CNA ၊ မြတ်သူ။
အာရက္ခတပ်တော်က အပြီးသတ်သိမ်းပိုက်ထားပြီးဖြစ်တဲ့ တောင်ကုတ် နဲ့ သံတွဲ မြို့တွေမှာ နေအိမ်ဖောက်ထွင်းခိုးယူမှုတွေကို လက်ရှိအချိန်ထိ အာရက္ခတပ်တော်က မနှိမ်နင်းနိုင်သေးဘူးလို့ ဒေသခံတွေက ဆိုကြပါတယ်။
အာရက္ခတပ်တော်ဟာ တောင်ကုတ် နဲ့ သံတွဲ မြို့တွေကို ပြီးခဲ့တဲ့ ၂၀၂၄ ခုနှစ် ဒီဇင်ဘာလကတည်းကပင် အပြီးသတ်သိမ်းပိုက်ထားနိုင်ခဲ့ပြီး ဖြစ်ပါတယ်။
အဲဒီနောက် မြို့ပေါ်ရပ်ကွက်က ပြည်သူတွေ ရဲ့ နေအိမ် နဲ့ ကျေးရွာအတွင်းက ပြည်သူတွေရဲ့ နေအိမ်တွေကို ဆက်တိုက်ဖောက်ထွင်းခိုးယူတာတွေ ရှိနေခဲ့ပြီး အဲဒီလို ဖောက်ထွင်းခိုးယူတာတွေကို လက်ရှိအချိန်ထိ အာရက္ခတပ်တော်က ဖမ်းဆီးနှိမ်နင်းတာတွေ မလုပ်ဆောင်နိုင်သေးဘူးလို့ သံတွဲ မြို့ခံတစ်ဦးက CNA ကို ပြောပါတယ်။
“သူခိုးအခြေအနေက အခုမှ သူခိုးတွေက ကားတွေ နဲ့ပြောင်းနေတုန်းရှိသေးတယ်။ဘာမှ မနှိမ်နင်းနိုင်သေးဘူး ပြည်သူတွေကလည်း မြို့ကို ဝင်ရောက်နေထိုင်ခွင့် ရမှုကနည်းသေးတယ် အိမ်တော်တော်များများကတော့ အခွန်အနေအထားပဲ ရှိတော့တယ်။ပန်းကန်၊ထိုင်ခုံ၊အိမ်တံခါးက အစ အကုန်ဖြုတ်ယူကြတာ။ကုန်ကုန်ပြောရရင်ဗျာ ဘုန်းကြီးကျောင်းမှာ ရှိတာကအစ အကုန်ခိုးနေတာ။ကျနော်တို့ အနေ နဲ့ ဘယ်သူတွေပါလို့ ပြောရင်လည်း ကိုယ့်အသားကို သူကိုင်ကိုယ်ကိုင်ပြီးလိမ်ဆွဲ သလို သူလည်းနာ ကိုလည်းနာပဲ ရှိတဲ့ အနေအထားမှာပဲ ရှိတယ်”လို့ သူကပြောပါတယ်။
အဲဒီလိုပဲ တောင်ကုတ်မြို့တစ်ခုလုံးက နေအိမ်တွေမှာလည်း အိုးခွက် ပန်းကန်း တွေနဲ့ အိမ်တံခါးတွေက အစ ဖြုတ်ယူခိုးယူတာတွေ ရှိပြီး ဒီခိုးမှုတွေ အကုန်လုံးဟာ အာရက္ခတပ်တော်ကို မြို့ကို ထိန်းချုပ်ပြီး ပြည်သူတွေကို ကယ်ထုတ်ပြီးနောက်ပိုင်းမှာမှ အခုလိုတွေ နေအိမ်တွေကို ဖောက်ထွင်းခိုးယူခံရတာ များတယ်လို့ တောင်ကုတ်ဒေသခံ တစ်ဦးက ပြောပါတယ်။
