စစ်ကောင်စီနဲ့ ရုရှားတို့ ပူးပေါင်းအကောင်အထည်ဖော်မယ့် ထားဝယ်အထူးစီးပွားရေးဇုန် စီမံကိန်းကို ရှုတ်ချကြောင်း တနင်္သာရီဒေသ အရပ်ဖက်အဖွဲ့အစည်းတွေနဲ့နိုင်ငံရေးအင်အားစုတွေက သဘောထားထုတ်ပြန်လာပါတယ်။
MAGGA Initiative – MI၊ Tenasserim River and Indigenous People’s Network၊ Youth Development Institute (YDI)၊ ဒေါနတနင်္သာရီ – စစ်ဘေးရှောင်များ အထောက်အကူပြုရေးအဖွဲ့၊ Tavoyan Women’s Union၊ Green Network (Mergui Archipelago) ၊ The Mergui 88 Generation Peace & Open Society၊ Tanintharyi Youth Network (TYN)၊ Human Rights Defenders and Promoters၊ မြိတ်ခရိုင် နိုင်ငံရေးအင်အားစုနဲ့ ထားဝယ်ခရိုင် နိုင်ငံရေးဦးဆောင်အဖွဲ့တို့က ရှုတ်ချကြောင်းထုတ်ပြန်လာတာဖြစ်ပြီး သဘောထား (၄)ချက်ကိုပါ ထုတ်ပြန်ချက်မှာ ဖော်ပြထားပါတယ်။
ပထအချက်အနေနဲ့ ထားဝယ်အထူးစီးပွားရေးဇုန် စီမံကိန်းဟာ ပြည်သူလူထုကို အတင်းအကျပ်နေရပ်ရွှေ့ပြောင်းမှုနဲ့ လူ့အခွင့်အရေး ချိုးဖောက်မှုတွေကို ပိုမိုတိုးမြင့်လာစေနိုင်တဲ့အတွက် အဲ့ဒီ ဖွံ့ဖြိုးရေးအမည်ခံ စီမံကိန်းကို လုံးဝလက်မခံဘူးလို့ ဆိုပါတယ်။
ထားဝယ်အထူးစီးပွားရေးဇုန် စီမံကိန်းဟာ ခေတ်အဆက်ဆက် အစိုးရလက်ထက်မှာ ဒေသခံ ဌာနေတိုင်းရင်းသားတွေနဲ့ လူမျိုးစုတွေရဲ့ အခွင့်အရေးတွေကို ချိုးဖောက်ခြင်း၊ အတင်းအဓမ္မရွေ့ပြောင်းစေခြင်းနဲ့ တရားမျှတတဲ့ လျော်ကြေးပေးဆောင်မှုမရှိခြင်းစတဲ့လူအခွင့်အရေးချိုးဖောက်မှုတွေ၊ နဘုလယ်ဒေသ ယဉ်ကျေးမှုနဲ့ ဓလေ့ထုံးတမ်းဆိုင်ရာ သမိုင်းအထောက်အထားတွေကို ပျက်စီးဆုံးရှုံးခြင်းတွေ ဖြစ်ပေါ်စေခဲ့တယ်လို့ အသိပေးထားပါတယ်။
ဒုတိယအချက်အနေနဲ့ ကျောက်မီးသွေးသုံးလျှပ်စစ်ဓါတ်အားပေး စက်ရုံ၊ ရေနံချက်စက်ရုံနဲ့ အခြားသော သဘာဝပတ်ဝန်းကျင်နဲ့ လူမှုအသိုက်အဝန်းကို ဆိုးရွားစွာညစ်ညမ်းမှုဖြစ်စေတဲ့ စက်ရုံတွေဟာ ထားဝယ်ဒေသရဲ့ ပထဝီအနေအထား ရေမြေ၊ တောတောင်နဲ့ လူမှုပတ်ဝန်းကျင် သဟဇာတဖြစ်မှုကို သွေဖယ်လျက်ရှိတယ်လို့ ဆိုပါတယ်။
