ရခိုင်မှာ စစ်ကျန်လက်နက် နဲ့ မိုင်းတွေကို ရှင်းလင်းနေပေမယ့် မိုင်းကြောင့် ထိခိုက်ဒဏ်ရာရသူတွေ ဆက်တိုက်ရှိနေဆဲ

CNA ၊ လင်းလင်း။

ရခိုင်မှာ အာရက္ခတပ်တော်က အပြီးသတ်သိမ်းပိုက် ရရှိထားပြီးဖြစ်တဲ့ မြို့တွေမှာ မိုင်းရှင်းလင်းရေးတွေကို အင်တိုက်အားတိုက်နဲ့ အာရက္ခတပ်တော်က ရှင်းလင်းလုပ်ဆောင်မှုတွေကို လုပ်ပေးနေပေမယ့် ဒီရက်ပိုင်းအတွင်းမှာ မိုင်းထိမံဒဏ်ရာ ရသူတွေ ဆက်တိုက်ရှိလာနေတာကို တွေ့နေရတယ်လို့ ဒေသခံပြည်သူတွေက ပြောပါတယ်။

အာရက္ခတပ်တော်ဟာ ရခိုင်မှာ ရှိတဲ့ မြို့နယ် ၁၇ ခုထဲက မြို့နယ် ၁၄ ခုကို အပြီးသတ်သိမ်းပိုက်ရရှိထားပြီး အဲဒီမြို့တွေမှာ မိုင်းရှင်းလင်းရေးတွေကို လုပ်ဆောင်ပေးတာတွေ ရှိနေတယ်လို့ သိရပါတယ်။

အဲဒီလို အာရက္ခတပ်တော်က မိုင်းရှင်းလင်းရေးတွေကို လုပ်ဆောင်ပေးနေတာတွေ ရှိနေပေမယ့် ရခိုင်က အာရက္ခတပ်တော် ထိန်းချုပ်ထားတဲ့ မြို့တွေမှာ ဒေသခံ ပြည်သူတွေဟာ မိုင်းအန္တရာယ် နဲ့ နေ့စဉ်ကြုံတွေ့နေရဆဲ ဖြစ်ပါတယ်။

ပြီးခဲ့တဲ့ မတ်လ ၁၁ ရက်နေ့မှာ တောင်ကုတ်မြို့၊ကံပိုင်ရပ်ကွက်က ဦးမောင်ဌေးဝင်း နဲ့ ဦးစိုးနိုင်တို့ နှစ်ဦးဟာ စစ်ကောင်စီတပ်တွေ နေထိုင်ခဲ့တဲ့ အမှတ်(၅) စစ်ဆင်ရီးကွပ်ကဲမှုဌာနချုပ် (စကခ-၅) အနီးဟင်းရှာသွားရာကနေ မိုင်းနင်းမိကာ အသက် ၃၄ နှစ်အရွယ် ဦးမောင်ဌေးဝင် မှာ ခြေထောက်တစ်ဖက်ပြတ်ထွက်သွားခဲ့ရပါတယ်။

အဲဒီလိုပဲ မတ်လ ၁၂ ရက်နေ့မှာလည်း အမ်းမြို့နယ် ပြုတ်ကျွန်းရွာအတွင်းကနေ လုံးရွာဟောင်းကို ထင်းခွေသွားတဲ့ အသက် ၅၅ နှစ်အရွယ်ရှိတဲ့ ဦးညီညီ ဆိုတဲ့ သူဟာလည်း စစ်ပွဲအတွင်းမှာ စစ်ကောင်စီတပ်တွေထောင်ထားခဲ့တဲ့ မိုင်းကို နင်းမိကာ ခြေထောက်တစ်ဖက် ပြတ်ထွက်သွားခဲ့ရပါတယ်။

မတ်လ ၁၃ ရက်နေ့မှာလည်း မောင်တောမြိုနယ်၊ ရွှဇားအနောက်(မူဆလင်)ရွာက ငါးရှာဖို့ ထွက်လာကြတဲ့ မွတ်ဆင်လူမျိုး ၆ ဦးဟာ ရွာရဲ့ အနောက်ဖက် ခြံစည်းရိုးနား အရော်ကမှာ တိုက်ပွဲ အတွင်းက စစ်ကောင်စီတပ်တွေ ထောင်ထားခဲ့တဲ့ မိုင်းကို နင်းမိပြီး အသက် ၁၈ နှစ်အရွယ် မာမောက်ယာဆိမ့် ဆိုသူမှာ ခြေထောက်တစ်ဖက် ပြတ်ထွက်သွားခဲ့ရပါတယ်။

