ဧရာဝတီတိုင်းထဲက မြို့၃ မြို့ထိကို အာရက္ခတပ်တော် နဲ့ ပူးပေါင်းတပ်တွေ ထိုးစစ်ဆင်တိုက်ခိုက်နေ

CNA ၊ မြတ်သူ။

ဧရာဝတီတိုင်းထဲက မြို့နယ် ၃ ခုက စစ်ကောင်စီတပ်စခန်းတွေကို အာရက္ခတပ် နဲ့ ပူးပေါင်းတပ်တွေက ထိုးစစ်ဆင်တိုက်ခိုက်နေပြီး နှစ်ဖက်တိုက်ပွဲတွေ အပြင်းအထန်ဖြစ်ပွါးနေတယ်လို့ စစ်ရေး သတင်းရင်းမြစ်တွေက ပြောပါတယ်။

အာရက္ခတပ်တော် နဲ့ ပူးပေါင်းတပ်တွေ ထိုးစစ်ဆင်တိုက်ခိုက်နေတဲ့ ဧရာဝတီတိုင်းထဲက မြို့နယ်တွေကတော့ ရေကြည်မြို့နယ်၊ လေးမျက်နှာမြို့နယ် နဲ့ သာပေါင်းမြို့နယ်တွေက စစ်ကောင်စီတပ်စခန်းတွေ ဖြစ်ကြတယ်လို့ စစ်ရေးသတင်းရင်းမြစ်ကပြောပါတယ်။

ရေကြည်မြို့နယ်ထဲမှာတော့ စစ်ကောင်စီအခြေစိုက် တပ်စခန်းဖြစ်တဲ့ အမတ (၃၄၄) အမြောက်တပ်ရင်း အနီးထိုးစစ်ဆင်တိုက်ခိုက်နေတာ ဖြစ်သလို လေးမျက်နှာ မြို့နယ် အတွင်းမှာတော့ ချင်းလယ်ရွာအနီး က စစ်ကောင်စီ ကာကင်းစခန်းတွေကို ထိုးစစ်ဆင်တိုက်ခိုက်နေတာ ဖြစ်ပြီးတော့ သာပေါင်းမြို့နယ်အတွင်းမှာတော့ ကမွန်းချင်တောင် နဲ့ သားပေါင်းလေးရွာကတပ်ဆုတ်ထွက်ပြေးလာပြီး သဲဖြူရွာ အနီးတဝိုက်မှာ ခုခံစစ်အနေ နဲ့ ပြန်လည်ခုခံတိုက်ခိုက်နေတဲ့ စစ်ကောင်စီတပ်စခန်းတွေကို ထိုးစစ်ဆင်တိုက်ခိုက်နေတာ ဖြစ်တယ်လို့ ပြောပါတယ်။

အဲဒီတိုက်ပွဲတွေ ဖြစ်နေတဲ့ မြို့နယ်တွေထဲက လေးမျက်နှာမြို့နယ် အတွင်းက ချင်းလယ်ရွာအနီးတိုက်ပွဲ နဲ့ ရေကြည်မြို့နယ်ထဲက အမတ (၃၄၄) အမြောက်တပ်အနီးက တိုက်ပွဲတွေမှာ စစ်ကောင်စီက လေကြောင်း နဲ့ ခုခံတိုက်ခိုက်တာတွေ အပြင် စက်တပ်လေထီတွေ နဲ့ ပါ အပြင်းအထန်ခုခံတိုက်ခိုက်နေတယ်လို့ ပြောပါတယ်။

