ရုရှားသမ္မတ ဗလာဒီမာယာ ပူတင်နဲ့တွေ့ဆုံမှုဟာ ဗုဒ္ဓမြတ်စွာဘုရားက ဗျာဒိတ်တော်ပေးခဲ့တာနဲ့ တိုက်ဆိုင်နေတယ်လို့ စစ်ခေါင်းဆောင် မင်းအောင်လှိုင်က ပြောဆိုလိုက်ပါတယ်။
မနေ့ မတ်လ ၄ရက်နေ့တုန်းက ရုရှားသမ္မတ ပူတင်နဲ့ စစ်ခေါင်းဆောင် မင်းအောင်လှိုင်တို့တွေ့ဆုံချိန်မှာ ယခုလိုပြောဆိုခဲ့တာလည်းဖြစ်ပါတယ်။
မဟာဘိသက္ကပဏ္ဍိတဘွဲ့ခံပါဠိဆရာကြီး ဦးစောရေးတဲ့ “ဦးအောင်ဇေယျအတ္ထုပ္ပတ္တိ”ဆိုတဲ့ စာအုပ်မှာပါတဲ့ ဗျာဒိတ်တော်လာမဟာမိတ် ဆိုတဲ့အကြောင်းအရာကို စစ်ခေါင်းဆောင်က ပြောဆိုခဲ့တာပါ။
အဲ့ဒီစာအုပ်ထဲမှာ ဗုဒ္ဓမြတ်စွာဘုရားဟာ သာသနာတော်အနှစ် ၂၀၀၀ ကျော်တဲ့အခါ ရုရှားမင်းနဲ့ မြန်မာ ဘုရင်တို့ဟာ ချစ်ကြည်တဲ့ မဟာမိတ်တွေဖြစ်လိမ့်မယ်လို့ ဗျာဒိတ်စကား မြွက်ကြားတော်မူခဲ့ကြောင်း ဖော်ပြထားပါတယ်။
ဒါကိုအခြေခံပြီး စစ်ခေါင်းဆောင်က သူ့ကိုယ်သူ မြန်မာဘုရင်လို့ ရည်ညွှန်းခဲ့သလို ရုရှား သမ္မတ ပူတင်ကိုလည်း ရုရှား မင်းအဖြစ် ပြောဆိုခဲ့ပါတယ်။
ဒါ့အပြင် ဗုဒ္ဓမြတ်စွာဘုရားရဲ့ ဗျာဒိတ်စကားထဲမှာ ရုရှားမင်းဟာ လက်နက်အတက်ပညာမှာ တစ်ဖက်ကမ်းခတ်ပြီးတော့မှ အတုမရှိတဲ့လက်နက်ဝိဇ္ဇာ ဧကရာဇ်တစ်ပါးဖြစ်တယ်လို့ စစ်ခေါင်းဆောင်က ဆိုပါတယ်။
ရုရှားနိုင်ငံဟာလည်း လက်နက်နဲ့ နည်းပညာမှာ ကမ္ဘာ့ထိပ်တန်းအဆင့်ကိုရောက်ရှိနေပြီးဖြစ်တဲ့အတွက် ထူးထူးခြားခြားတိုက်ဆိုင်နေတာကို တွေ့ရတယ်လို့ စစ်ခေါင်းဆောင် မင်းအောင်လှိုင်က ပြောပါတယ်။
စစ်ခေါင်းဆောင် မင်းအောင်လှိုင်ဟာ ရုရှားသမ္မတ ဗလာဒီမာယာ ပူတင်ရဲ့ ဖိတ်ကြားချက်အရ နိုင်ငံတော်အဆင့် တရားဝန်ချစ်ကြည်ရေးခရီးစဉ်အဖြစ် ရုရှားနိုင်ငံကို ရောက်ရှိနေတာလည်းဖြစ်ပါတယ်။
ဒီခရီးစဉ်အတွင်းမှာ နှစ်ဖက်ယုံကြည်စိတ်ချစွာ ဆွေးနွေးမှုတွေနဲ့အတူ သဘောတူညီချက် ၁၀ ခု လက်မှတ်ရေးထိုးနိုင်ခဲ့တယ်လို့လည်း စစ်ခေါင်းဆောင်က မီဒီယာတွေနဲ့ တွေ့ဆုံရာမှာ ပြောကြားခဲ့ပါတယ်။
သဘောတူညီချက်တွေထဲမှာ မြန်မာနိုင်ငံမှာနျူကလီးယားစွမ်းအင်သုံး အသေးစားလျှပ်စစ်ဓာတ်အားထုတ်လုပ်တဲ့ Small Modular Reactor (SMR) တည်ဆောက်လည်ပတ်ရေးစာချုပ်နဲ့ နျူကလီးယားကို ငြိမ်းချမ်းစွာ အသုံးပြုနိုင်ရေး စာချုပ်တို့လည်းပါဝင်တယ်လို့ သိရပါတယ်။
ယူကရိန်းစစ်ပွဲနဲ့ ပတ်သက်ပြီးတော့လည်း ရုရှားဘက်က ရပ်တည်ကြောင်း စစ်ခေါင်းဆောင်က ပြောကြားခဲ့ပါသေးတယ်။
စစ်အာဏာသိမ်းပြီးနောက်ပိုင်း စစ်ကောင်စီဟာ တော်လှန်ရေးအဖွဲ့တွေနဲ့ အရပ်သားတွေကို လေကြောင်းတိုက်ခိုက်ရာမှာ ရုရှားနိုင်ငံထုတ် တိုက်လေယာဉ်တွေကို အဓိကထားအသုံးပြုနေပါတယ်။
ကမ္ဘာ့စစ်လက်နက်သတင်းတွေကို ဖော်ပြနေတဲ့ Army Recognition Groupရဲ့ ယခု ၂၀၂၅ခုနှစ်၊ ဇန်နဝါရီလ ၆ရက် ဖော်ပြချက်အရ စစ်ကောင်စီဟာ ရုရှားက မှာယူထားတဲ့ Su-30 တိုက်လေယာဉ် ခြောက်စင်းလုံးကို လက်ခံရရှိထားပြီးဖြစ်တယ်လို့ ဖော်ပြထားပါတယ်။
