စစ်ကောင်စီက မာန်အောင်ကနေ ကျောက်ဖြူကို စစ်ကူနဲ့ ရိက္ခာပို့တာတွေ ဆက်တိုက်ရှိနေ

CNA၊ဂူးဂူး။

စစ်ကောင်စီဟာ မာန်အောင် ကနေ ကျောက်ဖြူကို စစ်ကူ နဲ့ ရိက္ခာတွေ အပြင် လက်နက်တွေကိုပါ ပို့ဆောင်နေတာတွေ ရှိနေတယ်လို့ မာန်အောင်ရဲ့စစ်ရေး သတင်းရင်းမြစ်တွေရဲ့ ပြောဆိုချက်တွေအရ သိရပါတယ်။

စစ်ကောင်စီတပ်တွေဟာ ရခိုင်တိုက်ပွဲ စတင်ချိန်ကတည်းကပင် မာန်အောင်မြို့နယ်ကို စစ်အင်အား၊လက်နက်အင်အား နဲ့ ရိက္ခာတွေ ကိုအဆက်မပြတ် လုပ်ဆောင်ခဲ့တာရှိပြီး လက်ရှိ တိုက်ပွဲပြင်းထန်နေတဲ့ ကျောက်ဖြူကို မာန်အောင်ကနေတဆင့် အရင်ဖြည့်တင်းထားတဲ့ ရိက္ခာ၊လက်နက် နဲ့ စစ်အင်အား တွေကို ပို့ဆောင်နေတာတွေ ရှိတယ်လို့ မာန်အောင်မြို့စစ်ရေး သတင်းရင်းမြစ်ကပြောပါတယ်။

” အခု မျှော်တော်ဦး ရေတပ်ကနေတဆင့် ကျောက်ဖြူကို လက်နက်၊ရိက္ခာ နဲ့ လူအင်အားတွေပို့တာတွေရှိနေတယ်။ဒေသခံ ငါးဖမ်းလှေတွေကို အတင်ခေါ်ယူပြီးပို့နေတာ။အရင်ကတည်းကပင် ဒီမှာက စစ်ကောင်စီက အကုန်ဖြည့်ထားတာ။လူအင်အားဆိုရင်လည်း မျှော်တော်ဦးရေတပ်စခန်းမှာ နေစရာနေရာတောင် မရှိလို့ အဆောက်အဦး အသစ်တွေဆောက်လို့ထားရတယ်”လို့သူက ပြောပါတယ်။

ဒါ့အပြင် စစ်ကောင်စီဟာ ကျောက်ဖြူတိုက်ပွဲ စတင်ပြီးနောက်ပိုင်းမှာ မာန်အောင် အနီးတဝိုက်က ပင်လယ်ပြင်မှာ စစ်သင်္ဘောတွေအင်အားတိုးချတာတွေကိုလည်း ဆက်တိုက်လုပ်ဆောင်ထားတယ်လို့ ဆိုပါတယ်။

အာရက္ခတပ်တော် အေအေ ဟာ တကျော့ပြန်တိုက်ပွဲစတင်ပြီးနောက် တစ်နှစ်ကျော်ကာလအတွင်း ရခိုင်က မြို့နယ် ၁၄ ခု နဲ့ ပလက်ဝဒေသကို အာရက္ခတပ်တော်က အပြီးသတ်သိမ်းပိုက်ထားနိုင်ခဲ့ပြီးဖြစ်ပါတယ်။

အဲဒီနောက် သိမ်းပိုက်ဖို့ကျန်နေသေးတဲ့ မာန်အောင်၊ကျောက်ဖြူ နဲ့ စစ်တွေ မြို့တွေထဲက စစ်တွေ နဲ့ ကျောက်ဖြူမြို့တွေကို ဒီလထဲမှာပဲဆက်လက်ထိုးစစ်ဆင်တိုက် ခိုက်လာခဲ့တာလည်း ဖြစ်ပါတယ်။

မာန်အောင်က စစ်ရေးအခြေအနေကို စောင့်ကြည့်နေသူ တစ်ဦးက “မာန်အောင်မှာတော့ ပုံမှန်ပါဘဲ အဲဒီကို စစ်အင်အားတွေ ပို့နေတာလောက်ပဲ ရှိတယ်။ ဒီမှာကတော့ စစ်အင်အားတော်တော်များများရှိတယ်။အရေအတွက်ကတော့ ခန်းမှန်းဖို့ခက်တယ်။ပြီးတော့အခုက နေဗီတွေကလည်း တော်တော် များတယ် သူတို့ချထားတာ”လို့ ဆိုပါတယ်။

ဒါပေမယ့် မာန်အောင်မြို့နယ်အတွင်းမှာ လည်း စစ်ကောင်စီတပ်တွေဟာ အာရက္ခတပ်တော်ကထိုးစစ်ဆင်တိုက်ခိုက်လာခဲ့ရင် ခုခံကာကွယ်ဖို့အတွက်
မျှော်တော်ဦးရေတပ်စခန်း ၊ကမုံတောင် ခမရ (၃၄၄) တပ်ရင်းတွေမှာ မြေမြုပ်မိုင်းထောင်တာ ဒရုန်းဖြတ်စက်တွေ တပ်ဆင်တာတွေကိုလည်း လုပ်ဆောင်ထားတယ်လို့ သိရပါတယ်။

ဒါ့အပြင် မာန်အောင်မြို့ နယ်ရဲစခန်း၊သစ်ပုံရဲကင်းစခန်း၊ကမားရဲကင်းစခန်း နဲ့ ဆားချက်ရဲကင်းစခန်းတွေမှာလည်း စစ်ကောင်စီတပ်သားတွေဟာ အခိုင်အ မာတပ်စွဲနေထိုင်နေတာတွေလည်း ရှိတယ်လို့ သိရပါတယ်။