CNA ၊လင်းလင်း။
ပဲခူးတိုင်း အထဲကညောင်ကျိုး စခန်းသိမ်းတိုက်ပွဲ ဟာ ဒီနေ့ မနက်ပိုင်းထိ နှစ်ဖက်တိုက်ပွဲတွေ ဆက်လက်ပြင်းထန်နေဆဲဖြစ်တယ်လို့ အာရက္ခတပ်တော် နဲ့ နီးစပ်တဲ့ စစ်ရေး သတင်းရင်းမြစ်တွေက ပြောပါတယ်။
အာရက္ခတပ်တော် နဲ့ ပူးပေါင်းတပ်တွေဟာ ပဲခူးတိုင်းက တောင်ပုံကြီးစခန်း၊ ပန်းကန်ကွဲစခန်း အပါအဝင် တပ်စခန်း ၄ ခုထက် မနည်းကို သိမ်းပိုက်လိုက်ပြီးတဲ့ နောက်မှာ အဲဒီညောင်ကျိုး စခန်းသိမ်းတိုက်ပွဲကို ဆက်လက်ဆင်နွဲနေတာ ဖြစ်ပြီးတော့ စစ်ကောင်စီကလည်း အဲဒီတပ်စခန်းမကျရှုံးစေရေး အတွက်အပြင်းအထန်ခုခံတိုက်ခိုက်နေပြီးတော့ ဒီနေ့မနက်ပိုင်းအထိ တိုက်ပွဲတွေ ဆက်လက်ပြင်းထန်နေဆဲ ဖြစ်တယ်လို့ အာရက္ခတပ်တော် ရဲ့ ခိုင်လုံတဲ့ သတင်းရင်းမြစ်က ပြောပါတယ်။
“တိုက်ပွဲက ဆက်လက်ပြင်းထန်နေဆဲပဲ ရှိပါတယ်။စစ်ကောင်စီကလည်း အင်အားတွေ ဖြည့်တင်းပြီးတော့ ခုခံနေတယ်။စက်တပ်လေထီးတွေ ဒရုန်းတွေ ပြီးတော့ လေကြောင်းပစ်ကူတွေ နဲ့အပြင်းအထန် ခုခံတိုက်ခိုက်နေတယ်”လို့ သူကပြောပါတယ်။
အာရက္ခတပ်တော်ဟာ တောင်ကုတ်မြို့ကို အပြီးသတ်သိမ်းပိုက်ပြီးနောက်မှာ ပဲခူးတိုင်းရဲ့ အနောက်ဘက်ခြမ်းမှာ ရှိတဲ့ စစ်ကောင်စီရဲ့ တပ်စခန်းတွေ နဲ့ ကပစ စက်ရုံတွေကို ဦးတည် တိုက်ခိုက်လာနေတာလည်း ဖြစ်ပြီးတော့ စစ်ကောင်စီကလည်း သူတို့ တပ်စခန်းတွေ အကျရှုံးစေရေးအတွက် အပြင်းအထန်ခုခံတိုက်ခိုက်တာတွေကို လုပ်ဆောင်နေပေမယ့် တပ်စခန်းတစ်ခုပြီးတစ်ခုကို အာရက္ခတပ်တော် နဲ့ ပူးပေါင်းတပ်တွေကထိုးစစ်ဆင်သိမ်းပိုက်လာနေတာလည်း ဖြစ်ပါတယ်။
