မာန်အောင်မြို့နယ်အတွင်းမှာ စစ်ကောင်စီက အများပြည်သူအသုံးပြုနေတဲ့ ဖုန်းလိုင်း အင်တာနက်လိုင်းတွေကို ဖြတ်တောက်ထားတာက လွဲရင် ကျေးရွာတွေက နေအိမ်တွေကို စစ်တပ်က ပြောင်းရွှေ့ခိုင်းတာတွေ မရှိဘူးလို့ CNA ရဲ့ မာန်အောင် သတင်းရင်းမြစ်က ပြောပါတယ်။
ဒီနေ့ မနက်ပိုင်းမှာ CNA သတင်းဌာန ရဲ့ သတင်းထောက် တစ်ဦးဆက်သွယ်ပြောဆိုလာတာက “နေအိမ်ပြောင်းရွှေ့ခိုင်းတာတွေ မရှိပါဘူး။ဒီမှာက ဖုန်းလိုင်း အင်တာနက်လိုင်းမရတာ နဲ့ ကုန်စေ◌ျးနူန်းတွေ အဆမတန် တက်တာက လွဲရင် ဘာမှမဖြစ်ဘူး။အခုဆက်နေတဲ့ ဖုန်းကလည်း လူတိုင်းမှာ ရှိတာတော့မဟုတ်ဘူး။အခုတောင် ရုံးကို ဖုန်းလာပြောတာ သစ်ပုံ နဂါးတောင်က နေလာပြောနေရတာ။ အဲဒါ သတင်းမှားဖြစ်တယ်”လို့ သူက ဆိုပါတယ်။
စစ်ကောင်စီဟာ ရခိုင်တကျော့ပြန်တိုက်ပွဲ စတင်ချိန်ကတည်းကပင် ရခိုင်က ဖုန်းလိုင်း အင်တာနက်လိုင်းတွေကို ဖြတ်တောက်ထားတာတွေ လုပ်ဆောင်ခဲ့ ပေမယ့် မာန်အောင်မြို့နယ်အတွင်းမှာ တခြားနေရာဒေသတွေ လောက် ဆိုးဆိုးရွားရွား ဖုန်းလိုင်း အင်တာနက်လိုင်း ပြတ်တောက်တာ မရှိပဲ အဆက်အသွယ် လုပ်ဆောင်လို့ရရှိခဲ့တာတွေ ရှိခဲ့ပါတယ်။
အဲဒီနောက် အာရက္ခတပ်တော်က တောင်ကုတ်မြို့သိမ်းတိုက်ပွဲ စတင်ချိန်မှာတော့ မာန်အောင်မြို့နယ် တစ်ခုလုံးဟာ ဖုန်းလိုင်း အင်တာနက်လိုင်းတွေကို မရတော့ဘဲ အကုန်ပြတ်တောက်သွားခဲ့ရပြီး လက်ရှိ စစ်ကောင်စီက အသစ်ပြန်လည်ချပေးထားတဲ့ ဖုန်းဆင်းကဒ် တစ်ချို့သာ ဖုန်းအဆက်အသွယ် လုပ်ဆောင်လို့ ရရှိနေတာလည်း ဖြစ်တယ်လို့ ဆိုပါတယ်။
အခုလို မာန်အောင်မြို့နယ်အတွင်းကို လွယ်လင့်တကူ ဖုန်းဆက်သွယ်မေးမြန်မှုတွေ မရတဲ့ အချိန်မှာ သတင်းမှားတွေ တင်တာဟာ ပြည်ပမှာ ရှိနေတဲ့ မိသားစုတွေ အတွက် အလွန်တရာ စိုးရိမ်စိတ်တွေ များရတာကြောင့် သတင်းဌာနတွေ အနေ နဲ့ သတင်းတင်တဲ့ အခါမှာလည်း သေချာစီစစ်ပြီးမှ သတင်းတွေကို တင်ဖို့လိုအပ်တယ်လို့ အိမ်နဲ့ အဆက်အသွယ် မရပဲဖြစ်နေတဲ့ ရန်ကုန်ရောက် မာန်အောင်ဒေသခံ ကိုထွန်းထွန်းလင်းက ပြောပါတယ်။
“သတင်းတွေကိုတင်တဲ့ အခါ သေချာစီစစ်ပြီးတင်စေချင်တယ် မနေ့က ကျနော်ဆို အိမ်ကို အရမ်းစိုးရိမ်တာ သတင်းတွေကလည်း တက်လာတော့။ဖုန်းကလည်း ကျနော်တို့ဆီက ခေါ်လို့ရတာ မဟုတ်ဘူး မာန်အောင်က ခေါ်လာတဲ့ အခါမှ ကျနော်တို့က ပြောရတာ ။ဒီလောက် အိမ်နဲ့ ဆက်သွယ်ဖို့ ခက်ခဲနေချိန်မှာ ကျနော်တို့ အားကိုးနေတဲ့ သတင်းတွေက အမှားတွေ တင်နေရင် ကျနော်တို့အတွက် ပိုစိုးရိမ်ရတယ်”လို့ သူကဆိုပါတယ်။
မာန်အောင်မြို့နယ်အတွင်းမှာတော့ စစ်ကောင်စီက အဲဒီလို နေအိမ်ဖယ်ခိုင်းတာတွေ မရှိပေမယ့် စစ်ရေးအတွက်ပြင်ဆင်တာ လူအင်အားဖြည့်တင်းတာတွေ နဲ့ ရေတပ်သင်္ဘောတွေ အင်အားတိုးချထားတာတွေတော့ ရှိနေတယ်လို့သိရပါတယ်။
