သံတွဲမှာ အာရက္ခတပ်တော်က မိုင်းရှင်းလင်းရေးတွေကို ဒီထက်ထိရောက်တဲ့ လုပ်ဆောင်မှုတွေ လုပ်ဖို့လိုအပ်နေ

CNA ၊မြတ်သူ။

သံတွဲမြို့နယ်အတွင်းမှာ အာရက္ခတပ်တော် က စစ်ကောင်စီတပ်တွေ ထောင်ထားခဲ့တဲ့ မိုင်းတွေကို ရှင်းလင်းရေးတွေ လုပ်ဆောင်နေတာတွေ ရှိနေပြီး ဒီထက်ထိရောက်တဲ့ လုပ်ဆောင်မှုတွေ လုပ်ဆောင်ဖို့ လိုအပ်နေသေးတယ်လို့ သံတွဲမြို့ခံတွေက တောင်းဆိုပါတယ်။

စစ်ကောင်စီဟာ သံတွဲမြို့ကို လက်မလွတ်ရရေးအတွက် သူတို့တပ်စွဲနေထိုင်ခဲ့တဲ့ တပ်စခန်းတေွနဲ့ အရပ်သားပြည်သူတွေ သွားလာတဲ့ လမ်းတွေမှာ မြေမြုပ်မိုင်းထောင်တာတွေိကို သံတွဲမြို့သိမ်းတိုက်ပွဲအတွင်းမှာ အပြင်းအထန်လုပ်ဆောင်ခဲ့တာ ရှိပြီး လက်ရှိမှာ အဲဒီစစ်ကောင်စီက ထောင်ထားခဲ့တဲ့ မိုင်းတွေကို အာရက္ခတပ်တော်က ရှင်းလင်းရေးတွေ လုပ်ဆောင်ပေးနေတာလည်း ဖြစ်ပါတယ်။

ဒါပေမယ့် လက်ရှိမှာ အာရက္ခတပ်တော် အနေ နဲ့ တချို့နေရာတွေကိုသာ လုပ်ဆောင်နိုင်သေးတဲ့ အနေအထားမှာရှိနေတဲ့ အတွက် ဒီထက်ထိရောက်တဲ့ ရှင်းလင်းမှုတွေ နဲ့ အရပ်သားပြည် သူတွေ အမြန်ဆုံးနေရပ်ပြန်ဝင်နေထိုင်နိုင်အောင် လုပ်ဆောင်ပေးဖို့ လိုအပ်နေသေးတယ်လို့ သံတွဲ ဒေသခံ တစ်ဦးက ပြောပါတယ်။

“မိုင်းရှင်းလင်းရေးတွေကတော့ စစ်ကောင်စီတပ်စွဲနေထိုင်ခဲ့တဲ့ နေရာတွေကို လုပ်နေတာတွေတော့ ရှိနေပါပြီး နေရာတော်တော်များများကတော့ ကျန်နေသေးတယ်။အခုထက် မြန်မြန်ဆန်ဆန် ရှင်းလင်းပေးနိုင်ရင်တော့ ဒေသခံတွေက မိမိနေရပ်ကို ပြန်ပြီးတော့ မြန်မြန်နေလို့ရတာပေါ့။အခုထက် ပိုထိရောက်မှုရှိရှိ နဲ့ မြန်မြန်ဆန်ဆန်လုပ်ပေးရင်တော့ ပိုအဆင် ပြေတာပေါ့”လို့ သူကပြောပါတယ်။

အာရက္ခတပ်တော်ဟာ သံတွဲမြို့ကို ၂၀၂၄ ခုနှစ်၊ စက်တင်ဘာလ (၅) နေ့မှာအပြီးသတ် သိမ်းပိုက်နိုင်ခဲ့ပြီးဖြစ်ပေမယ့် မိုင်း နဲ့ စစ်ကျန်လက်နက်တွေ ရှင်းလင်းမှု မပြီးသေးတာကြောင့် ဒေသခံ ပြည်သူ အများစုဟာ မိမိနေရပ်အတွင်းကို ပြန်ဝင်ခွင့်မရသေးဘဲ စစ်ရှောင်စခန်းတွေမှာ ဆက်လက်နေထိုင်နေကြရဆဲ ဖြစ်ပါတယ်။