လက်ရှိထိုးစစ်ဆင်တိုက်ခိုက်နေတဲ့ ညောင်ကျိုးတပ်စခန်းဟာလည်း အာရက္ခတပ်တော် နဲ့ ပူးပေါင်းတပ်တွေ ထိုးစစ်ဆင်မတိုက်ခိုက်ခင်ကတည်းကပင် လက်နက်ကြီးတွေ တပ်ဆင်ကာ အခိုင်အမာတည်ဆောက်တာတွေကို လုပ်ဆောင်ထားတဲ့ တပ်စခန်းဖြစ်ပြီးတော့ လက်ရှိတိုက်ပွဲ ကာလအတွင်းမှာ ဒီတပ်စခစန်းကို လက်မလွတ်ရစေရေးအတွက် စစ်ကောင်စီ ရဲ့ မှော်ဘီအခြေစိုက်ခြေမြန်တပ်ရင်းတွေ ဖြစ်ကြတဲ့ ခမရ ၇၀၃ ၊ ခမရ ၇၀၁၊ ခမရ ၃၁၃ နဲ့ ခမရ ၇၀၂ တပ်ရင်းတွေက စစ်အင်အားတွေ ဖြည့်တင်းတာတွေကိုလည်း ဆက်တိုက်လုပ်ဆောင်ပေးနေတာ တွေ ရှိနေတယ်လို့ အဲဒီစစ်ရေး သတင်းရင်းမြစ်ကထပ်မံပြောဆိုပါတယ်။
“ဒီစခန်းက စစ်ကောင်စီက သေသေချာချာ အခိုင်အမာတည်ဆောက်ထားတဲ့ စခန်းဖြစ်နေတယ်။တောင်ပုံကြီးစခန်း၊ ပန်းကန်ကွဲစခန်း ကတပ်ဆုတ်ထွက်ပြေးလာတဲ့ စစ်ကောင်စီတပ်တွေကလည်း ဒီမှာလာပြီးတော့ ပူးပေါင်းခုခံနေတယ် ပြီးတော့ မှော်ဘီကလည်း စစ်အင်အားဖြည့်တင်းတာတွေကို စစ်ကောင်စီက ဆက်တိုက်လုပ်လို့ရနေတယ်။အဲဒီလိုသာ စစ်အင်အား ဖြည့်တင်းမရဘူးဆိုရင် ပြတ်တာကြာလှပြီ အခုက လေးဘက်လေးလံက အကုန် စုခံပြီးတော့ တိုက်လို့ ရနေလို့ နည်းနည်း ကြာနေတာပေါ့”လို့သူကဆိုပါတယ်။
လက်ရှိထိုးစစ်ဆင်တိုက်ခိုက်ခံနေရတဲ့ ညောင်ကျိုးတပ်စခန်းဟာ ညောင်ခြေထောက်မှာ ရှိတဲ့ စစ်ကောင်စီ ရဲ့ အမှတ် ၆ ကာကွယ်ရေးပစ္စည်းထုတ်စက်ရုံ (ကပစ-၆) နဲ့ ၁၁ မိုင်ခန့် အကွာမှာရှိနေတဲ့ စခန်းတစ်ခုဖြစ်ပြီးတော့ ညောင်ကျိုးစခန်း ကျသွားခဲ့ရင် ကပစ စက်ရုံကို ကာကွယ်နိုင်ဖို့ အတွက် လတ်တလော စစ်သင်တန်းပေးထားတဲ့ စစ်မှုထမ်း အပတ်စဉ် ၈ က သင်တန်းဆင်း တပ်ဖွဲ့ဝင် ၆၀၀ ကျော်လောက်ကို ပို့ဆောင်ကာ စစ်ရေး အတွက် အခိုင်အမာ ပြင်ဆင်နေတာတွေကိုလည်း စစ်ကောင်စီက ဆက်တိုက်လုပ်ဆောင်နေတယ်လို့ ဒေသသတင်းရင်းမြစ်တွေက ပြောပါတယ်။
ပဲခူးတိုင်းအထဲမှာ အမှတ် ၆ ကာကွယ်ရေးပစ္စည်းထုတ်စက်ရုံ (ကပစ-၆) အပါအဝင် ကမြိုင် ကပစ-၅ ၊ ကျောက်ဖူး ကပစ-၉ ၊ မသုန် ကပစ-၁၆ နဲ့ ပြည်မြို့တဘက်ခြမ်းမှာ ရှိတဲ့ ဆင်တဲ ကပစ-၃ တို့ ရှိတယ်လို့လည်း သိရပါတယ်။
