CNA ၊ လင်းလင်း။
စစ်ကောင်စီ နဲ့ အာရက္ခတပ်တော်တို့ တို့ပွဲတွေ အပြင်းအထန်ဖြစ်နေတဲ့ စစ်ကောင်စီ ထိန်းချုပ်ဆဲ ဖြစ်တဲ့ ရခိုင်က မြို့နယ် ၃ ခုမှာ တက္ကသိုလ်ဝင်ခွင့်စာမေးပွဲကို လာရောက် ဖြေဆိုကြဖို့ ကျောင်းသူ ကျောင်းသားတွေ နဲ့ ကျောင်းသားမိဘတွေကို ဖိအားပေးပြောဆိုနေတာရှိနေတယ်လို့ ဒေသခံတွေကပြောပါတယ်။
အဲဒီလို စာမေးပွဲ ဖြေဆိုဖို့အတွက် အတင်းဖိအားပေး ခံနေရတဲ့ မြို့တွေကတော့ အာရက္ခတပ်တော်က သိမ်းပိုက်ဖို့ ကျန်နေသေးတဲ့ စစ်တွေ၊ကျောက်ဖြူ နဲ့ မာန်အောင်မြို့တွေ ဖြစ်ကြပြီး လက်ရှိမှာ စစ်ကောင်စီ တပ်တွေ နဲ့ အာရက္ခတပ်တော်တို့ဟာ ကျောက်ဖြူ နဲ့ စစ်တွေ မြို့တွေမှာ နေ့စဉ်နှစ်ဖက်ပစ်ခတ်တိုက်ခိုက်တာတွေ ရှိနေကြတာလည်း ဖြစ်ပါတယ်။
မာန်အောင်မြို့နယ်အတွင်းမှာ စစ်ကောင်စီ နဲ့ အာရက္ခတပ်တော်တို့ နှစ်ဖက်တိုက်ပွဲ ဖြစ်ပွါးတာ မရှိပေမယ့် စစ်ကောင်စီက စစ်အင်အားဖြည့်တင်းတာ စစ်ရေး အတွက် ဆက်တိုက်ပြင်ဆင်တာ ရှိနေချိန်မှာ မာန်အောင်မြို့နယ်အတွင်းက စစ်ကောင်စီရဲ့ စီမံအုပ်ချုပ်ရေး အဖွဲ့က ကျောင်းသားမိဘတွေကို အစည်းအဝေးခေါ်ယူကာ စာမေးပွဲကို မဖြစ်မနေ လာရောက်ဖြေရမယ်ဆိုပြီး ပြောဆိုထားတာတွေရှိတယ်လို့ မာအောင်မြို့ပေါ်ရပ်ကွက်က ကျောင်းသားမိဘတစ်ဦးက CNA ကိုပြောပါတယ်။
“ဒီမှာတော့ တိုက်ပွဲဖြစ်တာ မရှိဘူး။ ကျမတို့ကိုမတ်လ ၁ ရက်နေ့က ကျောင်းသားမိဘအစည်းအဝေးဆိုပြီးခေါ်တွေ့တယ် ကျောင်းသားတွေစာမေးပွဲကို မပျက်မကွက်လာဖြေကြဖို့ဆိုပြီးတော့ ပြောတယ်။ တဖက်ကတော့ စာမေးဖြေတာကတော့ ကောင်းပါတယ်။ဒါပေမယ့် အခုက အရင်ကလို ပုံမှန်အနေအထားမဟုတ်တော့ ဘယ်သူကမှလည်း စိတ်မချတဲ့ အနေအ ထား ပြီးတော့ ဒီနှစ်က စာသင်ရက်တွေကလည်းနည်းတယ်။ ကျောင်းသားတွေကရောက် ဆရာမတွေ မရောက် ပြီးတော့ ကျောင်းလာပြဖို့ အစိုးရပေးတဲ့ လစာမလောက်လို့ မလာနိုင်ဘူးဆိုတာကတမျိုး နဲ့ ဘယ်လိုတွေ ဖြစ်လာမယ်ဆိုတာကိုတော့မသိဘူး။သူ့အခြေအနေကို ကိုယ်ကြည့် ကိုယ့် အခြေအနေသူကြည့် ဖြစ်နေတယ် အနေအ ထားက“လို့ သူကပြောပါတယ်။
စစ်ကောင်စီရဲ့ ပညာရေးဝန်ကြီးဌာနက တော့ ဒီနှစ် တက္ကသိုလ်ဝင်ခွင့်စာမေးပွဲဖြေဆိုဖို့ အတွက် သူတို့ထိန်ချုပ်ထားဆဲ စစ်တွေ ၊မာန်အောင် နဲ့ ကျောက်ဖြူမြို့တွေမှာ တက္က သိုလ်ဝင်ခွင့်အတွက် ကျောင်းတွင်းက ဖြေဆိုဖို့တင်ထားသူ ဦးရေ ၁၄၉၂ ဦး ကျောင်းပြင်ပကနေ ဖြေဆိုဖို့အတွက် လျှောက်လွှာတင်ထားသူဦးရေ ၆၀၅ ဦး ရှိတယ်လို့ထုတ်ပြန်ထားပါတယ်။
စစ်တွေမြို့ဒေသခံတစ်ဦးက အခုလို စစ်ကောင်စီတပ်တွေ နဲ့ အာရက္ခတပ်တော်တို့ နှစ်ဖက်တိုက်ပွဲ ရှိနေချိန်စစ်ကောင်စီက တက္ကသိုလ်ဝင်ခွင့်စာမေးပွဲဖြေဆိုဖို့ ပြင်ဆင်တဲ့အပေါ်မှာ “သူတို့ သားသမီးတွေတောင် ဒီမှာမရှိတော့တာ ဘာစာမေးပွဲကို ဖြေမှာလည်း ဘာစာကို ကျက်ပြီးဘာနဲ့ဖြေမှာလည်း တနေ့တနေ့ စားဖို့သောက်ဖို့ စေ◌ျးသွားမယ့်ကိစ္စတောင် သူတို့တပ်တွေ ရှိလားကြည့်နေရတာ ။ ခဏနေရင် ဒီက ပစ်ဟိုကပစ်နဲ့ ။ ဘာမှမဟုတ်ဘူး ဘယ်ကျောင်းသားမှလည်း သွားမှာမဟုတ်ဘူး ကျောင်းတွေ ပိတ်တာလည်းကြာပြီ ပေါက်ကရတွေ ပြောနေတာသာဖြစ်တယ်”လို့ သူကဆိုပါတယ်။
စစ်ကောင်စီကတော့ ဒီနှစ် ၂၀၂၄-၂၀၂၅ ခုနှစ် စာမေးပွဲကို အခုလာမယ့် မတ်လ ၁၇ ရက်နေ့မှာ စစ်တွေမြို့မှာ စာစစ်ဌာန (၄) ခု၊ ကျောက်ဖြူမြို့မှာ စာစစ်ဌာန (၂) ခု နဲ့ မာန်အောင်မြို့မှာ စာစစ်ဌာန (၂) ခု ဖွင့်လှစ်ကာ ကျင်းပနိုင်ဖို့ အတွက် ပြင်ဆင်ထားတယ်လို့ လည်း ထုတ်ပြန်ပြောဆိုထားပါတယ်။
