CNA ၊ မြတ်သူ။
ပြီးခဲ့တဲ့ မတ်လ ၂၅ ရက်နေ့က အေအေ ကို သတင်းပေးလုပ်နေတယ်ဆိုတဲ့ စွပ်စွဲချက် နဲ့ စောမြရာဇာလင်းဦးဆောင်တဲ့ ရခိုင်ပြည်လွတ်မြောက်ရေးပါတီ (ALP) တနည်းအားဖြင့် ငြိမ်းတပ်မြတ်တော်က ဖမ်းဆီးသွားတဲ့ စစ်တွေ ဒေသခံ ၃ ဦးဟာ လက်ရှိအချိန်ထိ ပြန်လွတ်လာခြင်းမရှိသေးဘူးလို့ ဖမ်းဆီးခံရတဲ့ မိသားစုတွေ နဲ့ နီးစပ်သူတွေက CNA ကို ပြောပါတယ်။
ဖမ်းဆီးခံလိုက်ရတဲ့ သူ ၃ ဦးကတော့ စစ်တွေမြို့ ဆပ်ရိုးကျရပ်ကွက်က အသက် ၆၂ နှစ်အရွယ် ဦးရီမောင်၊ အသက် ၃၈ နှစ်အရွယ် ကိုဇူနီကာ နဲ့ အသက် ၂၆ နှစ်အရွယ် ကိုကာလာဘီ တို့ဖြစ်ကြပြီးတော့ အဲဒီ ၃ ယောက်စလုံးဟာ မာရမာကြီးလူမျိုး တွေ ဖြစ်ကြတယ်လို့ ဆိုပါတယ်။
လက်ရှိမှာ အဲဒီဖမ်းဆီးထားတဲ့ ပြည်သူ ၃ ဦးကို စောမြရာဇာလင်းဦးဆောင်တဲ့ ALP က စစ်တွေမြို့စက်ရုံစုရပ်ကွက်မှာရှိတဲ့ ALP ရုံးချုပ်မှာ ထိန်းသိမ်းထားပြီး မိသားစုတွေ နဲ့ လည်း တွေ့ခွင့်မပေးဘဲ ထားရှိထားတယ်လို့ ဖမ်းဆီးခံရသူ ၃ ဦးရဲ့ မိသားစုဝင်တွေ နဲ့ နီးစပ်သူ ဒေသခံတစ်ဦးကပြောပါတယ်။
“မလွတ်သေးဘူး လွတ်ဖို့မဆိုနဲ့ မိသားစုတွေ တွေ့ခွင့်တောင်မရဘူး။သူတို့ ရုံးကို သွားတော့ ရုံးခြံထဲတောင်ဝင်ခွင့်မရဘူး ။ဘာမှလည်းပို့ပေးလို့ မရဘူး သူတို့ပြောတာကတော့ အေအေ ကို ဒီက လုပ်ဆောင်တဲ့ အခြေအနေတွေနဲ့ပတ်သက်ပြီး သတင်းပေးတယ်ဆိုပြီးတော့ စွပ်စွဲပြီးဖမ်းတာပေါ့။စိုးရိမ်တာကတော့ ပြောစရာတောင်မလိုဘူး မိသားစုတွေက မျပ်ရည်နဲ့မျက်ခွက်ပဲ။တွေ့ခွင့်ပေးပါတောင်းတာတောင် ခြံထဲတောင် ဝင်ခွင့်မရဘူး”လို့ သူကပြောပါတယ်။
အဲဒီလို ALPက ဖမ်းဆီးထားတဲ့ ဒေသခံ ၃ ဦးဟာ ဒေသအတွင်းမှာ အေးအေးဆေးဆေး နဲ့ လက်လုပ်လက်စားဒေသခံတွေ ဖြစ်ကြတယ်လို့လည်း ဒေသခံတွေက ပြောပါတယ်။
