CNA ၊ မြတ်သူ။
မြန်မာနိုင်ငံတဝှမ်းမှာ စစ်ကောင်စီက အာဏာသိမ်းပြီးနောက်ပိုင်း အရပ်သားပြည်သူတွေ နေထိုင်တဲ့ နေရာတွေကို ပစ်မှတ်ထားကာ လက်နက်ကြီးတွေ နဲ့ ပစ်ခတ်တိုက်ခိုက်ခဲ့တာကြောင့် ၄ နှစ်အတွင်း ရခိုင်မှာ လက်နက်ကြီးကြောင့် အရပ်သားပြည်သူဦးရေ ၁၈၁ ဦးသေဆုံးခဲ့ရတယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP က သတင်းထုတ်ပြန်လာပါတယ်။
အခုလက်ရှိကောက်ယူထားတဲ့ စာရင်းဟာ AAPP အနေ နဲ့ ၂၀၂၁ ခုနှစ် အာဏာ သိမ်းပြီးနောက်ကနေ ၂၀၂၅ ခုနှစ် မတ်လ ၃၁ ရက်နေ့အထိကောက်ယူထားတဲ့ စာရင်းတွေ ဖြစ်တယ်လို့ ဆိုပါတယ်။တနိုင်ငံလုံး အတိုင်းအတာ အနေ နဲ့ တော့ အာဏာသိမ်းစစ်ကောင်စီရဲ့လက်နက်ကြီး ပစ်ခတ်မှုကြောင့် သေဆုံးခဲ့ရသူ ဦးရေဟာ (၁၁၃၃) ဦးရှိခဲ့တယ်လို့ ဆိုပါတယ်။
သေဆုံးခဲ့ရတဲ့ နေရာဒေသတွေက တော့ စစ်ကိုင်းမှာ ၂၈၁ ဦး၊ရခိုင်မှာ ၁၈၁ ဦး၊ပဲခူးမှာ ၁၃၂ ဦး မကွေးမှာ ၁၁၆ ဦး၊ရှမ်းမှာ ၉၃ ဦး၊မွန်မှာ ၆၃ ဦး၊ မန္တလေးမှာ ၆၃ ဦး၊ကချင်မှာ ၅၇ ဦး၊ တနင်္သာရီမှာ ၄၉ ဦး၊ ကရင်မှာ ၄၇ ဦး၊ကယားမှာ ၂၇ ဦး၊ချင်းမှာ ၂၁ ဦး၊ရန်ကုန်မှာ ၂ ဦး နဲ့ ဧရာဝတီမှာ ၁ ဦး စုစုပေါင်း (၁၁၃၃) ဦးရှိပြီးတော့ စစ်ကိုင်ဟာ သေဆုံးမှု အများဆုံး ဖြစ်တဲ့ နေရာတစ်ဖြစ်သလို ရခိုင်ကတော့ သေဆုံးမှု ဒုတိယ အများဆုံးနေရာဖြစ်တယ်လို့ ဖော်ပြထားပါတယ်။
အဲဒီ သေဆုံးသူ (၁၁၃၃) ဦးထဲမှာ အမျိုးသမီး ( ၅၂၂ )ဦး အမျိုးသား (၆၁၁) ဦးပါဝင်ပြီးတော့ ဒီ အမျိုးသမီး နဲ့ အမျိုးသားတွေထဲမှာ အသက် ၁၈ နှစ်အောက် သေဆုံးခဲ့ရတဲ့ ကလေးငယ် ၂၁၇ ဦးထိ ပါဝင်နေသေးတယ်လို့ ဆိုထားပါတယ်။
လက်ရှိ ဒီသေဆုံးခဲ့တဲ့ အရပ်သားပြည်သူ (၁၁၃၃) ကို နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP အနေ နဲ့ နာမည်တွေ နဲ့ တကွ စာရင်းကောက်ယူနိုင်ခဲ့တာ ဖြစ်ပြီးတော့ နောက်ထပ် အတည်ပြုဖို့ လိုအပ်နေသေးတဲ့ သေဆုံးသူ ဦးရေ ၉၀၃ ဦးထိ ရှိနေသေးတယ်လို့လည်း ဖော်ပြထားပါတယ်။
