မြန်မာ နဲ့ ရုရှား လွှတ်တော်အချင်းချင်း ပူးပေါင်းဆောင်ရွက်မယ့် အစီအစဉ်အပါအဝင်လုံခြုံရေး နဲ့ စီးပွါးရေးတွေကိုပါ ဆွေးနွေးနေတယ်လို့ဆို

စစ်ခေါင်းမင်းအောင်လှိုင်ဟာ ရုရှားနိုင်ငံ ခရီးစဉ်အတွင်းမှာ မြန်မာနိုင်ငံ နဲ့ ရုရှားဖက်ဒရေးရှင်းနိုင်ငံတို့အကြား လွှတ်တော်အချင်းချင်း ပူးပေါင်းဆောင်ရွက်မယ့် အစီအစဉ်အပါအဝင်လုံခြုံရေး နဲ့ စီးပွါးရေးတွေကိုပါ ဆွေးနွေးနေတယ်လို့စစ်ကောင်စီလက်အောက်ခံ သတင်းစာဖြစ်တဲ့ ဒီနေ့ထုတ် မြန်မာအလင်းသတင်းစာမှာ ရေးသားဖော်ပြထားထားပါတယ်။

စစ်ခေါင်းဆောင် မင်းအောင်လှိုင်ဟာ ရုရှားသမ္မတ ဗလာဒီမာယာ ပူတင်ရဲ့ ဖိတ်ကြားချက်နဲ့ နိုင်ငံတော်အဆင့် တရားဝန်ချစ်ကြည်ရေးခရီးစဉ်အဖြစ် မတ်လ ၃ရက်မှာ ရုရှားကိုထွက်ခွာသွားခဲ့ပြီးနောက် စစ်ခေါင်းဆောင် နဲ့ ရုရှားသမ္မတ ဗလာဒီမီယာပူတင် တို့ဟာ မနေ့က မတ်လ ၄ရက်‌မှာ တွေ့ဆုံဆွေးနွေးမှုတွေ စတင်လုပ်ဆောင်ခဲ့တာလည်း ဖြစ်ပါတယ်။

အဲဒီလို တွေ့ဆုံဆွေးနွေးတဲ့ နေရာမှာ ဒူးမားလွှတ်တော် ရဲံ လုပ်ငန်းတာဝန် ဆောင်ရွက်နေမှုအခြေအနေတွေ၊ လွှတ်တော်ဖွဲစည်းထားရှိမှု နဲ့ ပါတီများဖွဲစည်းထားရှိမှုအခြေအနေတွေ၊ မြန်မာနိုင်ငံနဲ့ ရုရှားဖက်ဒရေးရှင်းနိုင်ငံတို့အကြား လွှတ်တော်များအချင်းချင်း ပူးပေါင်းဆောင်ရွက်သွားမည့်အခြေအနေတွေကို ဆွေးနွေးခဲ့တယ်လို့ ဖော်ပြထားပါတယ်။

အဲဒါတွေ အပြင် မတရားအာဏာသိမ်းယူထားတဲ့ မင်းအောင်လှိုင်အနေ နဲ့လည်း ၂၀၂၀ ပြည့်နှစ်ပ ပါတီစုံဒီမိုကရေစီအထွေထွေရွေးကောက်ပွဲမှာ မဲမသမာမှုတွေ ဖြစ်ခဲ့တာကြောင့် စစ်ကောင်စီ အနေ နဲ့ နိုင်ငံတာဝန်ကို ယူခဲ့ရကြောင်း နဲ့ လွတ်လပ်ပြီးတရားမျှတဲ့ ရွေးကောက်ပွဲကျင်းပနိုင်ရေးအတွက် ကြိုတင်ပြင်ဆင်ဆောင်ရွက်နေတာတွေကို တင်ပြခဲ့တယ်လို့လည်း ဆိုပါတယ်။

မြန်မာနိုင်ငံ၏ရွေးကောက်ပွဲကျင်းပချိန်မှာလည်း ရုရှားနိုင်ငံအနေ နဲ့ ထောက်ခံအားပေးသွားမယ့်အခြေအနေ၊ ပြည်ပမှအကူအညီများရယူထားတဲ့ ပါတီတွေ ကြောင့် နိုင်ငံတည်ငြိမ်အေးချမ်းမှုကို ထိခိုက်စေမှုအခြေအနေတွေ၊ မြန်မာနိုင်ငံ လွှတ်တော်များအဆင့်ဆင့်ဖွဲစည်းထားရှိမှု အခြေအနေ နဲ့ ရွေးကောက်ပွဲကျင်းပမှုပုံစံများ၊ နှစ်နိုင်ငံပူးပေါင်းဆောင်ရွက်မှုတွေ ဆက်လက်တိုးတက်အောင်ဆောင်ရွက်သွားမယ့် အခြေအနေ နဲ့ နှစ်နိုင်ငံလွှတ်တော်နှစ်ရပ်အကြား ချစ်ကြည်ရေးခရီး အပြန်အလှန်သွားရောက်ရေး ဆိုင်ရာကိစ္စရပ်တွေကိုပါ ဆွေးနွေးခဲ့တယ်လို့ ဆိုပါတယ်။

