ကျိန္တလီမြို့နယ် အတွင်းက ဒေသခံ တစ်ဦးမှ မနေ့က ညနေမှာ သူနေထိုင်ရာ ပုန်းညက်ကျေးရွာကနေ မော်ဖျားသွားရာလမ်းမှာ စစ်ကောင်စီထောင် ထားတဲ့ မိုင်းကို နင်းမိပြီး ခြေထောက်တစ်ဖက် ပြတ်ထွက် ဒဏ်ရာ ရရှိသွားခဲ့ရတယ်လို့ ပုန်းညက်ကျေးရွာ ဒေသခံတွေ ဆီက သိရပါတယ်၊
အဲဒီခြေထောက်တစ်ဖက် ပြတ်ထွက်ဒဏ်ရာ ရရှိသွားတဲ့ သူမှာ ကျိန္တလီမြို့နယ် ပုန်းညက်ကျေးရွာ ဒေသခံ အသက် ၄၁ နှစ်အရွယ် ကိုကြီး ဆိုသူဖြစ်ပြီး ကျေးရွာကနေ မော်ဖျားသွားရာ လမ်းမှာ စစ်ကောင်စီ ထောင်ထားတဲ့ မိုင်းကို နင်းမိပြီး ညာခြေထောက်တစ်ဖက် ပြတ်ထွ က်သွားခဲ့ရတာ ဖြစ်တယ်လို့ အဲဒီကျေးရွာ ဒေသခံ တစ်ဦးကပြောပါတယ်။
“ရွာကနေပြီးတော့ မော်ဖျားကိုသွားတဲ့ လမ်းမှာ စစ်ကောင်စီတပ်တွေ ထောင်ထားတဲ့ မိုင်းကို နင်းမိပြီး ခြေထောက်တစ်ဖက်ပြတ်ထွက် သွားတာပါ။လူနာကတော့ အခုဆေးရုံကို ပို့ ပြီးတော့ ဆေးကုသပေးထားတယ်”လို့ သူကပြောပါတယ်။တိုက်ပွဲ တစ်စုံတစ်ရာ ဖြစ်ပွါးတာ မရှိသေးတဲ့ ကျိန္တလီမြို့ နဲ့ ဂွ မြို့နယ် အတွင်းမှာ စစ်ကောင်စီတပ်တွေ မြို့နယ် နဲ့ ကျေးရွာ အများစု တွေမှာ တပ်စွဲ နေထိုင်လာပြီးနောက် အခုလို အရပ်သားပြည်သူတွေ မိုင်းနင်းမိတာတွေ နဲ့ ဆက်တိုက် ရင်ဆိုင်နေရတာလည်း ဖြစ်ပါတယ်။
ပြီးခဲ့တဲ့ ဇူလိုင်လ ၂၄ ရက်နေ့ကလည်း ကျိန္တလီမြို့ အမှတ် (၂) ရပ်ကွက် အတွင်းမှာ နေထိုင်သူ တစ်ဦးဖြစ်တဲ့ အသက် ၂၈ အရွယ် ကိုပေါက်ကျိုင်း ဆိုသူဟာ နေအိမ်အတွင်းကနေ ဒညှင်းသီးခူးဖို့ သွားရာ လမ်းမှာ စစ် ကောင်စီက ထောင်ထားတဲ့ မိုင်းကို နင်းမိပြီး ခြေထောက် နှစ်ဖက်လုံးပြတ်ထွက်ကာ အသက်ပါသေဆုံးသွား ခဲ့ရတာဖြစ်ခဲ့ရပါတယ်။
ဒါ့အပြင် ဇူလိုင်လ ၃ ရက်နေ့နဲ့ ဇူလိုင်လ ၇ ရက်နေ့တွေ မှာလည်း စစ်ကောင်စီထောင်ထားတဲ့ မိုင်းကို နင်းမိပြီး ဟင်းစား ရှာဖွယ်ဖို့ သွားတဲ့ အရပ်သားနှစ်ဦးဟာ ကိုယ်လက် အင်္ဂါ ဆုံးရှုံးမှုတွေလည်း ရှိခဲ့ရပါသေးတယ်။
စစ်ကောင်စီတပ်တွေဟာ သူတို့နေထိုင်ရာ စစ်စခန်းအနီးဝန်းကျင်တွေမှာ သာမက အရပ်သားပြည်သူတွေ နေထိုင်ရာ ရပ်ကွက်တွေ လမ်းတွေ နဲ့ ဥယျာဉ်ခြံတွေမှာပါမိုင်းထောင်လာတာကြောင့် ပြည်သူတွေ အနေ နဲ့ စားဝတ်နေရေး အတွက် ရှာဖွယ်စားသောက်ဖို့ များစွာ အခက်အခဲ ရှိလာနေရတဲ့ အနေအခြေမှာ ရှိနေတယ်လို့လည်းပြောဆိုကြပါတယ်။