စောမြရာဇာလင်းဦးဆောင်တဲ့ ရခိုင်ပြည်လွတ်မြောက်ရေးပါတီ (ALP) တနည်းအားဖြင့် ငြိမ်းတပ်မြတ်တော်ဟာ ရခိုင်တကျော့ပြန်တိုက်ပွဲ စတင်ချိန်ကတည်းကပင် စစ်တွေမှာစစ်ကောင်စီတပ်တွေ နဲ့ အတူ ပူပေါင်းကာ အရပ်သားပြည်သူတွေကို ဖမ်းဆီးတာ ၊ ငွေတောင်းခံတာ စတာတွေ အပြင်စစ်သားစုဆောင်းတာ ၊ စစ်သင်တန်းပေးတာ စတာတွေကိုစစ်ကောင်စီတပ်တွေ အားကိုး နဲ့ ဆက်တိုက်လုပ်ဆောင်တာတွေ ရှိနေတယ်လို့လည်း ဒေသခံတွေက ပြောပါတယ်။
ပြီးခဲ့တဲ့ ဖေဖော်ဝါရီလအတွင်းကလည်း စစ်တွေမြို့၊ မင်းဂံရပ်ကွက်က လူငယ်တချို့ကို စောမြရာဇာလင်းဦးဆောင်တဲ့ ရခိုင်ပြည်လွတ်မြောက်ရေးပါတီ (ALP) တနည်းအားဖြင့် ငြိမ်းတပ်မြတ်တော်က ဖမ်းဆီးတာတွေ လုပ်ဆောင်ခဲ့ပြီး ငွေပေးနိုင်သူ တချို့ကို ပြန်လွတ်ပေးကာ ငွေမပေးနိုင်တဲ့ သူတချို့ကိုတော့ စစ်ကောင်စီတပ်တွေ အတွက် စစ်သားစုဆောင်းပြီးတော့ ရှေ့တန်းစစ်မြေပြင်လို နေရာတွေမှာ ပို့ဆောင်ထားတာတွေ ရှိနေတယ်လို့ စစ်တွေမြို့က စစ်ရေး အခြေ အနေကို စောင့်ကြည့် လေ့လာနေသူ တစ်ဦးကပြောပါတယ်။
“သူတို့လုပ်ကွက်အတိုင်းလုပ်နေတာပါ ဒီဟာက ဖမ်းတယ် ငွေတောင်းတယ် မရရင် စစ်သင်တန်းပေးတယ် စစ်မြေ ပြင်ကို ပို့တယ် အခုမှ လုပ်တာတော့မဟုတ်ဘူး တိုက်ပွဲဖြစ်ကတည်းကပင် လုပ်နေတာ။အဲဒီလိုမျိုး နဲ့ ပို့ခံရတဲ့ သူတွေလည်း မနည်းတော့ဘူး။တချို့ထွက်ပြေးတဲ့ ကလေးတွေလည်းရှိတယ် ။လွတ်တာနည်းတယ် မလွတ်ရင် ရိုက်နှက်ပြီး နှိပ်စက်တယ် ကြားတာတော့ သေတဲ့ ကလေးတွေလည်းတော်တော် ရှိနေတယ်လို့ကြားတယ် ထွက်ပြေးလို့ မလွတ်လို့ ရိုက်နှက်တာ စာရင်းအတိကျတော့ မရှိသေးဘူးပေါ့”လို့ သူကပြောပါတယ်။
စောမြရာဇာလင်းကတော့ ပြီးခဲ့တဲ့ ရက်ပိုင်းက (NSPNC) ဉီးဆောင်မှု နဲ့ နေပြည်တော်မှာကျင်းပနေတဲ့ ငြိမ်းချမ်းရေးဆွေးနွေပွဲအပြီး မှာ သူ့ အနေ နဲ့ ငြိမ်းချမ်းရေးကို အားသွန်ခွန်စိုက် လုပ်နေတာဟာ မိသားစု နဲ့ ပါတီအတွက်သာ လုပ်နေတာမဟုတ်ဘဲ နိုင်ငံထဲမှာ ရှိနေကြတဲ့ ပြည်သူလူထုတရပ်လုံးအတွက် လုပ်ဆောင်နေတာ ဖြစ်တယ်လို့ ဆိုထားပါတယ်။
