မကွေးတိုင်း၊ မြိုင်မြို့နယ်နဲ့ ပေါက်မြို့နယ်အစပ်မှာရှိတဲ့ လက်ပံတို ရေနံမှော်အနီးက ကျေးရွာတွေ ဗုံးကြဲခံရလို့ လူ ၁၂ဦးထက်မနည်း သေဆုံးခဲ့တယ်လို့ အညာမြေတပ်ပေါင်းစုအဖွဲ့က ထုတ်ပြန်လာပါတယ်။
ဒီကနေ့ မတ်လ ၃ရက် မနက်အစောပိုင်း ၁နာရီနဲ့ ၂နာရီဝန်းကျင်အကြားမှာ မြိုင်နဲ့ ပေါက်အစပ်က လက်ပံတို ရေနံမှော်အနီးမှာရှိတဲ့ ကျေးရွာတွေကို စစ်ကောင်စီက Y-12လေယာဉ်ကို အသုံးပြုပြီး လေကြောင်းဗုံးကြဲတိုက်ခိုက်ခဲ့တာလို့ ဆိုပါတယ်။
မြိုင်မြို့နယ်အတွင်းက ဆိတ်ချေးရွာ အနီးပတ်ဝန်းကျင်၊ ဂျုတ်ကုန်းရွာ အနီးပတ်ဝန်းကျင်၊ ဘောင့်ဘင်ရွာ၊ ညောင်ကုန်းရွာ ဘုန်းကြီးကျောင်း၊ ဆူးဝင်းရွာ အနီးပတ်ဝန်းကျင်နဲ့ တောရွာအနီး လယ်ကွင်းပြင်တို့ကို စစ်ကောင်စီက လေကြောင်းဗုံးကြဲတိုက်ခိုက်ခဲ့တယ်လို့ အသိပေးထားပါတယ်။
ဒါ့အပြင် ပေါက်မြို့နယ်အတွင်းက လက်ပံတိုရွာ အနီးပတ်ဝန်းကျင်နဲ့ သရက်ကန်ရွာ အနီးပတ်ဝန်းကျင်တို့ကိုလည်း လေကြောင်းဗုံးကြဲတိုက်ခိုက်ခဲ့တယ်လို့ ဆိုပါတယ်။
အဲ့ဒီတိုက်ခိုက်မှုတွေအတွင်း လူ ၁၂ဦးထက်မနည်းသေဆုံးခဲ့ပြီး ထိခိုက်ဒဏ်ရာရသူ ၃၀ခန့်ရှိတယ်လို့ အညာမြေတပ်ပေါင်းစုက ဆိုပါတယ်။
စစ်ကောင်စီဟာ ပြီးခဲ့တဲ့ ဖေဖော်ဝါရီလ ၂၅ ရက်နေ့တုန်းကလည်း မြိုင်မြို့နယ်၊ ကျောက်ခွက်ရေနံမှော်ဒေသ၊ ဆုံကုန်းကျေးရွာမှာ ကျင်းပနေတဲ့ မင်္ဂလာဆောင်ကို လေကြောင်းက ဗုံးကြဲတိုက်ခိုက်ခဲ့လို့ လူ ၁၂ဦးသေဆုံးပြီး အများအပြားထိခိုက်ဒဏ်ရာရရှိခဲ့ပါသေးတယ်။