“ရေကြည် နဲ့ လေးမျက်နှာမှာက တိုက်ပွဲက တော်တော် ပြင်းပြင်းထန်ထန်ဖြစ်နေတယ် စစ်ကောင်စီက လေကြောင်းကပစ်တာ နောက်ပြီးတော့ စက်တပ်လေထီးတွေ နဲ့ ခုခံတိုက်ခိုက်နေတာကို လုပ်နေတယ်။ပြီးတော့ ရေကြည် က အမတ ၃၄၄ တပ်ရင်းက ပုသိမ်-မုံရွာ လမ်းမပေါ်မှာရှိတယ်ဆိုတော့ စစ်ရေးအတွက် အရေးပါတဲ့ တပ်စခန်းဖြစ်နေတော့ အပြင်းအထန်ခုခံကာကွယ်နေတာ။ လေးမျက်နှာကလည်း ရေကြည် နဲ့ နယ်မြေက တဆက်တစပ်တည်း ဖြစ်နေတာဆိုတော့ ဒီဘက်ကို ပိုပြီးခုခံကာကွယ်နေတဲ့သဘောပေါ့။သာပေါင်းမှာကတော့ ကမွန်းချင်တောင် နဲ့ သားပေါင်းလေးရွာက ကာကင်းစခန်းတွေက စစ်ကောင်စီတပ်သားတွေ တပ်ဆုတ်ပြီးတော့ သဲဖြူရွာ အနီးတဝိုက်မှာ ခုခံစစ်ပြန်လုပ်ပြီး စစ်ကောင်စီက ခုခံနေတာတွေ ရှိနေတယ် အဲဒီဖက်ကိုတော့ လေကြောင်းတိုက်ခိုက်မှု က အဲဒီလောက် မရောက်ဘူးလို့ သိရတယ်”လို့ သူကပြောပါတယ်။

စစ်ကောင်စီ လေကြောင်းတိုက်ခိုက်မှုတွေ ဆက်တိုက်လုပ်နေတဲ့ လေးမျက်နှာမြို့နယ် နဲ့ ရေကြည် အစပ်မှာ ရှိတဲ့ ချင်းလယ်၊ ကညင်တိုင်း၊ စောပြာ၊ စက်စက်ယိုကျေးရွာက ထောင်နဲ့ ချီတဲ့ ပြည်သူတွေ စစ်ဘေးရှောင်ထွက်ပြေးနေရသလို လေးမျက်နှာမြို့နယ်အတွင်းက ဝတ်ကုန်း၊ လဲခုံကြီး၊ လဲခုံလေး၊ ရှားတောစု၊ စမ်းကုန်း စတဲ့ ကျေးရွာတွေက ထောင်နဲ့ ချီတဲ့ ပြည်သူတွေဟာလည်း စစ်ဘေးရှောင်ထွက်ပြေးနေကြရတယ်လို့ စစ်ရေးသတင်းရင်းမြစ်ကဆိုပါတယ်။

ဒါ့အပြင်သာပေါင်းမြို့နယ်အတွင်းမှာလည်း ကမွန်းချင်တောင် နဲ့ သားပေါင်းလေးရွာက တပ်ဆုတ်လာတဲ့ စစ်ကောင်စီတပ်တွေ ဟာသဲဖြူရွာ အနီးတဝိုက်မှာ ခံစစ်စခန်းတည်ဆောက်ကာ ြပန်လည် ခုခံတိုက်ခိုက်နေတာကြောင့် သာပေါင်းလေး ၊ သဲဖြူ၊ ကျားခေါင်း၊ သစ်ဖြူ၊ စတဲ့ရွာတွေအပါဝင် ကျေးရွာဆယ်ရွာကလောက်က ထောင်ချီတဲ့ ဒေသခံ ပြည်သူတွေဟာ ဘေးလွတ်ရာနေရာတွေကို စစ်ဘေးရှောင်ဖို့ ထွက်ခွါနေကြရတယ်လို့ သိရပါတယ်။

ဒီတိုက်ပွဲဖြဟ်ပွါးနေတဲ့ အခြေအနေတွေ နဲ့ ပတ်သက်ပြီးတော့ အာရက္ခတပ်တော် အနေနဲ့ တစ်စုံတရာ ထုတ်ပြန်ပြောဆိုတာမရှိသေးသလို စစ်ကောင်စီဘက်ကလည်း တစ်စုံတရာ ထုတ်ပြန်ပြောဆိုလာတာတော့ မတွေ့ရသေးပါဘူး။