စစ်ကောင်စီရဲ့ လေကြောင်းတိုက်ခိုက်မှုတွေကြားကနေ ကော်သူးလေ အစိုးရစစ်စာမေးပွဲကို အောင်မြင်စွာကျင်းပနိုင်ခဲ့တယ်လို့ ကရင်အမျိုးသားအစည်းအရုံး(KNU)က ထုတ်ပြန်လာပါတယ်။
ကော့ကရိတ်မြို့နယ် ကရင်ပညာရေးနှင့်ယဉ်ကျေးမှုဌာနရဲ့ ကော်သူးလေ အစိုးရစစ် စာမေးပွဲကို မတ်လ ၁၄ရက်နေ့မှာ အန္တာရယ်တွေကြားကနေ သစ်ပင်၊ ဝါးပင်တွေအကြား အောင်မြင်စွာ ဖြေဆိုပြီးစီးနိုင်ခဲ့တာလို့ ဆိုပါတယ်။
အဲ့ဒီစာမေးပွဲကို KNUတာဝန်ရှိခေါင်းဆောင်တွေနဲ့ ကျောင်းဆရာ/မတွေက ပူးပေါင်းဆောင်ရွက်ခဲ့တယ်လို့လည်း အသိပေးထားပါတယ်။
ကော့ကရိတ်မြို့နယ် ကရင်ပညာရေးနှင့် ယဉ်ကျေးမှုဌာနရဲ့ ကော်သူးလေအစိုးရ ပညာသင်ကျောင်းဟာ ကလေးလူငယ်တွေရဲ့ အနာဂါတ်ဘဝနဲ့ ပညာရေးအတွက် စစ်ဘေးဒဏ်တွေကြားကနေ ခက်ခဲစွာ သင်ယူလေ့လာခဲ့ရတယ်လို့လည်း ထုတ်ပြန်ထားပါတယ်။
KNUထိန်းချုပ်နယ်မြေတွေမှာ စစ်ကောင်စီတပ်ဟာ လေကြောင်းတိုက်ခိုက်မှုတွေ နေရာအနှံ့လုပ်ဆောင်နေသလို ဒူးပလာယာခရိုင်၊ ကော့ကရိတ်မြို့နယ်အတွင်းမှာလည်း တော်လှန်ရေးပူးပေါင်းတပ်တွေထိန်းချုပ်ထားတဲ့ အာရှလမ်းမကြီးကို စစ်ကောင်စီက ပြန်လည်ထိန်းချုပ်နိုင်ဖို့ ကြိုးစားနေတယ်လို့ ဆိုပါတယ်။
စစ်ကောင်စီဟာ အာရှလမ်းမကြီးကိုပြန်လည်ထိန်းချုပ်နိုင်ဖို့အတွက် လူအင်အား၊ လက်နက်အင်အား များစွာဖြည့်တင်းတာ၊ မြေပြင်ကနေ လက်နက်ကြီးတွေနဲ့ ပစ်ခတ်တာ၊ ဝေဟင်ကနေ အဆင့်မြင့် ဒရုန်းတွေ၊ လေယာဥ်တွေနဲ့ နေရာအနှံ့နေ့စဉ်နဲ့အမျှ ပစ်ခတ်နေတယ်လို့လည်း KNUက ထုတ်ပြန်ထားပါတယ်။