မြန်မာနိုင်ငံ အတွင်းမှာ စစ်ကောင်စီရဲ့ မတရားအာဏာသိမ်းမှုကို ပြည်သူတွေ အနေ နဲ့ လက်မခံတဲ့အတွက် အာဏာသိမ်းစစ်တပ်ကို မြန်မာနိုင်ငံအနှံ့ က ပြည်သူတွေဟာ ဆန့်ကျင်တော်လှန်မှုတွေ အရှိန် အဟုန်နဲ့ လုပ်ဆောင်လာပြီးနောက်ပိုင်းမှာ စစ်ကောင်စီတပ်တွေဟာ သူတို့ကို ဆန့်ကျင်တော်လှန်တဲ့ သူတွေကို အင်အားသုံးဖြိုခွင်းတာ၊အကြမ်းဖက်နှိမ်နင်းတာတွေ ကို တိုးမြှင့်လုပ်ဆောင်ခဲ့ပါတယ်။
အဲဒီလို လုပ်ဆောင်တဲ့ နေရာမှာ စစ်ကောင်စီ အနေ နဲ့ လက်နက်ကိုင်တော်လှန်ရေး ပြင်းထန်တဲ့ ဒေသတွေမှာ စစ်ရေးပစ်မှတ်မဟုတ်တဲ့ အရပ်သားတွေ နေထိုင်ရာ ရပ်ကွက်၊ ကျေးရွာတွေကိုလက်နက်ကြီးတွေ နဲ့ ပစ်ခတ်တာ၊ လေကြောင်းတိုက်ခိုက်တာတွေကို ဆက်တိုက်ကျူးလွန်တာ ရှိခဲ့ပြီးတော့ အရပ်သားထိခိုက်၊ သေဆုံးတာ နဲ့ နေအိမ်အဆောက်အဦးတွေ ပျက်စီးမှုတွေဟာလည်း နေ့စဉ်ကြုံတွေ့ခဲ့ရတယ်လို့ ဆိုပါတယ်။
အခုလို စစ်ကောင်စီက လုပ်ဆောင်တာဟာ အပြည်ပြည်ဆိုင်ရာ လူ့အခွင့်အရေးဥပဒေအရ စစ်ပွဲအခြေအနေတွေမှာပင် အရပ်သားပြည်သူတွေ ရဲ့ အခြေခံလူ့အခွင့်အရေးတွေကို ကာကွယ်ပေးရမယ်ဆိုတာကို ဆန့်ကျင်ကာ အရပ်သား ပြည်သူတွေကို မကာကွယ်တဲ့ အပြင် ပစ်မှတ်ထားတိုက်ခိုက်တာတွေကို လုပ်ဆောင်နေခဲ့တာလည်း ဖြစ်တယ်လို့လည်း ဆိုပါတယ်။
ဒါ့အပြင် မြန်မာနိုင်ငံက လက်မှတ်ရေးထိုးထားတဲ့ ဂျီနီဗာကွန်ဗင်းရှင်းအပါအဝင် အပြည်ပြည်ဆိုင်ရာ လူသားချင်းစာနာ ထောက်ထားမှုဥပဒေအရလည်း စစ်ပွဲတွင်မပါဝင်တဲ့သူတွေကို ကာကွယ်စောင့်ရှောက်ရမယ်လို့ ပြဌာန်းထားပါတယ်။
ဒါပေမယ့် စစ်ကောင်စီဟာ စစ်ဘက်၊အရပ်ဘက် ခွဲခြားတာမရှိပဲ တိုက်ခိုက်မှုပြုလုပ်တာ၊ အရပ်သားပိုင်ပစ္စည်းတွေကို ပစ်မှတ်ထားဖျက်ဆီးတာ အင်အားအ လွန်အကျွံသုံး ပြီးတော့ အကြမ်းဖက်မှုတွေကို ကျူးလွန်တာတွေ ကြောင့် အရပ်သားပြည်သူတွေဟာ မိမိ နေရပ်ကိုစွန့်ခွာတိမ်းရှောင်ခဲ့ရပြီးတော့ အသက်အန္တရာယ်မလုံခြုံမှုတွေ နဲ့ နောက်ဆက်တွဲ ဆင်းရဲဒုက္ခအခက်အခဲတွေကို ရင်ဆိုင်ကြုံတွေ့နေကြရတယ်လို့လည်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP က ထုတ်ပြန်ပြောဆိုထားပါတယ်။
