ကေအဲန်ယူ−ကရင်အမျိုးသားအစည်းအရုံး၊ ကော်သူးလေအုပ်ချုပ်နယ်မြေ၊ ဖားအံခရိုင်၊ လှိုင်းဘွဲမြို့နယ် အတွင်းဝင်ရောက်ကျူးကျော်တပ်စွဲထားတဲ့ ခလယ်ဒေး စစ်ကောင်စီစခန်းကို ကရင်အမျိုးသား လွတ်မြောက်ရေးတပ်မတော် (K.N.L.A) က အပြီးသတ်သိမ်းပိုက်လိုက်ပြီးလို့ KNU က ဒီနေ့ မတ်လ ၂၆ ရက်နေ့မှာ သတင်းထုတ်ပြန်လာပါတယ်။
အဲဒီသိမ်းပိုက်ရရှိခဲ့တဲ့ ခလယ်ဒေး စစ်ကောင်စီတပ်စခန်းကို ကရင်အမျိုးသား လွတ်မြောက်ရေးတပ်မတော် (K.N.L.A) တပ်မဟာ (၇) တပ်မဟာ လုံခြုံရေးစစ်ကြောင်း၊ တပ်ရင်း (၁၉)၊ တပ်ရင်း (၂၁)၊ တပ်ရင်း (၂၂) နှင့် တပ်ရင်း (၂၄) တပ်ရင်းတွေက ပူးပေါင်းကာ ထိုးစစ်ဆင် တိုက်ခိုက်ခဲ့တာ ဖြစ်တယ်လို့ ဆိုထားပါတယ်။
K.N.L.A နဲ့ ပူးပေါင်းတပ်တွေဟာ ဒီတပ်စခန်းကို ၂၀၂၅ ခုနှစ် မတ်လ (၂၂) ရက်နေ့ကပင် စတင်ပြီးတော့ ဒရုန်းနဲ့ ဗုံးကြဲ တိုက်ခိုက်တာကို လုပ်ဆောင်ခဲ့တာ ဖြစ်ပြီးတော့ စစ်ကောင်စီကလည်း အဲဒီတပ်စခန်း မကျရှုံးစေရေးအတွက် မတ်လ (၂၄) ရက်နေ့မှာ ဂျက်ဖိုက်တာ (၂) စင်း နဲ့ ပေါင် (၅၀၀) ဗုံး (၄) လုံး ကြဲချတိုက်ခိုက်တာ Y-12 လေယာဉ် နဲ့ ဗုံး (၃၆) လုံး အထိ ပြန်လည်ကြဲချတိုက်ခိုက်တာတွေကို လုပ်ဆောင်ခဲ့တယ်လို့ဆိုပါတယ်။
အဲဒီနောက် မတ်လ (၂၅) ရက်နေ့မှာတော့ K.N.L.A နဲ့ ပူးပေါင်းတပ်တွေရဲ့ အဆက်မပြတ်ထိုးစစ်ဆင်တိုက်ခိုက်တာတွေကို စစ်ကောင်စီတပ်တွေ အနေ နဲ့ မခုခံနိုင်တော့အတွက် စခန်းတွင်းမှာ ကျန်ရှိနေသေးတဲ့ စစ်ကောင်စီတပ်သားတွေဟာ လက်နက်ခဲယမ်းတွေကိုမီးရှို့ဖျက်ဆီးပြီးစခန်းကို စွန့်ခွါ ထွက်ပြေးသွားခဲ့ကြတယ်လို့ ဆိုထားပါတယ်။
ဒီလို စစ်ကောင်စီတပ်သားတွေ စခန်းစွန့်ခွါထွက်သွားပြီးနောက်မှာတော့ K.N.L.A နဲ့ ပူးပေါင်းတပ်တွေဟာ ခလယ်ဒေးစခန်းကို နယ်မြေ ရှင်းလင်းရေးတွေ လုပ်ဆောင် ချိန်မှာတော့ စစ်ကောင်စီတပ်သား အလောင်း (၂) အလောင်းကို တွေ့ရှိခဲ့သလို စခန်းအတွင်းကလည်း ပွိုင့် (၅) တစ်လက်၊ ပွိုင့် (၅) ပြောင်း (၂) ချောင်း၊ ၆၀ မမ အရှည် (၁) လက်၊ ၆၀ မမ အတို (၁) လက်၊ RPG-7 (၁) လက်၊ MA-2 (၃) လက်၊ Jammer (၁) လုံး၊ မီးစက် အကြီး (၁) လုံး၊ မီးစက် အသေး (၁) လုံး၊ မိုင်းရှာစက် (၁) ခု၊ ရှေ့ထွက်မိုင်း (၆) လုံး၊ ၁၆ နင်းမိုင်း (၂) လုံး၊ ၆၀ မမ ကျည် (၂၇) လုံး၊ ခွေးဗုံး (၁၀) လုံး၊ ၈၁ မမ ကျည် (၂) လုံး၊ ၄၀ မမ ကျည် (၃၂) လုံး၊ RPG-7 ကျည် (၁၄) လုံး၊ ၇.၆၂ ကျည် (၂) သောင်း၊ ၅.၅၆ ကျည် (၈) ထောင်၊ တိုက်မိုင်း (၆၀) လုံး၊ ခမောက် (၈) လုံး၊ ဆိုလာ (၄) ချပ် ကိုလည်း သိမ်းဆည်း ရမိခဲ့တယ်လို့ ဆိုထားပါတယ်။
ဒီခလယ်ဒေးမှာ ရှိနေတဲ့ စစ်ကောင်စီတပ်စခန်းဟာ ၁၉၈၉ ခုနှစ် စက်တင်ဘာလ (၂၂) ရက်နေ့မှာ ထိုင်း−မြန်မာ နယ်စပ်ဒေသကို ထိန်းချုပ်ရေးဆိုတဲ့ ရည်ရွယ်ချက်နဲ့ တည်ဆောက်ခဲ့တဲ့ တပ်စခန်းတစ်ခုဖြစ်ပြီးတော့ အဲဒီစခန်းတည်ဆောက်ပြီးနောက်မှာတော့ ဒေသခံပြည်သူလူထုတွေကို လွတ်လပ်စွာ လှုပ်ရှားသွားလာခွင့်နဲ့ နေထိုင်လုပ်ကိုင်စားသောက်ခွင့် တွေကို တားမြစ်ခဲ့တာတွေ ရှိတယ်လို့ဆိုပါတယ်။
လက်ရှိမှာတော့ ဒီနေရာတွေကိုဒေသခံ ပြည်သူလူထုတွေ အနေ နဲ့ လွတ်လပ်စွာ လှုပ်ရှားသွားလာနိုင်ရေး နဲ့ လုပ်ကိုင်စားသောက်နိုင်ရေးတွေ အတွက် ပြည်သူလူထုရဲ့ လိုလားချက်တွေ နဲ့ အညီ ကရင်အမျိုးသားလွတ်မြောက်ရေးတပ်မတော် (K.N.L.A) က ခလယ်ဒေး စစ်ကောင်စီတပ်စခန်းကို သိမ်ပိုက်ပြီးနောက်မှာ တော့ နယ်မြေ ရှင်းလင်းရေး လုပ်ငန်းတွေကို လုပ်ဆောင်နေတယ်လို့လည်း ထုတ်ပြန် ပြောဆိုထားပါတယ်။
ရုပ်သံ− ခလယ်ဒေးစစ်ကောင်စီတပ်စခန်းက သိမ်းဆည်းရမိခဲ့သော လက်နက်ခဲယမ်းများ။KNU
