ပြီးခဲ့တဲ့ မတ်လ ၂၅ ရက်နေ့က မောင်တောမြို့ သင်္ဘောလှကျေးရွာက ဝါးခုတ်သွားတဲ့ အမျိုးသားတစ်ဦးဟာ စစ်ပွဲအတွင်းက စစ်ကောင်စီတပ်တွေ ထောင်ထားခဲ့တဲ့ မိုင်းကို နင်းမိပြီးတော့ ညာြေခထောက်တစ်ဖက်ပြတ်ထွက်ဒဏ်ရာရရှိခဲ့တယ်လို့ ဒေသခံတွေ ကပြောပါတယ်။
ြေခထောက်တစ်ဖက် ပြတ်ထွက်ဒဏ်ရာရရှိသွားတဲ့သူကတော့ သင်္ဘောလှကျေးရွာက အသက် ၅၇ နှစ်အရွယ် ဦးပိုင်ညိုဆိုသူဖြစ်ပြီးတော့ ကျေးရွာအနီးက တောင်မှာ ဝါးခုတ်သွားရာကနေ စစ်ပွဲအတွင်းက စစ်ကောင်စီတပ်တွေ ထောင်ထားခဲ့တဲ့ မိုင်းကို နင်းမိပြီးတော့ အခုလို ခြေထောက်တစ်ဖက် ဆုံးရှုံးခဲ့ရတာဖြစ်တယ်လို့လည်း ပြောပါတယ်။
ရခိုင်မှာ အာရက္ခတပ်တော်က အပြီးသတ်သိမ်းပိုက် ရရှိထားပြီး ဖြစ်တဲ့ မြို့နယ် ၁၄ ခုထဲက နေရပ်ပြန်လည်ဝင်ရောက် နေထိုင်ခွင့် ပြုထားတဲ့ မြို့နယ်တွေမှာ အရပ်သားပြည်သူတွေ အနေ နဲ့ မိုင်းနင်းမိတာ စစ်ကျန်လက်နက်ပေါက်ကွဲတာ အဲဒီလိုပြသနာတွေကို ဒီလပိုင်းအတွင်းမှာ ဆက်တိုက်ဆိုသလို ကြုံတွေ့လာနေရပါတယ်။
ပြီးခဲ့တဲ့ မတ်လ ၂၀ ရက်နေ့ကလည်း အာရက္ခတပ်တော် အပြီးသတ် သိမ်းပိုက် ရရှိပြီး ဖြစ်တဲ့ သံတွဲ နဲ့ တောင်ကုတ်မြို့နယ်တွေမှာ စစ်ပွဲအတွင်းက စစ်ကောင်စီတပ်တွေ ထောင်ထားခဲ့တဲ့ မိုင်းကို နင်းမိပြီးတော့ အရပ်သားပြည်သူ နှစ်ဦးကိုယ်လက်အင်္ဂါ ဆုံးရှုံးမှုတွေ ဖြစ်ခဲ့ရပါတယ်။
အဲဒီလိုပဲ မတ်လ ၁၁ ရက်နေ့ကပင် ၁၉ ရက်နေ့အထိ ကျောက်တော် ၊မောင်တော၊အမ်း၊ မင်းပြား နဲ့ တောင်ကုတ်မြို့တွေမှာ စစ်ကျန်လက်နက် နဲ့ မိုင်းပေါက်ကွဲ မှုကြောင့် ဒေသခံ ပြည်သူ ၉ ဦးဟာ မိုင်းကြောင့် ကိုယ်လက်အင်္ဂါဆုံးရှုံးမှုတွေ နဲ့ ရင်ဆိုင်ခဲ့ရသလို ဒေသခံတစ်ဦးဟာလည်း သေဆုံးတာ ရှိခဲ့ရပါတယ်။
အဲဒီလို အရပ်သားပြည်သူတွေ မိုင်း နဲ့ စစ်ကျန်လက်နက် အန္တရာယ်တွေကို ဆက်တိုက်ဆိုသလို ရင်ဆိုင်လာနေရတဲ့ အတွက် ဒီကိစ္စတွေကို အာရက္ခတပ်တော် အနေ နဲ့ ထိထိရောက်ရောက် မိုင်းရှင်းလင်းရေးတွေ ၊အသိပညာပေးတာတွေ လုပ်ဆောင်ပေးဖို့ လိုအပ်လာနေတယ်လို့ ဒေသခံ လူမှုအဖွဲ့အစည်းတွေက တောင်းဆိုကြပါတယ်။
ကုလသမဂ္ဂကလေးများရံပုံငွေအဖွဲ့က ထုတ်ပြန်ချက်အရ မြန်မာနိုင်ငံအတွင်းမှာ ပြီးခဲ့တဲ့ ၂၀၂၄ ခုနှစ် ဇန်နဝါရီလကနေ စက်တင်ဘာလ အထိကောက်ယူထားတဲ့ စာရင်းတွေ အရမြေမြှုပ်မိုင်း နဲ့ ပေါက်ကွဲစေတတ်တဲ့ စစ်ကျန် လက်နက်ပစ္စည်းများပေါက်ကွဲမှုကြောင့် အရပ်သား သေဆုံးဒဏ်ရာရသူ ၈၈၉ ဦးအထိရှိခဲ့တယ်လို့ပြောဆိုထားပါတယ်။
