတာဆိုတော့ ထိခိုက်မှု အခြေအနေကိုတော့ ကျနော့်ဆီကို မနက်ဖြန်ဖုန်းလာဆက်မှ သိရမယ်။တိုက်ပွဲကတော့ တော်တော် ပြင်းပြင်းထန်ထန်ဖြစ်နေတာလို့တော့ သိရတယ်”လို့ သူကပြောပါတယ်။
ဒါအပြင့် အဲဒီလို လက်နက်ကြီးတွေနဲ့ ပစ်ခတ်ခံနေရတဲ့ ကျေးရွာတွင်းက ဒေသခံတွေကို စစ်ကောင်စီက ထွက်ခွင့်ပိတ်ထားတာကြောင့် ကျေးရွာအတွင်းမှာ ဒေသခံတွေဟာ ပိတ်မိနေတာလည်း ရှိနေတယ်လို့ သိရှိထားရကြောင်း သူက ဆက်လက်ပြောဆိုပါတယ်။
အာရက္ခတပ်တော်ဟာ ရခိုင်က မြို့နယ် ၁၄ ခုကို အပြီးသတ်သိမ်းပိုက်ပြီးနောက်မှာ စစ်ကောင်စီကို လက်ရှိမြန်မာပြည်တွင်းရေးအခင်းအကျင်းကို စစ်ရေး နဲ့ ဖြေရှင်းတာထက် နိုင်ငံရေးနည်းလမ်းနဲ့ ဖြေရှင်းဖို့အတွက် ဖိတ်ခေါ်ခဲ့ပေမယ့် စစ်ကောင်စီက တစ်စုံတရာဆွေးနွေးပွဲအတွက် ပြင်ဆင်ခဲ့တာ မရှိတဲ့ အတွက် သိမ်းပိုက်ဖို့ ကျန်ရှိနေသေးတဲ့ မြို့နယ် ၃ ခုထဲက စစ်တွေ နဲ့ ကျောက်ဖြူမြို့တွေကို စတင်ထိုးစစ်ဆင်တိုက်ခိုက်ခဲ့တာလည်း ဖြစ်ပါတယ်။
ဒါ့အပြင် စစ်ကောင်စီဟာ ကျောက်ဖြူနဲ့ စစ်တွေ မြို့တွေကို အာရက္ခတပ်တော်က ထိုးစစ်ဆင်တိုက်ခိုက်လာခဲ့ရင် အာရက္ခတပ်တော် ရဲ့ ထိုးစစ်ကို ပြန်လည်ခုခံတိုက်ခိုက်နိုင်ဖို့အတွက် စစ်စခန်းတေွ အခိုင်အမာတည်ဆောက်တာ၊လက်နက်ကြီး လက်နက်ငယ်တွေ နဲ့ စစ်အင်အားတွေ ဖြည့်တင်းထားတာတွေ အပြင် အရပ်သားပြည်သူတွေကို မြို့တွင်းက ထွက်ခွါခွင့်မပေးဘဲ လူသားဒိုင်းအနေ နဲ့အသုံးပြုနိုင်ဖို့အတွက် ပိတ်လှောင်ထားတာတွေကိုလည်း လုပ်ဆောင်ထားတယ်လို့ ဆိုပါတယ်။
အဲဒီလို ပိတ်လှောင်ထားတာကြောင့် လက်ရှိတိုက်ပွဲ ဖြစ်နေတဲ့ ကျောက်ဖြူ မြို့ နဲ့ စစ်တွေ မြို့က ဒေသခံ ပြည်သူတွေဟာ ဘေးလွတ်ရာနေရာတွေကို ထွက်ခွါခွင့်မရဘဲ ပိတ်မိနေကြရတယ်လို့ ကျောက်ဖြူနဲ့ အဆက်အသွယ် ရရှိနေတဲ့ ကျောက်ဖြူဒေသခံတစ်ဦးကလည်း ပြောဆိုပါတယ်။
“အခုတိုက်ပွဲ ဖြစ်လာတော့ မြို့ထဲမှာကလည်း အပြင်ကို ထွက်ခွါခွင့်ကို အရင်ကထက်တင်းကြပ်လာတယ်လို့ သိရတယ် အရင်တုန်းကတည်းကပင် မြို့ထဲကနေ အပြင်ကိုထွက်မယ်ဆိုရင် ထွေအုပ်မှာ ထောက်ခံချက်ယူရတယ် အဲဒီထောက်ခံချက်တွေ နဲ့မှ တခြားကျေးရွာတွေကို သွားလို့ရတယ်။အခု အဲဒီထောက်ခံချက်ကို လည်းထွေအုပ်က မပေးတော့ဘူးလို့သိရတယ် အဲဒါကြောင့် ဒေသခံတွေဟာ မြို့ထဲမှာလည်း ပိတ်မိနေကြရတယ်။ထွက်မရ ဖြစ်မှာကိုလည်း တော်တော်စိုးရိမ်နေကြတယ်”လို့ သူကဆိုပါတယ်။
ဒါပေမယ် လက်ရှိကျောက်ဖြူမြို့နယ်အတွင်းမှာ ဖြစ်ပွါးနေတဲ့ တိုက်ပွဲ အခြေအနေတွေ နဲ့ ပတ်သက်ပြီး အာရက္ခတပ်တော် ဘက်ကလည်းတစ်စုံတရာ ထုတ်ပြန် ပြောဆိုလာတာလည်း မရှိသေးသလို စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကိုလည်း CNA က ဆက်သွယ်မေးမြန်းဖို့ ကြိုးစားခဲ့ပေမယ့် ဖုန်းလက်ခံဖြေ ကြားခဲ့တာ မရှိခဲ့ပါဘူး။
ဒါ့အပြင် ကျောက်ဖြူမြို့နယ်တစ်ခုလုံးကို စစ်ကောင်စီဟာ ပြီးခဲ့တဲ့ နှစ်ကတည်းကပင် ဖုန်းလိုင်းဖြတ်တောက်တာ အင်တာနက်လိုင်းဖြတ်တောက်တာတွေ အပြင် လျှပ်စစ်မီးတွေကိုလည်း ဖြတ်တောက်မှုတွေကိုလည်း လုပ်ဆောင်ထားတဲ့ မြို့တစ်ခုလည်း ဖြစ်ပါတယ်။
