CNA ၊ ဂူးဂူး။
အာရက္ခတပ်တော် နဲ့ စစ်ကောင်စီတို့ နှစ်ဖက်တိုက်ပွဲတွေပြင်းထန်နေတဲ့ ကျောက်ဖြူမှာ စစ်ကောင်စီက ကျေးရွာအတွင်းက ပြည်သူတွေကို စစ်ဘေးရှောင်ထွက်ခွင့် မပေးတာကြောင့် တိုက်ပွဲ ကြားမှာ ပိတ်မိနေကြရတယ်လို့ ဆိုပါတယ်။
စစ်ကောင်စီတပ်တွေ နဲ့ အာရက္ခတပ်တော်တို့ဟာ ပြီးခဲ့တဲ့ ဖေဖော်ဝါရီလ ၂၀ ရက်နေ့ ကတည်းကပင် ကျောက်ဖြူမြို့နယ်အတွင်းက ဇိုင်ချောင်းနှင့် သစ်ပုတ်တောင် လမ်းဆုံအနီးမှာ စတင်တိုက်ပွဲဖြစ်ပွါးခဲ့တာဖြစ်ပါတယ်။
အဲဒီနောက် တိုက်ပွဲဟာ တဖြေးဖြေး နဲ့ ကျယ်ပြန့်လာပြီးတော့ အာရက္ခတပ်တော် ရဲ့ထိုးစစ်တွေဟာ ဖေဖော်ဝါရီလ ၂၂ ရက်နေ့မှာတော့ ဓညဝတီ ရေတပ်ဌာနချုပ် အနီးဝန်းကျင်က ဦးကင်း၊ ကြတ္တိန်၊ စည်မော်ကျေးရွာ အနီးတဝိုက်ထိ ရောက်ရှိလာခဲ့ပြီးနောက် ဒီနေ့မှာတော့ ဓညဝတီ ရေတပ်ဌာနချုပ် အပါအဝင် ကျောက်ဖြူအခြေစိုက် အမှတ် (၃၂) ရဲ တပ်ရင်း ထိ ဖေဖော်ဝါရီလ ၂၆ ရက်နေ့မှာ ထိုးစစ်ဆင်တိုက်ခိုက်လာခဲ့တာလည်း ဖြစ်ပါတယ်။
အဲဒီလို အာရက္ခတပ်တော် ရဲ့ ထိုးစစ်ဟာ တဖြေးဖြေး ကျယ်ပြန့်လာတာနဲ့ အတူ စစ်ကောင်စီတပ်တွေဟာ ကျောက်ဖြူမြို့တွင်းက ဒေသခံပြည်သူတွေကို စစ်ရှောင်ခွင့်မပေးတာ နဲ့ တိုက်ပွဲတွေ ပြင်းထန်နေတဲ့ ဓညဝတီ ရေတပ်ဌာနချုပ် အနီးကကျေးရွာတွေက ပြည်သူတွေကို ကျေးရွာအတွင်းက စစ်ရှောင်ထွက်ခွင့် မပေးတာတွေကို ဆက်တိုက်လုပ်ဆောင်ထားတဲ့ အတွက် ပိတ်မိနေဆဲဖြစ်တယ်လို့ ကျောက်ဖြူမြို့ခံ တစ်ဦးက CNA ကို ဖုန်းဆက်ပြောဆိုလာပါတယ်။
“ကျောက်ဖြူမှာကတော့ တိုက်ပွဲက တော်တော်ပြင်းပြင်းထန်ထန်ဖြစ်နေပါတယ်။ ဓညဝတီရေတပ်စခန်းကို ထိုးစစ်ဆင်နေတယ် ရဲတပ်ရင်းကိုလည်းထိုးစစ်ဆင်နေတယ်။ဒီနေ့ဆိုရင် စစ်တောရွာ၊သစ်ပုတ်တောင်ရွာနေရာတွေကို စစ်ကောင်စီနေဗီတွေက လက်နက်ကြီးတွေ နဲ့လည်း ပစ်နေပါတယ်။လေကြောင်းကလည်း ဂျက်ဖိုက်တာ နဲ့ ဗုံးကြဲတာတွေ ရှိနေပါတယ်။ လူတွေ သေသလား ပျောက်သလားဆိုတာကိုတော့ ကျနော်လည်း အတိအကျတော့ မသိရသေးပါဘူး။လူတွေကိုတော့ ထွက်ခွင့်မရအောင် စစ်ကောင်စီက လုပ်ထားတယ် ။ နှစ်ရွာပေါင်းတော့ ပိတ်မိနေတဲ့ ပြည်သူ ၇၀၀ ဝန်းကျင်လောက်တော့ ရှိပါမယ်”လို့ သူကပြောပါတယ်။
စစ်ကောင်စီတပ်တွေဟာ ရခိုင်တကျော့ပြန်တိုက်ပွဲ စတင်ဖြစ်ပွါးပြီးနောက်မှာ ဦးကင်း၊ ကြတ္တိန်၊ စည်မော် ၊စစ်တော နဲ့ သစ်ပုတ်တောင်ကျေးရွာတွေက ပြည်သူတွေကို မြို့တွင်းသွားလာခွင့်အပြုတာ ကျေးရွာအတွင်းကနေ ထွက်ခွင့်မပြုတာ စတာတွေကိုဆက်တိုက်လုပ်ဆောင်ခဲ့တာ ဖြစ်ပြီး လက်ရှိ အာရက္ခတပ်တော်က ဓညဝတီရေတပ်ဌာနချုပ်ကို ထိုးစစ်ဆင်တိုက်ခိုက်လာချိန်မှာလည်း စစ်ပွဲ နဲ့ ဘေးလွတ်ရာနေရာကို ထွက်ခွင့်မပေးဘဲ လူသားဒိုင်းအနေ နဲ့ အသုံးပြုနိုင်ဖို့ အတွက် ပိတ်ပင်တားဆီးထားတာဖြစ်တယ်လို့လည်းဆိုပါတယ်။
ဒါ့အပြင် တစ်ဖက်မှာလည်း စစ်ကောင်စီဟာ အရင်တုန်းက ကျောက်ဖြူမြို့တွင်းမှာ ရှိနေတဲ့ ပြည်သူတွေိကို ထွေအုပ်ထောက်ခံချက် နဲ့ မြို့ပြင်ထွက်ခွင့်ပေးခဲ့ပေမယ့် လက်ရှိကျောက်ဖြူမြို့နယ်အတွင်းတိုက်ပွဲ ဖြစ်လာချိန်မှာတော့ ထွေအုပ်ထောက်ခံချက်တွေ နဲ့ ထွက်ခွင့်မပေးတော့ဘဲ ပိတ်ပင်တားမြစ်ထားတယ်လို့ ပြီးခဲ့တဲ့ ဖေဖော်ဝါရီ ၂၅ ရက်နေ့က ကျောက်ဖြူဒေသခံတစ်ဦးက CNA ကို ပြောဆိုထားခဲ့ပါတယ်။
စစ်ကောင်စီတပ်တွေဟာ အခုလို ပြည်သူတွေကို စစ်ဘေးရှောင်ထွက်ခွင့်မပေးတာကြောင့် မြို့တွင်းတိုက်ပွဲ ဖြစ်လာခဲ့ရင် တိုက်ပွဲရှောင်ထွက်ခွင့်မရလိုက်ဘဲ ပိတ်မိနေမှာကိုလည်း စိုးရိမ်နေကြရတယ်လို့ ဆိုပြောဆိုကြပါတယ်။
