CNA၊မြတ်သူ။
ရန်ကုန်တိုင်း၊ သာကေတမြို့နယ်မှာ ရွှေဆိုင်ဖွင့်ထားတဲ့ မာန်အောင်မြို့ က ဒေသခံ အမျိုးသမီးတစ်ဦးဟာ လူတစ်စုရဲ့ ပြန်ပေးဆွဲမှုကို ခံလိုက်ရပြီးနောက် ဒီနေ့မှာတော့ အသက် အန္တရာယ် တစ်စုံတစ်ရာ ထိခိုက်မှု မရှိခဲ့ဘဲ ပြန်လည် လွတ်မြောက်လာပြီး ဖြစ်တယ်လို့ သူ့ရဲ့မိသားစုဝင်တွေက CNA ကို ပြောပါတယ်။
ရခိုင်ပြည်၊ မာန်အောင်မြို့ ၊ သိမ္ဗလကျေးရွာက ဒေါ် စန္ဒာလင်း(ခ) မိထုပ် ဟာ ပြီးခဲ့တဲ့ မတ်လ ၁၈ ရက်နေ့ မနက်ပိုင်းက သူနေထိုင်နေတဲ့ သာကေတမြို့နယ် ထူပါရုံ ၂၂ လမ်းကနေ သူရဲ့ လင်းလက်ရွှေစင်အမည်ရှိတဲ့ သာကေတမြို့နယ် အတွင်းက အမှတ် (၁) စျေး ရွှေဆိုင်ဖွင့်ဖို့အသွား ထူပါရုံ ၂၂ လမ်းထိပ် အရောက်မှာ လူလေးဦးက တဲ့ Alphard ကားအဖြူပေါ်ကနေ ဆင်းလားပြီးတော့ ဒေါ် စန္ဒာလင်း(ခ) မိထုပ် ကို ကားပေါ်ကို အတင်းဖမ်းဆီးခေါ်ဆောင်သွားခံခဲ့ရတာလည်း ဖြစ်ပါတယ်။
အဲဒီနောက် ဒီနေ့မှာတော့ ဒေါ် စန္ဒာလင်း(ခ) မိထုပ် ဟာ သူရဲ့ နေအိမ်ကို ပြန်လည် ရောက်ရှိလာပြီး ဖြစ်သလို သူနဲ့ အတူပါသွားတဲ့ ရွှေထည် ပစ္စည်းတွေကိုတော့ ပြန်ပေးဆွေးတဲ့ သူတွေ လက်ထဲမှာ ကျန်နေခဲ့တယ်လို့ သူရဲ့ မိသားစုဝင်တစ်ဦးက CNA ကို အတည်ပြုပြောပါတယ်။
“လူကိုတော့ ဘာမှလုပ်ထားတာမရှိဘူး ရိုက်နှက်ထားတာလည်း မရှိဘူး ပစ္စည်းတွေကိုတော့ ယူထားလိုက်တယ်။သူတို့ကိုလည်း ရဲတွေကလိုက်ရှာနေတယ်။မနက်ဖြန် ရဲစခန်းကိုသွားတဲ့ အခါမှ ကျန်တဲ့ ကိစ္စကို သိရမယ်”လို့ သူ့ရဲ့ မိသားစုဝင်တွေက ပြောပါတယ်။
အဲဒီလူ ၄ ဦးက ဒေါ်စန္ဒာလင်းကို ဖမ်းဆီးသွားချိန်မှာ ဒေါ် စန္ဒာလင်း အနေ နဲ့ အော်ဟစ်အကူအညီတောင်းခဲ့ပေမယ့် သူ့ကို ဖမ်းဆီးထားတဲ့ အမျိုးသား ၄ ဦးက မဆိုင်သူတွေ ဝင်မပါကြဖို့ကို ပြန်လည်အော်ဟစ်ပြောဆိုခဲ့တာတဲ့ အတွက် ဒေါ် စန္ဒာလင်း မှာ ပြန်ပေးဆွဲသူတွေ လက်ထဲကို ပါသွားခဲ့ရတာ ဖြစ်တယ်လို့လည်း ဆိုပါတယ်။
ဒါ့ အပြင် ဒီပြန်ပေးဆွဲမှု မဖြစ်ပွါးခင် ၂ ပတ်ကတည်းကပင် ဒေါ် စန္ဒာလင်း နေထိုင်နေတဲ့ အိမ်အနီးမှာ အဲဒီ ပြန်ပေးဆွဲ သွားတဲ့ Alphard ကားအဖြူတစ်စီး နဲ့ အမျိုးသားတစ်စုတို့ဟာ နေ့စဉ် နဲ့ အမျှရောက်ရှိနေတာလည်း ရှိခဲ့တယ်လို့ ရပ်ကွက်နေ ပြည်သူတွေက ဆိုကြပါတယ်။
စစ်ကောင်စီ အာဏာသိမ်းပြီးနောက်ပိုင်း ရန်ကုန်မြို့ အပါအဝင် မြန်မာတစ်နိုင်ငံလုံး မှာ အလုပ်အကိုင်မရှိတာ၊ငွေကြေးကြပ်တည်းတာ ၊စားဝတ်နေရေး အဆင်မပြေတာတွေကြောင့် ဘဏ်တွေကို ဓားပြတိုက်တာ၊လုယက်တာ၊ဖောက်ထွင်းခိုးယူတာ၊ ပြန်ပေးဆွဲတာတွေကို နေ့စဉ် နဲ့ အမျှ မြန်မာပြည်သူတွေရင်ဆိုင်ကြုံတွေ့နေကြရတာလည်း ဖြစ်ပါတယ်။
အဲဒီလို နိုင်ငံ အတွင်း တရားဉပဒေစိုးမိုးမှု လုံခြုံမှု မရှိတဲ့ အတွက် ပြည်သူကို ပြည်သူ အချင်းချင်းကူညီကာ သတိထားသွားလာဖို့ကို ဒီနောက်ပိုင်းမှာ ပိုမိုလိုအပ်လာနေတယ်လို့လည်း ရန်ကုန်မှာ ရောက်ရှိနေကြတဲ့ တိုင်းရင်းသားပြည်သူတွေက တိုက်တွန်း ပြောဆိုကြတာလည်း ရှိပါတယ်။
