ရခိုင်မှာ ဇန်နဝါရီလ ၁ ရက်နေ့မှ မတ်လ ၁၁ ရက်နေ့အထိ နှစ်လကျော်အတွင်းစစ်ကောင်စီက လေကြောင်းတိုက်ခိုက်ခဲ့လို့ အရပ်သား ၄၀ ကျော်သေဆုံးခဲ့ရတယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP က မတ်လ ၁၁ ရက်နေ့မှာ သတင်းထုတ်ပြန်ထားပါတယ်။
သေဆုံးသူတွေထဲမှာ အမျိုးသမီး (၂၄) ဦး နဲ့ အမျိုးသား (၂၁) ဦး စုစုပေါင်း (၄၅) ဦး သေဆုံးခဲ့တာကို AAPP အနေနဲ့ အမည်နဲ့ တကွအတည်ပြုနိုင်ခဲ့တာဖြစ်ပြီး ဒီသေဆုံးတဲ့သူ ၄၅ ဦးထဲမှာ အသက် ၂ နှစ်အရွယ်ယောကျာ်းလေးတစ်ဦးအပါအဝင် အသက် ၁၈ နှစ်အောက်ကလေးငယ် (၁၂) ဦး ပါဝင်ခဲ့တာဖြစ်ပြီးတော့ သေဆုံးသူ ၄၅ ဦးထဲက လူ (၄၀) မှာ စစ်အုပ်စုရဲ့ လေကြောင်းနဲ့ ပစ်ခတ်တိုက်ခိုက်မှုကြောင့် အများဆုံးသေဆုံးခဲ့ရတာဖြစ်တယ်လို့ထုတ်ပြန်ချက်မှာ ဖော်ပြထားပါတယ်။
စစ်ကောင်စီဟာ ပြီးခဲ့တဲ့ မတ်လ ၉ ရက်နေ့၊ မနက် ၁ နာရီကျော်လောက်မှာ ဂွမြို့နယ် အတွင်းက ဘဝင်ကျေးရွာကို လေကြောင်းကနေ ဗုံးကြဲတိုက်ခိုက်ခဲ့တဲ့ အတွက် ဦးထွန်းအောင်သိန်းမှာ ဗုံးစထိမှန်ပြီးတော့ နေရာမှာ ပွဲချင်းပြီး သေဆုံးခဲ့ရသလို သားဖြစ်သူ နဲ့ သမီးဖြစ်သူတွေဟာလည်း အပြင်းအထန် ဒဏ်ရာ ရရှိခဲ့ရပြီးဆေးကုသမှုတွေဆောင်ရွက်နေကြရပါတယ်။
AAPP အနေ နဲ့ လက်ရှိဖော်ပြထားတဲ့ ကိန်းဂဏန်းအရေအတွက်ဟာ အေအေပီပီ က လက်လှမ်းမီသမျှ ကောက်ယူရရှိထားတဲ့ အရေအတွက်သာ ဖြစ်ပြီးတော့ မြေပြင်မှာ ဖြစ်ပွားနေတဲ့အချက်အလက်တွေဟာ အခုထက် ပိုမိုများပြားနိုင်ပြီးတော့ နောက်ထပ် အချက်အလက်တွေကို ထပ်မံကောက်ယူရရှိပြီးတော့ အတည်ပြုနိုင်ခဲ့ရင်လည်း ဆက်လက် ထည့်သွင်းဖော်ပြသွားမှာဖြစ်တယ်လို့ ဆိုထားပါတယ်။
မြန်မာနိုင်ငံအတွင်းမှာ စစ်ကောင်စီက မတရားအာဏာသိမ်းယူခဲ့တဲ့ ၂၀၂၁ ခုနှစ် ဖေဖော်ဝါရီလ ၁ ရက်နေ့ကနေ ၂၀၂၅ခုနှစ် မတ်လ ၁၁ ရက်နေ့အထိ အကြမ်းဖက်စစ်အုပ်စုနှင့် စစ်အုပ်စဒရဲ့လက်ပါးတွေကြောင့် နွေဦးတော်လှန်ရေးကာလအတွင်း ဒီမိုကရေစီရေး လှုပ်ရှားရင်း သေဆုံးသွားခဲ့ ရတဲ့ ပြည်သူစုစုပေါင်းဟာ (၆၃၉၉) ဦးထိရှိခဲ့ပြီးဖြစ်တယ်လို့ AAPP ရဲ့ စာရင်းတွေ အရ သိရပါတယ်။
ဒါ့အပြင် မတရားအာဏာသိမ်းမှု ဖြစ်စဉ်နဲ့ ဆက်စပ်ပြီးတော့ ဖမ်းဆီးခံခဲ့ရသူ စုစုပေါင်းဟာလည်း လူဦးရေ (၂၈၈၀၀) ရှိပြီး အဲဒီထဲက (၂၂၀၂၁) ဦးမှာ ထိန်းသိမ်းခံနေရဆဲဖြစ်ပြီးတော့ (၁၀၅၈၂) ဦးမှာတော့ ထောင်ဒဏ်ချမှတ်ခံထားရတယ်လို့ သိရပါတယ်။