“အခုပျောက်တာတွေ ခိုးခံနေရတာတွေ အကုန်လုံးက စကစတွေ ရှိတဲ့ အချိန်တုန်းက ခိုးခံရတာမဟုတ်တော့ဘူး မြို့ပေါ်က လူတွေကို ကယ်ထုတ်ပြီးမှ ခိုးခံရတာတွေ။စကစတွေ ကလည်း ခိုးတော့ခိုးတယ် ဒီလောက်မခိုးနိုင်ခဲ့တာတော့ သေချာတယ်။သူတို့ခိုးရင် ရွှေငွေတွေလောက်သာ ခိုးနိုင်ခဲ့တာ။ရှင်းရှင်းပြောရရင် စကစတွေက တပ်တော်ဝင်လာပြီဆိုတာ နဲ့ တန်းပြီးပြေးပေါက်ကို ရှာနေရတဲ့ သဘောမှာ ရှိခဲ့တယ် တောင်ကုတ်မှာက အခုက အိမ်တံခါးတွေကိုလည်း ဖြုတ်ခိုးခံရ၊အိုးခွက်တွေ၊မွှေ့ယာတွေက အစခိုးတာအခုဟာက”လို့ သူကပြောပါတယ်။
အခုလို မိမိတို့ လူမျိုးလက်ထဲမှာ ရှိချိန် ကျန်နေခဲ့တဲ့ အိမ်တွင်းပစ္စည်းတွေ လုံခြုံမှု မရှိပဲ ပျောက်ဆုံးနေရတဲ့ အပေါ်မှာ ဒေသခံတွေ အနေ နဲ့အထူးစိတ်မကောင်းဖြစ်ရတယ်လို့ လည်း ဒေသခံတွေက ဆိုကြပါတယ်။ အခုလို ဖြစ်ပျက်နေတာတွေကို အာရက္ခတပ်တော် ရဲ့ နယ်မြေတာတန်ခံတွေ အနေ နဲ့ မြင်တွေ့တာတွေ ရှိနေပေမယ့် မမြင်မျက်ကွယ်ပြုကာ ဖြေရှင်းမပေးတာတွေရှိနေတာ ဖြစ်တယ်လို့ လည်းဆိုပါတယ်။
အာရက္ခတပ်တော် နဲ့ နီးစပ်သူ သံတွဲမြို့ခံတစ်ဦးပြောပြတာက“ကျနော်တို့ သိသလောက်ကတော့ ဖမ်းတာတွေ တော့ ရှိတယ် သူခိုးတွေက ဖမ်းထားတယ် ဒါပေမယ့် အဓိက လူတွေကို ဖမ်းတာတော့မဟုတ်ဘူး ဒီခိုးနေတာတွေကို ဘယ်သူတွေက ဘယ်လိုညွန်ကြားချက်နဲ့ လုပ်နေတယ်ဆိုတာကိုကျနော်တို့သိတယ် ဒါပေမယ့် ပြောဖို့ မကောင်းလို့ မပြောတာသာဖြစ်တယ်။ခိုးတာကတော့ နေအိမ်တိုင်းလိုလို ခိုးခံရတာ ဖြစ်တယ်”လို့ သူကပြောပါတယ်။
ဒီလိုလက်ရှိအချိန်ထိ ခိုးမှုတွေ ဖြစ်ပွါးနေရတဲ့ အထဲမှာ ဒေသအတွင်းမှာ ရှိနေတဲ့ နယ်မြေတာဝန်ခံတချို့ နဲ့ ဆက်စပ်မှု ရှိနေတဲ့ အတွက် ဒီဖြစ်ရပ်ကို အာရက္ခတပ်တော်ရဲ့ အကြီးပိုင်းတွေ အနေ နဲ့ သေချာကိုင်တွေ ဖြေရှင်းတာတွေ ကိုလုပ်ဆောင်းပေးဖို့ လိုအပ်နေတယ်လို့ ဒေသခံတွေက ဆိုကြပါတယ်။
လက်ရှိ သံတွဲ နဲ့ တောင်ကုတ်မြို့တွေမှာတော့ အာရက္ခတပ်တော်က ဒေသခံ ပြည်သူတချို့ကိုတော့ နေရပ်ပြန်ဝင်ခွင့်ပြုကာ နေထိုင်ခွင့်ပေးနေတာလည်း ရှိနေပြီးဖြစ်ပါတယ်။