အဲဒီနောက် မင်းအောင်လှိုင် နဲ့ အပေါင်းအပါ အဖွဲ့တွေဟာ ရုရှားဖက်ဒရေးရှင်းနိုင်ငံ လုံခြုံရေးကောင်စီအတွင်းရေးမှူးရုံးမှာလည်း ရုရှားဖက်ဒရေးရှင်းနိုင်ငံ လုံခြုံရေးကောင်စီအတွင်းရေးမှူး Mr. Sergey Kuzhugetovich Shoigu နဲ့ လုံခြုံရေးဆိုင်ရာကိစ္စရပ်တွေကို ပူးပေါင်းဆောင်ရွက်မှု ပိုမိုမြှင့်တင်ဆောင်ရွက်ရေးဆိုင်ရာကိစ္စရပ်တွေ အပြင် မော်စကို မှာကျင်းပမယ့်နှစ် ၈၀ ပြည့် ဖက်ဆစ်တော်လှန်ရေးနေ့အခမ်းအနားကို မြန်မာကိုယ်စားလှယ်တွေ တက်ရောက်ရေး အတွက် နဲ့ လုံခြုံရေးဖိုရမ်ကိုလည်း မြန်မာကိုယ်စားလှယ်တွေကို ဖိတ်ခေါ်ခြင်းဆိုင်ရာကိစ္စရပ်တွေကိုလည်း မင်းအောင်လှိုင်က ဆွေးနွေးတင်ပြခဲ့တယ်လို့ ဆိုပါတယ်။

နေ့လယ်ပိုင်းမှာတော့ မင်းအောင်လှိုင် နဲ့ အဖွဲ့ဟာ ရုရှားဖက်ဒရေးရှင်း နိုင်ငံအစိုးရအဖွဲ့ဝန်ကြီးချုပ် H.E. Mikhail Vladimirovich Mishustim နဲ့ ရုရှားအစိုးရအဖွဲ့ အိမ်တော်အစည်းအဝေးခန်းမမှာ ကုန်သွယ်မှုကဏ္ဍ၊ စက်မှုကဏ္ဍ၊ ကုန်ထုတ်လုပ်မှုကဏ္ဍ၊ စိုက်ပျိုးရေးကဏ္ဍ နဲ့ ရင်းနှီးမြှုပ်နှံမှုကဏ္ဍတွေ ပူးပေါင်းဆောင်ရွက်မှုတိုးမြှင့်ဆောင်ရွက်ရေးဆိုင်ရာကိစ္စရပ်တွေ၊ အာကာသ နဲ့ဂြိုဟ်တုနည်းပညာဆိုင်ရာ ပူးပေါင်းဆောင်ရွက်ရေး၊ နှစ်နိုင်ငံခရီးသွားလုပ်ငန်း အပြန်အလှန်တိုးတက်လာစေရေး၊ မြန်မာနိုင်ငံအတွင်းမှာ ရုရှားနိုင်ငံကရင်းနှီးမြှုပ်နှံမှုတွေ လာရောက်ရင်းနှီးမြှုပ်နှံစေရေးဖိတ်ခေါ်မှုတွေ နဲ့ နှစ်နိုင်ငံအကြား သဘောတူညီမှုစာချွန်လွှာ လက်မှတ်ရေးထိုးနိုင်ရေးကိစ္စရပ်တွေ အပြင် နှစ်နိုင်ငံအကြား အစိုးရအဖွဲ့ အဆင့်မြင့်အရာရှိကြီးတွေ အပြန်အလှန် လည်ပတ်နိုင်ရေး ကိစ္စရပ်တွေကိုပါ ဆွေးနွေးခဲ့ကြတယ်လို့ ဆိုထားပါတယ်။

ဒီ ရုရှားခရီးစဉ်ကို စစ်ခေါင်းဆောင် မင်းအောင်လှိုင် အပါအဝင် စစ်ကောင်စီတွဲဖက်အတွင်းရေးမှူး ဗိုလ်ချုပ်ကြီး ရဲဝင်ဦး နဲ့ ချစ်ကြည်ရေးကိုယ်စားလှယ်အဖွဲဝင်များ၊ ရုရှားနိုင်ငံဆိုင်ရာမြန်မာနိုင်ငံသံအမတ်ကြီး၊ မြန်မာစစ်သံ(ကြည်း၊ ရေ၊ လေ) နဲ့ တာဝန်ရှိသူတွေ သွားရောက်နေကြတာလည်း ဖြစ်ပါတယ်။