ထားဝယ်သူ/သားတွေဟာ သဘာဝပတ်ဝန်းကျင်ကပေးတဲ့ အရင်းအမြစ်တွေနဲ့ အသက်မွေးဝမ်းကြောင်းပြုခြင်း၊ တောတောင်ရေမြေနဲ့ ကိုင်းကျွန်းမှီ ကျွန်းကိုင်းမှီ ဆက်နွယ်နေထိုင်သူတွေဖြစ်တဲ့အတွက် ညစ်ညမ်းတဲ့ စီမံကိန်းတွေ ထားဝယ်ဒေသမှာ မတည်ဆောက်သင့်ဘူးလို့ ဖော်ပြထားပါတယ်။
တတိယအချက်အနေနဲ့ ထားဝယ်ဒေသရဲ့ ဖွံ့ဖြိုးရေးကို ထားဝယ်သူ/သားတွေကိုယ်တိုင်ဆုံးဖြတ်မှာဖြစ်ပြီး ဖက်ဒရယ်ဒီမိုကရေစီနည်းကျ ဒီမိုကရေစီစံနှုန်းတွေနဲ့ အညီတင်မြှောက်ထားတဲ့ အစိုးရကသာ ထားဝယ်ဒေသရဲ့ ဖွံ့ဖြိုးရေးစီမံကိန်းတွေကို ဆုံးဖြတ်ပိုင်ခွင့်ရှိမယ်လို့ ဆိုပါတယ်။
နောက်ဆုံး စတုတ္ထအချက်အနေနဲ့ကတော့တရားမဝင် အာဏာသိမ်းဖို့ကြိုးပမ်းတဲ့ စစ်ကောင်စီနဲ့ စီမံကိန်းတွေလုပ်ဆောင်တာဟာ တရားမဝင်တဲ့အပြင် ဒေသခံပြည်သူတွေရဲ့လူ့အခွင့်အရေး၊ သဘာဝပတ်ဝန်းကျင်၊ ယဉ်ကျေးမှုဆိုင်ရာနဲ့ သက်မွေးဝမ်းကျောင်းလုပ်ငန်းတွေကို ကြီးမားတဲ့ ဆိုးကျိုးသက်ရောက်မှုတွေ မလွဲဧကန် ခြိမ်းခြောက်လာလိမ့်မယ်လို့လည်း ဒေသတွင်းအဖွဲ့အစည်းတွေက အသိပေးထားပါတယ်။
ပြီးခဲ့တဲ့ ဖေဖော်ဝါရီလ ၂၄ရက်နေ့တုန်းက စစ်ကောင်စီနဲ့ ရုရှားတို့ဟာ အထူးစီးပွားရေးဇုန် ရင်းနှီးတည်ဆောက်ရေးအတွက် နားလည်မှုစာချွန်လွှာ (MoU) လက်မှတ်ရေးထိုးခဲ့တာလည်းဖြစ်ပါတယ်။
စတုရန်းကီလိုမီတာ (၁၉၀)ကျော် ကျယ်ဝန်းတဲ့ ထားဝယ်အထူးစီးပွားရေးဇုန် စီမံကိန်းမှာရေနက်ဆိပ်ကမ်း၊ ကျောက်မီးသွေးသုံးလျှပ်စစ်ဓါတ်အားပေးစက်ရုံ၊ ရေနံချက်စက်ရုံ၊ ရေနံဓာတုစက်ရုံနဲ့ အခြားသော ညစ်ညမ်း စက်ရုံများစွာအပြင် စက်မှုဇုန် စီမံကိန်းတွေ၊ ရေကာတာ၊ မြန်မာ-ထိုင်း နယ်စပ်ကို ဆက်သွယ်ထားမယ့် အဝေးပြေးကားလမ်းနဲ့ မီးရထားလမ်းတို့ ပါရှိတယ်လို့ သိရပါတယ်။
