CNA ၊ မြတ်သူ။
တောင်ကုတ်မြို့နယ်အတွင်းက သိမ်းတောင်ရပ်ကွက်မှာ စစ်ပွဲအတွင်းက ကျန်နေခဲ့တဲ့ စစ်ကျန်လက်နက်ပေါက်ကွဲပြီးတော့ အသက် ၉ နှစ်အရွယ် ကလေးငယ် တစ်ဦး ဒဏ်ရာ ရရှိခဲ့တယ်လို့ဒေသခံတွေက ပြောပါတယ်။
ဒဏ်ရာ ရရှိသွားတဲ့ အသက် ၉ နှစ်အရွယ် ကလေးငယ်မှာ သိမ်းတောင်ရပ်ကွက် က မောင်နေစိုးသူ ဆိုတဲ့ ကလေးငယ်ဖြစ်ပြီး ချောင်းကမ်းနံဘေးက ကောက်ယူလာတဲ့ ဗုံးသီးကို ဆော့ကစားရာကနေ ပေါက်ကွဲပြီး ဘယ်ဘက်ခြေထောက်မှာ ဒဏ်ရာရရှိသွားခဲ့ရတာ ဖြစ်တယ်လို့ တောင်ကုတ်မြို့ခံတစ်ဦးကပြောပါတယ်။
“အဲဒီဗုံးသီးက ချောင်းကမ်းဘေးက ကောက်ယူလာတာလို့သိရတယ်။ အဲဒီဗုံးသီးကို အပေါ်ကိုမြှောက်ပြီးတော့ ဆော့ကစားရာကနေ ပေါက်ကွဲပြီးဘယ်ဘက်ခြေထောက်ဒဏ်ရာ ရသွားတာဖြစ်သွားတယ်။အခုတော့ ဆေးဝါးကုသတာတွေ လုပ်ပေးနေတယ်“လို့ သူကပြောပါတယ်။
ပြီးခဲ့တဲ့ ဖေဖော်ဝါရီလ ၆ ရက်နေ့ကလည်း ခမရ ၃၄၆ တပ်အနီးမှာရှိတဲ့ နေအိမ်ခြံ အတွင်းကို ထင်းခွေဖို့အသွားတဲ့ တောင်ကုတ်မြို့ ကံပိုင်ရပ်ကွက်အတွင်းက ဒေါ်ခင်မျိုးချေဆိုတဲ့ အမျိုးသမီးတစ်ဦးဟာ စစ်ကောင်စီတပ်တွေ ထောင်ထားခဲ့တဲ့ မြေမြုပ်မိုင်းကိုနင်းမိပြီးတော့ ဘယ်ဘက်ခြေထောက်ပြတ်သွားခဲ့ရတာလည်း ရှိခဲ့ပါသေးတယ်။
အဲဒီလိုဘဲ ဖေဖော်ဝါရီလ ၃ ရက်နေ့ကလည်း ဂွမြို့နယ်အတွင်းက တိုင်ကျိုးကျေးရွာ မှာ စစ်ပွဲအတွင်းက ကျန်နေခဲ့တဲ့ စစ်ကျန်ဗုံးသီးကို ဆော့ကစားရာကနေ ပေါက်ကွဲပြီးတော့ ကလေးငယ် တစ်ဦး အပါအဝင် ၃ ဦးသေဆုံးခဲ့ရပြီး ၂ ဦးဒဏ်ရာ အပြင်းအထန် ရရှိတာ ရှိခဲ့ပါသေးတယ်။
အာရက္ခတပ်တော်ဟာ ရခိုင်တောင်ပိုင်းအတွင်းက တောင်ကုတ်၊ရမ်းဗြဲ၊သံတွဲ ၊ဂွ နဲ့ အမ်းမြို့နယ်တွေကို အပြီးသတ်သိမ်းပိုက် ရရှိထားပြီးဖြစ်ပေမယ့် အဲဒီသိမ်းပိုက် ရရှိထားတဲ့ ဒေသတွေ အတွင်းမှာ အာရက္ခတပ်တော် အနေ နဲ့မိုင်းရှင်းလင်းရေး နဲ့ မိုင်းအသိပညာပေး လုပ်ဆောင်မှုတွေကို ထိရောက်စွာ မလုပ်ဆောင်နိုင်သေးတဲ့ အတွက် စစ်ကျန်လက်နက်တွေ ပေါက်ကွဲမှုကြောင့် ဒီရက်ပိုင်း အတွင်းမှာ ပြည်သူလူထုတွေ သေဆုံးဒဏ်ရာ ရတာတွေ ဆက်တိုက်ရှိလာနေတယ်လို့လည်း ဒေသအတွင်းက စစ်ဘေးရှောင် အရေး ဆောင်ရွက်နေသူတွေက ပြောပါတယ်။
“စစ်ကျန်လက်နက်ရှင်းလင်းတာ နဲ့ အသိပညာပေးတာတွေက မလုပ်တာတော့ မဟုတ်ဘူး လုပ်နေတာတွေ ရှိတယ် ဒါပေမယ့် အားနည်းမှုရှိနေတယ်၊ ဒီကိစ္စကို တပ်တော်က ဒီထက်နည်းနည်း ထိထိရောက်ရောက်လုပ်ဖို့လိုအပ်လာတယ်။အခုက ပြည်သူတချိူ့က နေရပ်ပြန်ခွင့်ရတော့ စစ်ပွဲအတွင်းက ကျန်နေတဲ့ ပစ္စည်းတွေကို ဘာမှန်းမသိ ကောက်ပြီးတော့ ကလေးတွေကိုဆော့ဖို့ပေးတာ ကလေးတွေကိုယ်တိုင်ကလည်း ကိုယ်တိုင်ကောက်ပြီးတော့ ကစားတာတွေ ရှိလာတော့ ဒီကိစ္စကို သေသေချာချာ အသိပညာပေးလုပ်ဖို့ လိုအပ်လာနေတယ်”လို့ သူက တောင်းဆိုပါတယ်။
မြန်မာနိုင်ငံအတွင်းမှာ ပြီးခဲ့တဲ့ ၂၀၂၄ ခုနှစ် ဇန်နဝါရီလကနေ စက်တင်ဘာလ အထိကောက်ယူထားတဲ့ စာရင်းတွေ အရ မြန်မာနိုင်ငံတွင်မှာ မြေမြှုပ်မိုင်း နဲ့ ပေါက်ကွဲစေတတ်တဲ့ စစ်ကျန် လက်နက်ပစ္စည်းများပေါက်ကွဲမှုကြောင့် အရပ်သား သေဆုံးဒဏ်ရာရသူ ၈၈၉ ဦးအထိရှိခဲ့တယ်လို့ ကုလသမဂ္ဂကလေးများရံပုံငွေအဖွဲ့က ထုတ်ပြန်ပြောဆိုထားပါတယ်။
