UWSA “ဝ”တပ်ဖွဲ့က ငလျင်ဘေးသင့်ဒေသတွေအတွက် ကျပ်သန်းပေါင်း(၂ဝဝဝ)လှူဒါန်းမယ်လို့ မြန်မာနိုင်ငံ အထူးဒေသ(၂) “ဝ” ပြည်နယ် ပြည်သူ့အစိုးရက ထုတ်ပြန်လာပါတယ်။
မနေ့ မတ်လ ၂၈ရက်နေ့တုန်းကဖြစ်ပွားခဲ့တဲ့ အင်အားရစ်(ချ်)တာစကေး ၇ ဒဿမ ၇ အဆင့်ရှိတဲ့ မြေငလျင်လှုပ်ခတ်မှုဖြစ်စဉ်ဟာ နိုင်ငံတစ်ဝန်းလုံးနဲ့ အိမ်နီးချင်းနိုင်ငံတွေကိုပါ ကြီးမားတဲ့ အသက်အိုးအိမ်စည်းစိမ် ပျက်စီးဆုံးရှုံးမှုကြီးဖြစ်ပေါ်စေခဲ့တယ်လို့ UWSAက ဆိုပါတယ်။
ဒီအပေါ် “ဝ”ပြည်နယ်အနေနဲ့ ငလျင်ဘေး သင့်တဲ့ တိုင်းရင်းသား မိဘညီအစ်ကိုမောင်နှမတွေအားလုံးနဲ့အတူ ထပ်တူထပ်မျှ ဝမ်းနည်းရတယ်လို့ ထုတ်ပြန်ထားပါတယ်။
ဒါ့အပြင် “ဝ”ပြည်နယ်အနေနဲ့ သဘာဝဘေးသင့် ပြည်သူတွေနဲ့အတူ အခက်အခဲတွေကို ရင်ဆိုင်ကျော်ဖြတ်နိုင်ဖို့အတွက် အရေးပေါ် ကယ်ဆယ်ရေးနဲ့ပြန်လည်ထူထောင်ရေးလုပ်ငန်းတွေမှာ ပါဝင်ဆောင်ရွက်ကြဖို့တိုက်တွန်းသလို၊ သက်ဆိုင်ရာဌာနတွေက တောင်းဆိုလာမယ်ဆိုရင် အရေးပေါ်ကယ်ဆယ်ရေးအဖွဲ့ကို စေလွှတ်ဖို့ အသင့်ဖွဲ့စည်းပြင်ဆင်ထားတယ်လို့လည်း အသိပေးထားပါတယ်။
ယခုလို ပြင်းထန်တဲ့ သဘာဝဘေးအန္တရာယ်နဲ့ ကြုံတွေ့နေရတဲ့ အချိန်ကာလမျိုးမှာ သဘောထားအမြင်ကွဲလွဲနေကြတဲ့ အဘက်ဘက်တွေအနေနဲ့ နိုင်ငံရေး၊ စစ်ရေးပြဿနာတွေကို ဘေးဖယ်ထားပြီး လူသားချင်းစာနာထောက်ထားတဲ့ စိတ်ဓါတ်ဖြင့် ကယ်ဆယ်ရေးလုပ်ငန်းတွေကို အင်တိုက်အားတိုက် ပါဝင်ဆောင်ရွက်ကြဖို့လည်း တိုက်တွန်းထားပါတယ်။
စစ်ပွဲဒဏ်သာမက သဘာဝဘေးအန္တရာယ်ဒဏ်ကိုပါခံစားနေရတဲ့ ပြည်သူတွေကို အချိန်မီကယ်ဆယ်နိုင်ဖို့အတွက် အဟန့်အထားမရှိတဲ့ ကူညီပံ့ပိုးမှုနဲ့ သဘာဝဘေး အန္တရာယ်ပြီးနောက် ပြန်လည်ထူထောင်ရေးလုပ်ငန်းတွေကိုဆောက်ရွက်ဖို့ မျှော်လင့်ထားတယ်လို့လည်း UWSAက ဆိုပါတယ်။
ဒီနေ့ မနက်ပိုင်းအထိ စစ်ကောင်စီရဲ့ သတင်းထုတ်ပြန်ချက်အရ မန္တလေးတိုင်းတစ်ခုတည်းမှာတင် ငလျင်ဒဏ်ကြောင့် သေဆုံးခဲ့ရသူ ၆၉၄ ဦး၊ ဒဏ်ရာရရှိသူ ၁၆၇၀ ဦးနဲ့ ပျောက်ဆုံးနေသူ ၆၈ ဦးထိရှိနေတယ်လို့ ထုတ်ပြန်ထားပါတယ်။