အာရက္ခတပ်တော်က ရခိုင်က သူတို့ သိမ်းပိုက် ရရှိပြီးဖြစ်တဲ့ မြို့တွေမှာ ဒေသခံတွေ ပြန်လည်ဝင်ရောက်နေထိုင်နိုင်ပြီလို့ ခွင့်ပြုပေးလိုက်တဲ့ နောက် ဒေသခံပြည်သူတွေ မိုင်းပေါက်ကွဲမှု အန္တရာယ် နဲ့ ဆက်တိုက်ရင်ဆိုင်ကြုံတွေ့ခဲ့ကြရတာလည်း ဖြစ်ပါတယ်။

အဲဒါ့ကြောင့် နေရပ်အတွင်းမှာ ပြန်လည် ဝင်ရောက်နေထိုင်တဲ့ သူတွေ အနေ နဲ့လည်း စစ်ကောင်စီတပ်ရင်းတွေ စစ်ကောင်စီတပ်တွေ နေထိုင်ခဲ့တဲ့နေရာတွေကို အသွာအလာ ဆင်ခြင်ဖို့ လိုအပ်သလို အာရက္ခတပ်တော် ရဲ့ မိုင်းရှင်းလင်းရေး အဖွဲ့တွေကလည်း ဒေသအတွင်းက အရပ်သားပြည်သူတွေ ရှာဖွေစားသောက်ရေး အဆင်ပြေနိုင်ဖို့ အတွက် မိုင်းရှင်းလင်းရေး လုပ်ငန်းတွေကို အခုထက်ပိုမို အားစိုက်ပြီးတော့ ရှင်းလင်းပေးတာတွေ လုပ်ဆောင်ဖို့ လိုအပ်တယ်လို့ ဒေသခံ လူမှုအဖွဲ့အစည်းတွေက တိုက်တွန်း ပြောဆိုပါတယ်။

“အဓိကတော့ နှစ်ဖက်စလုံးက လုပ်ရမယ့် ကိစ္စဖြစ်တယ်။လူတွေကလည်း နေရပ်ကိုဝင်ခွင့်ပေးလိုက်ပြီဆိုတာနဲ့ ရှာဖွေစားသောက်ကြရတာကို အဲဒီလို ရှာဖွေစားသောက်တဲ့ အခါမှာလည်း စစ်တပ်တွေ နေခဲ့တဲ့ နေရာတွေကို မသွားဖို့လိုတယ်။နောက်တစ်ခုက မိုင်းမသိပညာပေး ဟောပြောမယ်ဆိုပြီးခေါ်လိုက်တယ် ရပ်ကွက်တစ်ခုကို လူ ၁၀ ယောက်တောက်မရောက်ကြဘူး ဆိုတော့ ဒါက ပြည်သူတွေဘက်က လိုအပ်တာပေါ့ ဒီအခြေအနေမှာက ဒီကိစ္စတွေကို သိထားဖို့လိုတယ်။နောက်တစ်ခုကတော့ တပ်တော်ကလည်း ဒီပြည်သူတွေသွားလာမှုများတဲ့ နေရာတွေကို ဦးစားပေး မိုင်းရှင်လင်းပေးတာတွေ လုပ်ပေးစေချင်တယ်လို့”တောင်ကုတ်က လူမှုကူညီရေး လုပ်ငန်းလုပ်ကိုင်သူ တစ်ဦးက အကြံပြုပြောပါတယ်။

မြန်မာနိုင်ငံအတွင်းမှာ ပြီးခဲ့တဲ့ ၂၀၂၄ ခုနှစ် ဇန်နဝါရီလကနေ စက်တင်ဘာလ အထိကောက်ယူထားတဲ့ စာရင်းတွေ အရ မြန်မာနိုင်ငံတွင်မှာ မြေမြှုပ်မိုင်း နဲ့ ပေါက်ကွဲစေတတ်တဲ့ စစ်ကျန် လက်နက်ပစ္စည်းများပေါက်ကွဲမှုကြောင့် အရပ်သား သေဆုံးဒဏ်ရာရသူ ၈၈၉ ဦးအထိရှိခဲ့တယ်လို့ ကုလသမဂ္ဂကလေးများရံပုံငွေအဖွဲ့က ထုတ်ပြန်ပြောဆိုထားပါတယ်။