တအာင်းပြည် ပညာရေးအတွက် ရည်ရွယ်ပြီးတော့ ဖွင့်လှစ်နေတဲ့ (၂၁) ကြိမ်မြောက် တအာင်းပညာရေးထီ ရဲ့ အမြင့်ဆုံး သိန်း ( ၅၀၀) ဆုကို နိုင်ငံခြားရောက်နေတဲ့ ရခိုင်လူမျိုးတစ်ဦးက ဆွတ်ခူးသွားတယ်လို့ TNLA ကသတင်းထုတ်ပြန်လာပါတယ်။
အဲဒီ(၂၁) ကြိမ်မြောက် တအာင်းပညာရေးထီ ကို ပလောင်ပြည်နယ်လွတ်မြောက်ရေးတပ်ဦး PSLF/TNLA အုပ်ချုပ်မှုအောက်မှာ ရှိတဲ့ မြေတစ်နေရာမှာ ပြီးခဲ့တဲ့ မတ်လ ၁ရက်နေ့ မနက်ပိုင်းမှာ တအာင်းပြည်ပညာရေးကောင်စီ – TLEC က ဦးဆောင် ဖွင့်လှစ်ခဲ့တာဖြစ်တယ်လို့ဆိုပါတယ်။
သိန်း ၅၀၀ ဆုကြီးပေါက် ဂဏန်းသည် အက္ခရာကတော့ (B-84501) ဖြစ်ပြီးတော့ နောက်ထပ်ဆုကြေး အနေ နဲ့ သိန်း(၁၀၀)ဆု(၁)ဆု၊သိန်း(၅၀)ဆု (၁)ဆု၊ သိန်း(၃၀)ဆု (၂)ဆု၊ (၁၀)သိန်းဆု (၃)ဆု၊ (၅)သိန်းဆု (၆)ဆု၊(၂)သိန်းဆု (၃၀)ဆုနှင့် တွတ်(၃)ဆု စုစုပေါင်း (၄၇)ဆု ကို ပေးအပ်ခဲ့တယ်လို့ ဆိုပါတယ်။
ပြီးခဲ့တဲ့ ဖေဖော်ဝါရီလအတွင်းမှာ ဖွင့်လှစ်ခဲ့တဲ့ တအာင်းပညာရေးထီရဲ့ (၂၀)ကြိမ်မြောက် အမြင့်ဆုံး သိန်း (၅၀၀)ဆု အက္ခရာ (A-48347) နဲ့ ပေါက်ဆုကြီး ကိုလည်း နမ့်ဆန်မြို့ မြသပိတ်ရပ်ကွက်တွင်းမှာနေထိုင်တဲ့ ဦးစိန်ပန်းဆိုသူက ဆွတ်ခူးရရှိသွားခဲ့တာရှိခဲ့သေးတယ်လို့ ဆိုပါတယ်။
တအာင်းပြည်ပညာရေးကောင်စီ – TLEC အနေနဲ့ ၂၀၂၄-၂၀၂၅ ပညာသင်နှစ်မှာ အခြေခံပညာ စာသင်ကျောင်းပေါင်း (၆၀၀)ကျော်၊ ကျောင်းသူ/သား (၆၆၀၀၀)ကျော်နှင့် ဆရာ/မ (၃၅၀၀)ကျော်နဲ့ ဖွင့်လှစ်နိုင်ခဲ့ပြီး အခုလာမည့် ၂၀၂၅-၂၀၂၆ ပညာသင်နှစ်တွေမှာလည်း ကျန်ရှိနေသေးတဲ့ မြို့တွေက အခြေခံပညာစာသင်ကျောင်းပေါင်း (၇၀၀) ကျော်ကိုလည်း ဆက်လက်ဖွင့်လှစ်နိုင်ဖို့ အတွက် စီစဉ်နေတယ်လို့ ဆိုပါတယ်။
ဒါ့အပြက် တစ်ဖက်မှာလည်း စာသင်ကျောင်းတွေ အတွက်လိုအပ်တဲ့ ရံပုံငွေနဲ့ ဆရာ/ဆရာမ (၃၅၀၀)ကျော်အတွက် လိုအပ်တဲ့ လစာငွေတွေကို တအာင်းထီ ရောင်းရတဲ့ငွေတွေ ထဲက လစဥ်ထောက်ပံ့ပေးနေတာ ဖြစ်တဲ့အတွက် အနယ်အနယ်အရပ်ရပ်မှာ ရှိနေကြတဲ့ မိဘပြည်သူများအနေနဲ့ တအာင်းပြည်က ကလေးငယ်တွေ ရဲ့ပညာရေးအား အထောက်အပံ့ဖြစ်ဖို့ အတွက် တအာင်းပညာရေးထီကို ဝယ်ယူထိုးပေးကြဖို့ကိုလည်း လိုအပ်နေတယ်လို့ တိုက်တွန်း ပြောဆိုထားပါတယ်။
