အင်းတော်ကို စစ်ကူလာတဲ့ စစ်ကြောင်းကို ကြားဖြတ်တိုက်ခိုက်ခံရလို့ စစ်ကောင်စီတပ်သား ၃၀ ကျော် သေဆုံး

အင်းတော်ကို စစ်ကူးလာတဲ့ စစ်ကောင်စီစစ်ကြောင်းကို ကြားဖြတ်တိုက်ခိုက်ခဲ့လို့ စစ်ကောင်စီတပ်သား ၃၃ ဦးသေဆုံးပြီးတော့ ၁၀ ဦး ထိခိုက်ဒဏ်ရာ ရရှိကာ နောက်ထပ်စစ်ကောင်စီတပ်သား ၃၁ ဦးကိုလည်း အရှင်ဖမ်းဆီးရမိခဲ့တယ်လို့ အမှတ် (၁) စစ်ဒေသက သတင်းထုတ်ပြန်လာပါတယ်။

ဗိုလ်မှူး လင်းထက် ဦးစီးပြီး ခမရ (၁၀၆၊ ၃၀၉)၊ ခလရ-၆ ပူးပေါင်းအင်အား (၁၅၀) ခန့်ပါတဲ့ စစ်ကြောင်းကို ကသာမြို့နယ်၊ ပင်လွတ်ရွာအနီး ပန်းတောင်ကြီး၊ ပန်းတောင်လေး အရောက်မှာ EAOs(KIA)၊ KPDF၊ ကသာခရိုင် တပ်ရင်း-၁၊ မိုးတားတိုက်နယ် ပကဖ နဲ့ ကသာမြို့ နယ် ပကဖ ပူးပေါင်းအဖွဲ့ တွေက မတ်လ ၁၅ ရက်နေ့မှာ ပူးပေါင်းတိုက်ခိုက်ခဲ့တာ ဖြစ်တယ်လို့ ဆိုထားပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်မှ (၃၃) ဦး သေဆုံးပြီး (၁၀) ဦး ထိခိုက်ဒဏ်ရာရရှိခဲ့သလို (၃၁) ဦးကိုလည်းဖမ်းဆီးရမိခဲ့တယ်လို့ ဆိုထားပါတယ်။

ဒါ့အပြင် စစ်ကောင်စီတပ်တွေ ဆီက MA-1 (၂၉) လက်၊ MA-2 (၆) လက်၊ MA-3 (၁၂) လက်၊ MA-4 (၃) လက်၊ MA-11 (၁) လက်၊ MA-15 (၁) လက်၊ Anti Drone Gun (၁) လက်၊ MA-10 ဗုံးသီး (၃၇) လုံး၊ MA ကျည် (၈၀၀၀) တောင့်၊ MA-15 ကျည် (၂၀၀၀) တောင့်၊ ၆၀ မမ ဗုံးသီး (၁၇) လုံး၊ ကျည်အိမ် (၁၁၃) ခု၊ ကျောပိုး Jammer (၁) ခု၊ ဆက်သွယ်ရေးစက် (၁) လုံး၊ အထိုင်ဖုန်း (၁) လုံး၊ ကျည်ကာဦးထုပ် (၁၂) လုံးကိုလည်း သိမ်းဆည်းရမိခဲ့တယ်လို့လည်း ထုတ်ပြန်ထားပါတယ်။

အဲဒီတိုက်ပွဲ အတွင်းမှာ ပြည်သူ့ကာကွယ်ရေး တပ်တွေဘက်ကလည်း ရဲဘော် ၂ ဦးကျရှုံးခဲ့ရတယ်လို့ ဆိုထားပါတယ်။