အကျဉ်းထောင်တွေမှာ ဖမ်းဆီးခံထားရတဲ့ နိုင်ငံရေးအကျဉ်းသားတွေ နှိပ်စက်ခံနေရပြီး ဆေးဝါးကုသမှုမရတဲ့အတွက် ထိခိုက်သေဆုံးသူတွေလည်းရှိနေတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM)ရဲ့ ထုတ်ပြန်ချက်တွေ အရသိရပါတယ်။
ယခုရက်ပိုင်းအတွင်းမှာဆိုရင် ပြည်အကျဉ်းထောင်နဲ့ အိုးဘိုအကျဉ်းထောင်တို့မှာ နိုင်ငံရေးအကျဉ်းသားတွေ နှိပ်စက်ခံရတဲ့အပြင် နိုင်ငံရေးအကျဉ်းသား ကိုအောင်ထွန်းဆိုသူမှာလည်း ကျန်းမာရေးစောင့်ရှောက်မှု လုံလောက်စွာမရရှိလို့ သေဆုံးခဲ့ရတယ်လို့ ဆိုပါတယ်။
ဖေဖော်ဝါရီ ၁၈ရက်နေ့တုန်းကဆိုရင် အိုးဘိုအကျဉ်းထောင်မှာ ပုဒ်မ ၅၀၅- ကနဲ့ ထောင်ဒဏ် ၃နှစ် ချမှတ်ခံထားရတဲ့နိုင်ငံရေးအကျဉ်းသား ကိုအောင်ထွန်းဟာ ကျန်းမာရေးစောင့်ရှောက်မှု လုံလောက်စွာမရရှိလို့ သေဆုံးခဲ့ရတယ်လို့ အသိပေးထားပါတယ်။
ကိုအောင်ထွန်းဟာ ကျန်းမာရေးကောင်းမွန်သူတစ်ဦးဖြစ်ပြီး စတင်ဖမ်းဆီးခံရချိန်မှာ မည်သည့်ရောဂါမှ ဖြစ်ပွားခြင်းမရှိဘူးလို့ ဆိုပါတယ်။ အိုးဘိုအကျဉ်းထောင်အတွင်းကို ရောက်မှခန္ဓာကိုယ်မှာ အနာတွေ ပေါက်လာပြီး အနာပိုးဝင်ကာမှ စစ်ကောင်စီက ထောင်ဆေးရုံမှာ ဆေးကုသမှုပေးခဲ့တာဖြစ်တယ်လို့ ဖော်ပြထားပါတယ်။
အကျဉ်းထောင်အတွင်း သေဆုံးသွားတဲ့ ကိုအောင်ထွန်းရဲ့ ရုပ်အလောင်းကို စစ်ကောင်စီက ပြန်လည်သယ်ယူခွင့်မပြုခဲ့ဘူးလို့လည်း အသိပေးထားပါတယ်။
ဒါ့အပြင် ဖေဖော်ဝါရီလ ၂၃ရက်နေ့မှာလည်း ပဲခူးတိုင်း၊ ပြည်အကျဉ်းထောင်မှာ စားရိပ်သာတာဝန်ခံ (ဖိုခေါင်း)ဖြစ်သူ အကျဉ်းသားလင်းထိန်ဆိုသူက မည်သည့်အကြောင်းပြ ပြောဆိုခြင်းမှ မရှိဘဲ နိုင်ငံရေးအကျဉ်းသားတစ်ဦးကို လက်သီးနဲ့ထိုးခဲ့တယ်လို့ သိရပါတယ်။
အဲ့ဒီဖြစ်စဉ်နဲ့ပတ်သက်ပြီး ပြည်အကျဉ်းထောင်အတွင်းမှာရှိတဲ့ နိုင်ငံရေးအကျဉ်းသား (၁၀၀)ကျော်ခန့်က ကျူးလွန်သူ လင်းထိန်ကို အရေးယူပေးဖို့ ထောင်မှူး(နှစ်ပွင့်အရာရှိ) ဦးကျော်အောင် ထံကို ငြိမ်းချမ်းစွာ ဆန္ဒပြတောင်းဆိုခဲ့တယ်လို့ ဆိုပါတယ်။
ဒါပေမယ့် အကျဉ်းထောင်ဗဟိုကင်းကနေ သေနတ် ၂ချက် ပစ်ဖောက်ခဲ့ပြီး ထောင်ဝန်ထမ်းတွေနဲ့ ရာဇဝတ်အကျဉ်းသားတွေက ဝါးဆစ်တုတ်တွေ၊ သစ်သားတုတ်တွေ၊ ဓါးတွေ ကိုင်ဆောင်ပြီး နိုင်ငံရေးအကျဉ်းသားတွေကို ဝင်ရောက်ရိုက်နှက် ခြိမ်းခြောက်ခဲ့တယ်လို့ PPNMက ဆိုပါတယ်။
PPNMရဲ့ ထုတ်ပြန်ချက်အရ အဲ့ဒီဖြစ်စဉ်မှာနိုင်ငံရေးအကျဉ်းသား(၅)ဦးဟာ ဖူးယောင်ဒဏ်ရာ၊ ဦးခေါင်းပေါက်ပြဲဒဏ်ရာ၊ ခြေထောက် ပေါက်ပြဲ ပွန်းပဲ့ဒဏ်ရာတွေရရှိခဲ့ရတယ်လို့ အသိပေးထားပါတယ်။
လက်ရှိမှာတော့ နိုင်ငံရေးအကျဉ်းသားတွေက မတရားဖိနှိပ်မှုမပြုဖို့နဲ့ ဥပဒေနဲ့ အညီ ဖြေရှင်းဆောင်ရွက် အရေးယူပေးဖို့တောင်းဆိုထားတယ်လို့သိရပါတယ်။
မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM)အနေနဲ့လည်း ဖိနှိပ်ခံ နိုင်ငံရေးအကျဉ်းသားတွေနဲ့အတူ ရပ်တည်ပြီး ဆက်လက်စာင့်ကြည့်ဝန်းရံသွားမယ်လို့ ထုတ်ပြန်ထားပါတယ်။
ပြီးခဲ့တဲ့ ဖေဖော်ဝါရီ ၁၀ရက်နေ့တုန်းကလည်းအိုးဘိုအကျဉ်းထောင်မှာ ဖမ်းဆီး အကျဉ်းချခံထားရတဲ့ နိုင်ငံရေးအကျဉ်းသူ ဒေါ်စန်းရီဟာ ကျန်းမာရေးစောင့်ရှောက်မှု လုံလောက်စွာမရရှိလို့ သေဆုံးခဲ့ရတယ်လို့လည်း PPNMက ထုတ်ပြန်ထားပါသေးတယ်။
