တအာင်းပြည်၊ တပ်မဟာ (၂)နယ်မြေ၊ နောင်ချိုမြို့နယ်အတွင်းကို စစ်ကောင်စီလေကြောင်းတိုက်ခိုက်မှုပြုလုပ်ခဲ့လို့ အရပ်သားပြည်သူ ၉ဦးသေဆုံးပြီး ၁၇ဦးထိခိုက်ဒဏ်ရာရခဲ့တယ်လို့ TNLA က သတင်းထုတ်ပြန်လာပါတယ်။
မနေ့ မတ်လ ၁၆ရက်နေ့၊ ညနေ ၅နာရီကျော်လောက်မှာ နောင်ချိုမြို့နယ်အတွင်းက စိန်ရတနာ ပရိယတ္တိစာသင်တိုက်ကို စစ်ကောင်စီက ဂျက်ဖိုက်တာလေယာဉ်ကိုအသုံးပြုပြီး ပေါင် (၂၅၀) ဗုံး (၄)လုံးအပြင် စက်သေနတ်တွေနဲ့ပါ ပစ်ခတ်တိုက်ခိုက်ခဲ့တာလို့ ဆိုပါတယ်။
အဲ့ဒီတိုက်ခိုက်မှုကြောင့် စာသင်တိုက်အတွင်းမှာရှိတဲ့ ရဟန်း ၂ပါး၊ သာမဏေ ၄ပါးနဲ့ အမျိုးသား ၁ဦး၊ အမျိုးသမီး ၂ဦးအပါအဝင် စုစုပေါင်း ၉ဦးတို့ ဗုံးစထိမှန် သေဆုံးခဲ့ရတယ်လို့ ဖော်ပြထားပါတယ်။
ဒါ့အပြင် သံဃာတော် ၁၃ပါးနဲ့ အရပ်သား ၄ဦးထိခိုက်ဒဏ်ရာရခဲ့သလို ပြည်သူလူထုနေအိမ်နဲ့ ကျောင်းဆောင်တွေလည်းအများအပြားထိမှန်ပျက်စီးခဲ့တယ်လို့ ဆိုပါတယ်။
ဒဏ်ရာရရှိသူတွေကိုတော့ TNLA တာဝန်ရှိသူတွေနဲ့ ပြည်သူတွေက ဝိုင်းဝန်းပြီး ဆေးကုသဖို့ ပို့ဆောင်ပေးခဲ့ပြီးဖြစ်တယ်လို့လည်း အသိပေးထားပါတယ်။
စစ်ကောင်စီတပ်ဟာ တိုက်ပွဲဖြစ်ပွားခြင်းမရှိဘဲ အရပ်သားတွေကို ရည်ရွယ်ချက်ရှိရှိ ဗုံးကြဲတိုက်ခိုက်နေတယ်လို့လည်း TNLA က ထုတ်ပြန်ထားပါတယ်။
မိဘပြည်သူတွေအနေနဲ့လည်း စစ်ကောင်စီရဲ့ဗုံးကြဲတိုက်ခိုက်မှုတွေကို ရှောင်ရှားနိုင်ဖို့အတွက် စစ်ရေးသတိအမြဲရှိဖို့လိုအပ်ပြီး၊ လေကြောင်းရန်မှ ကာကွယ်နိုင်ဖို့နဲ့ လေကြောင်းရန်ကာကွယ်ရေးဆိုင်ရာနည်းလမ်းတွေကို လိုက်နာဆောင်ရွက်ဖို့ လိုအပ်တယ်လို့လည်း TNLAက အသိပေးထားပါတယ်။
နောင်ချိုမြို့ကို TNLAနဲ့ ပူးပေါင်းတပ်တွေဟာ ပြီးခဲ့တဲ့ ၂၀၂၄ခုနှစ်၊ ဇူလိုင်လအတွင်းမှာ တိုက်ခိုက်သိမ်းပိုက်ထားတာလည်းဖြစ်ပါတယ်။
