CNA ၊ မြတ်သူ။
အာရက္ခတပ်တော်က အပြီးသတ်သိမ်းပိုက်ထားပြီးဖြစ်တဲ့ တောင်ကုတ်မြို့အတွင်းမှာ တိုက်ပွဲအတွင်းကမပေါက်ကွဲဘဲ ကျနေရှိနေခဲ့တဲ့ စစ်ကျန်လက်နက်တွေပေါက်ကွဲတာကြောင့် ဒေသခံပြည်သူတွေ ကိုယ်လက်အင်္ဂါဆုံးရှုံးမှု ပိုများလာနေတယ်လို့ ဒေသခံတွေက ပြောပါတယ်။
တောင်ကုတ်မြို့နယ်အတွင်းမှာ ပြီးခဲ့တဲ့ ဖေဖော်ဝါရီလ ၆ ရက်နေ့ကလည်း ခမရ ၃၄၆ တပ်အနီးမှာရှိတဲ့ နေအိမ်ခြံဝင်းအတွင်းမှာ ထင်းခွေရာကနေ စစ်ပွဲအတွင်းမှာ စစ်ကောင်စီတပ်တွေ ထောင်ထားခဲ့တဲ့ မိုင်းကိုနင်းမိလို့ တောင်ကုတ်မြို့ ကံပိုင်ရပ်ကွက်အတွင်းက ဒေါ်ခင်မျိုးချေဆိုတဲ့အမျိုးသမီးတစ်ဦးဟာခြေထောက် ပြတ်ထွက် ဒဏ်ရာ ရရှိသွားခဲ့ရပါတယ်။
အဲဒီလိုဘဲ ဖေဖော်ဝါရီလ ၉ ရက်နေ့မှာလည်း တောင်ကုတ်မြို့ချောင်းကမ်းနံဘေးက ကောက်ယူလာတဲ့ စစ်ကျန်လက်နက်ကို ဆော့ကစားရာကနေ ပေါက်ကွဲတာ
ကြောင့် တောင်ကုတ်မြို့ သိမ်းတောင်ရပ်ကွက် က အသက် ၉ နှစ်အရွယ် မောင်နေစိုးသူ ဆိုတဲ့ ကလေးငယ်ဟာလည်း ခြေထောင်တစ်ဖက် ဒဏ်ရာ ရရှိခဲ့ရပါတယ်။
အဲဒီလိုဘဲ ဖေဖော်ဝါရီလ ၁၅ ရက်နေ့ကလည်း တောင်ကုတ်မြို့ ကံပိုင်ရပ်ကွက်က ဝါးခုတ်သွားတဲ့ ကိုမင်းဝေ ဆိုတဲ့သူဟာ စစ်ပွဲအတွင်းက စစ်ကောင်စီထောင်ထားတဲ့ မိုင်းကို နင်းမိလို့ခြေထောက်တစ်ဖက်ပြတ်ထွက်သွားခဲ့ရတယ်လို့ တောင်ကုတ်ဒေသခံတစ်ဦးကပြောပါတယ်။
“ဟုတ်ပါတယ် သူမနေ့က ဝါးခုတ်သွားတာ မိုင်းနင်းမိလို့ ညာဖက်ခြေထောက်တစ်ဖက်ပြတ်သွားခဲ့ရတယ်။ဒီလအထဲမှာက စစ်ကျန်လက်နက်ကြောင့်လူတွေ ထိခိုက်မှုများလာတယ်။ လူတွေ ရှာဖွေစားသောက်မဲ့နေရာတော်တော်များများမှာက စစ်ကောင်စီတပ်တွေက မိုင်းထောင်ထားခဲ့တယ်။တပ်တော်ကလည်း မိုင်းရှင်းလင်းရေးကို ထိထိရောက်ရောက်မလုပ်နိုင်သေးဘူးလို့မြင်တယ်။အဲဒါကြောင့် စစ်ကျန်လက်နက်အသိပညာပေး နဲ့ မိုင်းရှင်းလင်းရေး ကိစ္စကို ထိထိရောက်ရောက် ကိုင်တွယ်သင့်တယ်လို့ မြင်မိတယ်” လို့ သူကပြောပါတယ်။
အာရက္ခတပ်တော်ဟာ ရခိုင်တောင်ပိုင်းအတွင်းက တောင်ကုတ်၊ရမ်းဗြဲ၊သံတွဲ ၊ဂွ နဲ့ အမ်းမြို့နယ်တွေကို အပြီးသတ်သိမ်းပိုက် ရရှိထားပြီးဖြစ်ပေမယ့် အဲဒီသိမ်းပိုက် ရရှိထားတဲ့ ဒေသတွေ အတွင်းမှာ အာရက္ခတပ်တော် အနေ နဲ့မိုင်းရှင်းလင်းရေး နဲ့ မိုင်းအသိပညာပေး လုပ်ဆောင်မှုတွေကို ထိရောက်စွာ မလုပ်ဆောင်နိုင်သေးတဲ့ အတွက် မိုင်းရှင်းလင်းရေးတွေကို လုပ်ဆောင်ပေးဖို့အတွက် ဒေသခံတွေက လိုလားနေကြကတာဖြစ်ပါတယ်။
အဲဒီလိုဘဲ ဖေဖော်ဝါရီလ ၃ ရက်နေ့ကလည်း ဂွမြို့နယ်အတွင်းက တိုင်ကျိုးကျေးရွာ မှာ စစ်ပွဲအတွင်းက ကျန်နေခဲ့တဲ့ စစ်ကျန်ဗုံးသီးကို ဆော့ကစားရာကနေ ပေါက်ကွဲပြီးတော့ ကလေးငယ် တစ်ဦး အပါအဝင် ၃ ဦးသေဆုံးခဲ့ရပြီး ၂ ဦးဒဏ်ရာ အပြင်းအထန် ရရှိတာ ရှိခဲ့ပါသေးတယ်။
