အကျဉ်းထောင်တွေက အကျဉ်းသားတွေကို စစ်ကောင်စီက တော်လှန်ရေးတပ်တွေနဲ့ ခုခံတိုက်ခိုက်ရာမှာ အသုံးပြုနေတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်(PPNM)က ထုတ်ပြန်လာပါတယ်။
PPNMအနေနဲ့ စစ်ကောင်စီက အကျဉ်းသားတွေကို အတင်းအဓမ္မ လက်နက်ကိုင်ခိုင်းပြီးတော်လှန်ရေးတပ်တွေကို ခုခံတိုက်ခိုက်ခိုင်းတဲ့အပေါ် အချိန်များစွာ စုံးစမ်းမှုတွေပြုလုပ်ခဲ့ပြီး၊ အတည်ပြုနိုင်တဲ့ အခြေအနေတွေကို စီစစ်တွေ့ရှိခဲ့တယ်လို့ ဆိုပါတယ်။
စစ်ကောင်စီဟာ တိုက်ပွဲဖြစ်ပွားရာဒေသတွေအတွင်းက အကျဉ်းထောင်တွေမှာ ရာဇဝတ်အကျဉ်းသားတွေကို ထောင်တွင်းခံစစ်အတွက် လက်နက်တပ်ဆင်ပြီး ကင်းစောင့်ခိုင်းခြင်းအပါအဝင် တော်လှန်ရေးတပ်ဖွဲ့တွေ လာရောက်တိုက်ခိုက်မယ်ဆိုရင် စစ်သားတွေနဲ့အတူ ခုခံကာကွယ်ဖို့ အတင်းအဓမ္မ အမိန့်ပေးစေခိုင်းနေတယ်လို့ အသိပေးထားပါတယ်။
ကချင်ပြည်နယ်အတွင်းက ဗန်းမော်အကျဉ်းထောင်နဲ့ မိုးညှင်းအကျဉ်းထောင်ထောင်မှာဆိုရင် ရာဇာဝတ်မှုတွေနဲ့ နှစ်ကြီးကျနေတဲ့ အကျဉ်းသားအချို့ကို စစ်ကောင်စီက လက်နက်တပ်ဆင်ပေးပြီး ထောင်ခံစစ်ကင်းမှာ
လုံခြုံရေးစောင့်ခိုင်းတာ၊ တော်လှန်ရေးတပ်တွေလာရောက် တိုက်ခိုက်ရင် စစ်ကောင်စီနဲ့အတူ ပူးတွဲခုခံမှုတွေဖို့ စေခိုင်းမှုတွေ ရှိနေတယ်လို့ ဆိုပါတယ်။
လွိုင်ကော်အကျဉ်းထောင်ကို တော်လှန်ရေးတပ်တွေ ဝင်ရောက်တိုက်ခိုက်ချိန်မှာလည်း စစ်ကောင်စီဟာ စစ်စည်းကမ်း၊ရဲစည်းကမ်းဖောက်ဖျက်မှုနဲ့ အကျဉ်းထောင်မှာ ဖမ်းဆီးခံထားရတဲ့ စစ်သား၊ ရဲနဲ့ ဗိုလ်အဆင့်ရှိသူတို့ကို တိုက်ပွဲဝင်တိုက်ခိုင်းခဲ့တယ်လို့ ဖော်ပြထားပါတယ်။
သူတို့ကို တိုက်ပွဲမှာဝင်တိုက်မယ်ဆိုရင် ကျခံနေရတဲ့ ပြစ်ဒဏ်တွေကို ဖျက်သိမ်းပြီး၊ မူလရာထူးကို(ယာယီ) ပေးကာ တိုက်ပွဲအတွင်း ပြန်လည်အသုံးပြုမှုတွေရှိခဲ့တာဖြစ်တယ်လို့ PPNM ကထုတ်ပြန်ထားပါတယ်။
အခုလို အကျဉ်းသားတွေကို အတင်းအဓမ္မစစ်မှုထမ်းခိုင်းခြင်း၊ ဖမ်းဆီးအကျဉ်းချခံထားရသည့် စစ်တပ်နဲ့ရဲတပ်ဖွဲ့မှတပ်ဖွဲ့ဝင်တွေကို ပြစ်ဒဏ် လွတ်ငြိမ်းမှုရဖို့ စစ်တပ်မှာ တာဝန်ထမ်းဆောင်စေခြင်းတွေကို တရားမဝင်လုပ်ရပ်ဖြစ်ပြီး PPNMအနေနဲ့လည်း အပြင်းအထန် ဆန့်ကျင်ကန့်ကွက်တယ်လို့လည်း ထုတ်ပြန်ချက်မှာ ဖော်ပြထားပါသေးတယ်။
