ရန်ကုန်တိုင်းအတွင်းမှာ စစ်ကောင်စီရဲ့ ဖမ်းဆီးမှုတွေကြောင့် ဖေဖော်ဝါရီလအတွင်းမှာ လူ ၂၃၃ဦး ဖမ်းဆီးခံခဲ့ရတယ်လို့ Rangoon Scout Networkက ထုတ်ပြန်လာပါတယ်။
ပြီးခဲ့တဲ့ ဖေဖော်ဝါရီလအတွင်း ရန်ကုန်မှာ စစ်ကောင်စီရဲ့ဖမ်းဆီးမှုတွေထဲက ဖြစ်စဉ် ၉၆ခုကိုသိရှိခဲ့ရပြီး အဲ့ထဲက ဖြစ်စဉ် ၇၀ကို အတည်ပြုနိုင်ခဲ့တယ်လို့ ဆိုပါတယ်။
အတည်ပြုနိုင်ခဲ့တဲ့ စာရင်းတွေအရ ဖမ်းဆီးခံရသူ ၂၃၃ဦးထဲမှာ ၅၄ ဦးဟာ ပြန်လည်လွတ်မြောက်လာခဲ့ပြီး ၈ ဦးကိုတော့ ပြန်မလွှတ်ပေးတော့ကြောင်း အတည်ပြုနိုင်ခဲ့တယ်လို့ အသိပေးထားပါတယ်။ ကျန် ၁၇၁ဦးရဲ့ ပြန်လည်လွတ်မြောက်ခြင်း ရှိ၊ မရှိဆိုတဲ့ နောက်ဆက်တွဲအခြေအနေကိုတော့ မသိရှိရသေးဘူးလို့ ထုတ်ပြန်ထားပါတယ်။
ဖမ်းဆီးခံရသူအများစုဟာ လမ်းမပေါ်မှာ တွေ့ရာလူကို စစ်ကောင်စီက လိုက်ဆွဲလို့ ဖမ်းဆီးခံရတာဖြစ်ပြီး ပါသွားသူ ဦးရေမှာ ၁၀၆ဦး၊ ဧည့်စာရင်းစစ်ပြီး ဖမ်းခေါ်ခံရသူ ၆၃ ဦး၊ သတင်းအတိအကျနဲ့ ရှာဖွေဖမ်းဆီးခံရသူ ၅၉ ဦးနဲ့ ဖမ်းဆီးခံရတဲ့ပုံစံ မသိရဘဲ ချုပ်နှောင်ခံထားရသူ ၅ ဦး ရှိတယ်လို့လည်း Rangoon Scout Networkက ဆိုပါတယ်။
အဖမ်းခံရသူတွေထဲမှာ စစ်ရေးလှုပ်ရှားသူနဲ့ သပိတ်လှုပ်ရှားသူတွေလို့ စစ်ကောင်စီက စွပ်စွဲပြီးဖမ်းဆီးသွားသူ လူငယ် ၃ဦးနဲ့ အဆိုတော် လင်းလင်းရဲ့ ရောင်နီသီချင်းကို လမ်းဘေးမှာ တီးခတ်နေတာကို အားပေးအားမြောက်လုပ်လို့ဆိုပြီး ဖမ်းဆီးခံရသူ ၅ဦးရှိတယ်လို့လည်း ထုတ်ပြန်ထားပါတယ်။
ဒါ့အပြင် စစ်ကောင်စီဟာ ဖေဖော်ဝါရီလ ၁၇ ရက်နေ့မှာ စစ်မှုထမ်းသင်တန်း အမှတ်စဉ် ၁၀ကို စတင်ခဲ့ပြီး အဓမ္မစုဆောင်းထားသူ လူ ၅၀၀ ကျော်ကို တိုက်ကြီးမြို့နယ်နဲ့ လှည်းကူးမြို့နယ်မှာရှိတဲ့ စစ်သင်တန်းကျောင်းတွေကို ပို့ဆောင်ခဲ့တယ်လို့လည်း အသိပေးထားပါတယ်။
ဖော်ပြပါအချက်အလက်တွေဟာ Rangoon Scout Networkကို ပေးပို့လာတဲ့ သတင်းတွေ၊ ချိတ်ဆက်အဖွဲ့အစည်းတွေထံက သိရှိရတဲ့သတင်းတွေနဲ့ မီဒီယာ သတင်းတွေကို ကိုးကားပြုစုတွက်ချက်ထားတာသာဖြစ်ပြီး လက်တွေ့မြေပြင်အခြေအနေဟာ ဒီထက် ဆိုးရွားတယ်လို့လည်း ဖော်ပြထားပါတယ်။
