CNA ၊လင်းလင်း။
အာရက္ခတပ်တော်က အပြီးသတ်သိမ်းပိုက်ထားရှိပြီးဖြစ်တဲ့ ပုဏ္ဏားကျွန်းမြို့ကို စစ်ကောင်စီက ဂျက်ဖိုက်တာ တစ်စီး နဲ့ ပေါင် ၅၀၀ ဗုံးနဲ့ကြဲချတိုက်ခိုက်ခဲ့တဲ့ အတွက် အရပ်သားပြည်သူ နေအိမ် ၅ ဆောင်ထက်မနည်း ပျက်စီးသွားခဲ့ရတယ်လို့ ပုဏ္ဏားကျွန်းမြို့ဒေသခံတွေက CNA ကို ပြောပါတယ်။
အဲဒီလို ဗုံးကြဲတိုက်ခိုက်တာကို စစ်ကောင်စီဟာ ပြီးခဲ့တဲ့ မတ်လ ၁၁ ရက်နေ့ နေ့လယ် ၂ နာရီဝန်းကျင်မှာ လုပ်ဆောင်ခဲ့တာ ဖြစ်ပြီးတဲ့ စစ်ကောင်စီကြဲချတိုက်ခိုက်ခဲ့တဲ့ ပေါင် ၅၀၀ ဗုံးသီးဟာ ပုဏ္ဏားကျွန်း မြို့နယ်အတွင်းမှာရှိတဲ့ ကွမ်းတောင်ကျေးရွာထဲကို ကျရောက်ပေါက်ကွဲပြီးတော့ အရပ်သားပြည်သူ နေအိမ် ၅ ဆောင်ထက်မနည်း မီးလောင်ပျက်စီးခဲ့ရတာ ဖြစ်တယ်လို့ ပုဏ္ဏားကျွန်းဒေသခံ တစ်ဦးက ပြောပါတယ်။
“လူတွေ ထိခိုက်တာတော့မရှိဘူး အဲဒီကျေးရွာမှာက ပြည်သူတွေ မနေကြသေးဘူး။အာရက္ခပြည်သူ့အစိုးရက ပြန်ဝင်နေထိုင်ခွင့်မပေးသေးတာ စစ်ကောင်စီက ခဏခဏ လေကြောင်းဗုံးကြဲတာကို လုပ်နေလို့ နေအိမ်ကတော့ ၅ ဆောင်ကျော်ကျော် မီးလောင် ပျက်စီးသွားတာ ရှိတယ်လို့သိထားရတယ်”လို့ သူကပြောပါတယ်။
ဒါ့အပြင် စစ်တွေမြို့ အခြေစိုက် ခလရ ၂၃၂ တပ်ရင်းကလည်း မတ်လ ၁၁ ရက်နေ့မှာ လက်နက်ကြီးတွေ နဲ့ ပစ်ခတ်တိုက်ခိုက်ခဲ့တာရှိပြီး ဦးရာဇ်တောင် တောင်ခြေရင်းက လယ်ကွင်းပြင်ကို ဗုံး ၄ လုံးအထိကျရောက်ပေါက်ကွဲ ခဲ့တာ ရှိတယ်လို့လည်း အဲဒီ ဒေသခံ က ဆက်လက်ပြောဆိုပါတယ်။
စစ်ကောင်စီက အဲဒီလို ပုဏ္ဏားကျွန်းမြို့နယ်အတွင်းကို လေကြောင်းတိုက်ခိုက်တာ လက်နက်ကြီးတွေ နဲ့ ပစ်ခတ်တာတွေကို လုပ်ဆောင်ပြီးနောက် စစ်တွေ မြို့မှာ ရှိနေတဲ့ စစ်ကောင်စီတပ်ရင်းတွေကိုလည်း အာရက္ခတပ်တော်က လက်နက်ကြီးတွေ နဲ့ ပြန်လည်ပစ်ခတ်တိုက်ခိုက်တာတွေ ရှိခဲ့တယ်လို့လည်း စစ်တွေမြို့ခံတွေက ဆိုပါတယ်။
စစ်တွေဒေသခံတစ်ဦးက “မနေ့က စစ်ကောင်စီက ပုဏ္ဏားကျွန်းကို ပစ်ခတ်တာလုပ်ပြီး ဘယ်လောက်မှ မကြာဘူး ရေချမ်းပြင် နဲ့ ပါဒလိပ်က စစ်ကောင်စီတပ်စခန်းတွေကို လက်နက်ကြီးတွေ နဲ့ ပစ်ခတ်တာရှိတယ်။ နှစ်ဖက်အပြန်အလှန်ပစ်ခတ်တာ ည ၉နာရီလောက်ထိ ပစ်ခတ်တာတွေ ရှိခဲ့တယ် ထိခိုက်မှုရှိမရှိတော့ မသိဘူး သွားကြည့်လို့ ရတာမှမဟုတ်တာ”လို့သူကဆိုပါတယ်။
အာရက္ခတပ်တော်ဟာ ပုဏ္ဏားကျွန်းမြို့တစ်ခုလုံးကို ပြီးခဲ့တဲ့ ၂၀၂၄ ခုနှစ် မတ်လ ၄ရက်နေ့ကပင် အပြီးသတ် သိမ်းပိုက်ရရှိခဲ့ပြီးဖြစ်သလို ရခိုင်တကျော့ပြန်တိုက်ပွဲ တစ်နှစ်ကျော်အတွင်းမှာ ရခိုင်က မြို့နယ် ၁၄ ခု နဲ့ ပလက်ဝဒေသကိုပါ အပြီးသတ်သိမ်းပိုက်ရရှိထားပြီးဖြစ်ပါတယ်။
အဲဒီနောက် သိမ်းပိုက်ဖို့ ကျန်ရှိနေသေးတဲ့ စစ်တွေ၊ကျောက်ဖြူ နဲ့ မာန်အောင်မြို့တွေကို အာရက္ခတပ်တော်က ဆက်လက် ထိုးစစ်ဆင်တိုက်ခိုက်တာတွေကို လုပ်ဆောင်နေတာတွေ ရှိနေပြီး လက်ရှိ စစ်တွေ နဲ့ ကျောက်ဖြူမြို့တွေမှာ အာရက္ခတပ်တော် နဲ့ စစ်ကောင်စီတို့ဟာ နေ့စဉ်လိုလို တိုက်ပွဲတွေ ဆက်တိုက်ဖြစ်ပွါးနေတာလည်း ရှိနေပါတယ်။
