ဘင်္ဂလားပင်လယ်အော် စီးပွားရေးနှင့် နည်းပညာဆိုင်ရာ ဘက်စုံပူးပေါင်းဆောင်ရွက်ရေးအဖွဲ့ (BIMSTEC) ထိပ်သီးအစည်းအဝေးကိုတက်ရောက်ဖို့အတွက် စစ်ခေါင်းဆောင်မင်းအောင်လှိုင်ဟာ ဒီကနေ့မှာ ထိုင်းနိုင်ငံကို ရောက်ရှိလာမယ်လို့ စစ်ကောင်စီက သတင်းထုတ်ပြန်ပါတယ်။
ဧပြီလ ၃ရက်နဲ့ ၄ရက်နေ့တွေမှာ ထိုင်းနိုင်ငံ၊ ဘန်ကောက်မြို့မှာ ကျင်းပမယ့် BIMSTECအစည်းအဝေးကို စစ်ခေါင်းဆောင် မင်းအောင်လှိုင် တက်ရောက်သွားမှာလို့ စစ်ကောင်စီက ဆိုပါတယ်။
အဲ့ဒီအစည်းအဝေးမှာ အစိုးအဖွဲ့အကြီးအကဲတွေနဲ့ တွေ့ဆုံဆွေးနွေးပြီး မြန်မာနိုင်ငံရဲ့ ငလျင်ဒဏ်အခြေအနေတွေ၊ ကူညီကယ်ဆယ်ရေးနဲ့ ပြန်လည်ထူထောင်ရေးလုပ်ငန်းတွေကို ထိရောက်စွာဆောင်ရွက်နိုင်ဖို့အတွက် နိုင်ငံတကာနဲ့ ပူးပေါင်းဆောင်ရွက်မယ့် အခြေအနေတွေကို ဆွေးနွေးသွားမယ်လို့ စစ်ကောင်စီက ထုတ်ပြန်ထားပါတယ်။
ယခုအစည်းအဝေးဟာ စစ်အာဏာသိမ်းပြီးနောက်ပိုင်း စစ်ခေါင်းဆောင် မင်းအောင်လှိုင်ရဲ့ ထိုင်းနိုင်ငံ၊ ဘန်ကောက်မြို့ကိုသွားတဲ့ ပထမဆုံးခရီးစဉ်လည်းဖြစ်လာပါတယ်။
ဒီခရီးစဉ်ကို နိုင်ငံတကာလူ့အခွင့်အရေးအဖွဲ့တွေနဲ့ မြန်မာဒေသတွင်း ဒီမိုကရေစီအင်အားစုအဖွဲ့အစည်းများစွာက ထိုင်းဝန်ကြီးချုပ် ပေထုံတန်အနေနဲ့ မင်းအောင်လှိုင်နဲ့ ထိတွေ့ဆက်ဆံမှုကို အထူးသတိထားသင့်ကြောင်း၊ မင်းအောင်လှိုင်ရဲ့ BIMSTEC အစည်းအဝေး ခရီးစဉ်ကို ကန့်ကွက်ကြောင်း၊ မြန်မာအတွက် စစ်ကောင်စီဟာ တရားဝင်မှုမရှိကြောင်းနဲ့ စစ်ကောင်စီရဲ့ စစ်ရာဇဝတ်မှုတွေကို ဆန့်ကျင်ကန့်ကွက်ဖို့ ထုတ်ပြန်တောင်းဆိုထားတာတွေရှိခဲ့ပါတယ်။
ဒီခရီးစဉ်မတိုင်မှာ စစ်ကောင်စီဟာ ဘားအံအကျဉ်းထောင်မှာ ဖမ်းဆီးထားတဲ့ ထိုင်းရေလုပ်သား ၄ဦးနဲ့ ဖိလစ်ပိုင်နိုင်ငံသား ၃ဦးကို ပြစ်ဒဏ်လွတ်ငြိမ်းခွင့်ပေးခဲ့တာရှိခဲ့ပါတယ်။
