စစ်ကောင်စီရဲ့ ပြည်သူလူထုအပေါ် ရက်စက်စွာကြမ်းကြုတ်အကောင်အထည်ဖော် ဆောင်ရွက်မှုတွေမှာ တက်တက်ကြွကြွပါဝင်ခဲ့တဲ့ ဒေါက်တာမှုထန်ရဲ့ ပိုင်ဆိုင်မှုတွေကို သိမ်းဆည်းလိုက်ကြောင်း Chinland Defense Force – Thantlang(CDF – ထန်တလန်)က ထုတ်ပြန်လာပါတယ်။
CDF – ထန်တလန် ထိန်းချုပ်နယ်မြေအတွင်းက ဒေါက်တာမှုထန်ရဲ့ အိမ်၊ ခြံ၊ မြေအားလုံးကို တော်လှန်ရေးကာလအတွင်းမှာ ပြည်သူလူထု ကိုယ်စားအပြီးပိုင် သိမ်းဆည်းလိုက်တာလို့ ဆိုပါတယ်။
ဒေါက်တာ မှုထန်ဟာ မတရား အာဏာသိမ်းထားမှုကို သာမက ထန်တလန်မြို့တစ်ခုလုံးကို မီးရှို့ဖျက်ဆီးနေတဲ့ အကြမ်းဖက်စစ်တပ်ကို အားပေးနေသူ၊ ပြည်သူလူထုအပေါ် ရက်စက်ကြမ်းကြုတ်စွာ အကောင်အထည်ဖော်နေတဲ့ လုပ်ငန်းတွေမှာ တက်တက်ကြွကြွပါဝင်နေသူဖြစ်တယ်လို့ CDF – ထန်တလန်က အသိပေးထားပါတယ်။
သိမ်းဆည်းထားတဲ့ ဒေါက်တာမှုထန်ရဲ့ ပိုင်ဆိုင်မှုတွေကိုတော့ လိုအပ်သလိုဆက်လက်ဆောင်ရွက်သွားမှာဖြစ်ပြီး အသစ်တက်လာမယ့် အစိုးရထံကို ဆက်လက်လွှဲပြောင်းပေးသွားမယ်လို့လည်း CDF – ထန်တလန်က ထုတ်ပြန်ထားပါတယ်။
ဒေါက်တာ မှုထန်ဟာ ၂၀၁၀ခုနှစ်မှာ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (USDP)ပါတီကို ဝင်ရောက်ခဲ့သူဖြစ်ပြီး ချင်းပြည်နယ်၊ ထန်တလန် မဲဆန္ဒနယ် အမှတ်(၂)ကနေ ၃ကြိမ်ဝင်ရောက်ယှဉ်ပြိုင်ခဲ့ရာ ၂၀၁၅ခုနှစ်မှာ အနိုင်ရခဲ့သူဖြစ်တယ်လို့ ဒေသတွင်း သတင်းတွေက ဖော်ပြပါတယ်။
၂၀၂၃ခုနှစ်၊ ဖေဖော်ဝါရီလမှာတော့ ဒေါက်တာမှုထန်ကို စစ်ကောင်စီက နိုင်ငံတော် စီမံအုပ်ချုပ်ရေးကောင်စီဝင်အဖြစ် ခန့်အပ်ခဲ့တယ်လို့ သိရပါတယ်။
