တနင်္သာရီတိုင်း၊ ထားဝယ်ခရိုင်၊ ရေဖြူမြို့နယ်အတွင်းက ပြည်ထောင်စုလမ်းမကြီးမှာ လမ်းကင်းထွက်လာတဲ့ စစ်ကောင်စီတပ်ဖွဲ့ဝင်တွေ တိုက်ခိုက်ခံရလို့ ဗိုလ်မှူးအဆင့်ရှိသူ ၁ ဦးအပါအဝင် အနည်းဆုံး ၂၀ ဦးထက်မနည်းသေဆုံးခဲ့တယ်လို့ ဒူရကစစ်ကြောင်းက သတင်းထုတ်ပြန်လာပါတယ်။
မတ်လ ၂၄ ရက်နေ့၊ မနက် ၉ နာရီဝန်းကျင်လောက်မှာ ရေဖြူမြို့နယ်၊ ညင်းထွေးရွာနဲ့ ကျောက်ကညှာရွာ အကြားက ရေး-ထားဝယ်အမှတ် (၈) ပြည်ထောင်စုလမ်းမကြီးတစ်လျှောက်မှာ လမ်းကင်းထွက်လာတဲ့ စစ်ကောင်စီ တပ်ဖွဲ့ဝင်တွေကို တော်လှန်ရေးပူးပေါင်းတပ်တွေကို ကြားဖြတ်ပစ်ခတ်တိုက်ခိုက်ခဲ့တာလို့ ဆိုပါတယ်။
တိုက်ပွဲအတွင်း စစ်ကောင်စီဘက်ကလည်း လက်နက်ကြီး ပစ်ကူအများအပြားအပြင် Pramotor တစ်စီးနဲ့ပါ ပစ်ကူပေးခဲ့တယ်လို့ ဖော်ပြထားပါတယ်။
ထိခိုက်သေဆုံးမှုအနေ နဲ့ စစ်ကောင်စီဘက်က ဗိုလ်မှူးအဆင့်ရှိသူ ၁ ဦးအပါအဝင် စစ်ကောင်စီတပ်သား ၂ဝ နဲ့ အထက် သေဆုံးခဲ့ပြီး အများအပြားထိခိုက်ဒဏ်ရာရခဲ့သလို RPG 7 (၁) လက်၊ MA4 (၁) လက်၊ MA3 (၁) လက်၊ MA1 (၂) လက်နဲ့ ဆက်စပ် ပစ္စည်းအချို့ကို တော်လှန်ရေးပူးပေါင်းတပ်တွေဘက်က သိမ်းဆည်းရရှိခဲ့တယ်လို့ ဆိုပါတယ်။
အဲ့ဒီတိုက်ခိုက်မှုကို ထားဝယ်အမျိုးသားလွတ်မြောက်ရေးတပ်တော် (DNLA)ရဲ့ ဒူရကစစ်ကြောင်းဦးဆောင်မှု နဲ့ အတူ ရေဖြူပြည်သူ့ကာကွယ်ရေးတပ်ဖွဲ့ (YPPDF) တို့က ပူးပေါင်း လုပ်ဆောင်ခဲ့တာဖြစ်ပြီး ရဲဘော်တွေအထိအခိုက်မရှိပြန်လည် ဆုတ်ခွာနိုင်ခဲ့တယ်လို့လည်း အသိပေးထားပါတယ်။
စစ်ကောင်စီဘက်က အချိန်မရွေးလေကြောင်းတိုက်ခိုက်မှုတွေရှိလာနိုင်တာကြောင့် ပြည်သူတွေအနေနဲ့လည်း လေကြောင်းရန်ကာကွယ်ရေးနဲ့ ပတ်သက်တဲ့ သတင်းအချက်အလက်တွေကို
လိုက်နာကျင့်ကြံကြဖို့ကိုလည်း ဒူရကစစ်ကြောင်းက တိုက်တွန်းထားပါတယ်။
တစ်နိုင်ငံလုံးအတိုင်းအတာနဲ့ စစ်ရေးတွေကို အရှိန်အဟုန်တိုးမြင့်စွာဆောင်ရွက်နေတဲ့အချိန်ဖြစ်တာကြောင့် ပြည်သူတွေအနေနဲ့လည်း စစ်ရေးအထူး သတိပြု သွားလာနေထိုင်ကြဖို့ကိုလည်း ထုတ်ပြန်ချက်မှာ အသိပေးထားပါတယ်။
တော်လှန်ရေးနဲ့ စစ်ရေးအရှိန် မြင့်လာသည်နှင့်အမျှ ပြည်သူ့ဘက်၊ အမှန်တရားဘက် ရပ်တည်လိုတဲ့စစ်ကောင်စီဘက်က စစ်သည်တော်တွေ ရဲတပ်ဖွဲ့ဝင်တွေကို ပြည်သူ့ရင်ခွင်ခိုလှုံပြီး အမြန်ဆုံး ပူးပေါင်းပေးကြဖို့ကိုလည်း တိုက်တွန်းထားပါသေးတယ်။
