တိုက်ပွဲတစ်စုံတရာ ဖြစ်ပွါးခြင်းမရှိသေးတဲ့ မာန်အောင်မြို့နယ် အတွင်းက ရေလုပ်သားတွေကို စစ်ကောင်စီက လပေါင်းများစွာ ပင်လယ်ထွက်ခွင့် ကန့်သတ်တားမြစ်ထားတာကြောင့် ရေလုပ်ငန်းကိုလုပ်ကိုင်သူများ အနေ နဲ့ စားဝတ်နေရေး ခက်ခဲတဲ့ အခြေအနေမှာ ရှိလာနေတယ်လို့ ဒေသခံတွေကပြောပါတယ်။
လက်ရှိ မိုးရာသီဟာ မာန်အောင်က ရေလုပ်သားတွေ အတွက်ငါးဖမ်းလုပ်ငန်းလုပ်ကိုင်ရာမှာ အကောင်း ဆုံးရာသီတစ်ခုဖြစ် ပေမယ့်စစ်ကောင်စီက ပင်လယ်ပြင်ထွက်ခွင့်ကို ပိတ်ပင်ထားတာကြောင့် ငါးဖမ်းလုပ်ငန်း မလုပ်ကိုင်ရတဲ့ အတွက် စားဝတ်နေရေးပါ ခက်ခဲမှုတွေ ရှိလာနေတာ ဖြစ်တယ်လို့ မာန်အောင်မြို့နယ် ဘူးရေ မျက်ကျေးရွာ အတွင်းက ရေလုပ်သား တစ်ဦးကပြောပါတယ်။
“ဒီအချိန်က ကျနော်တို့အတွက် ငါး၊ပုဇွန် ရှာဖွယ်ဖို့ အရမ်းကောင်းတဲ့ အချိန်။အဲဒီအချိန်မှာလည်း ငါးဖမ်းထွက်ခွ င့်မရဘူးဆိုတော့ အလုပ်အကိုင်ကဘာမှ မရှိဘူး။ကုန်ဈေးနူန်းတွေကလည်း အရမ်းတက်တော့ စားဝတ်နေရေး က ပိုခက်ခဲလာတယ်။အလုပ်လုပ်ကိုင်နေရတုန်းကတောင် တစ်နေ့တစ်နေ့ ဆန်၊ဆီ၊ဆား အသုံးစရိတ်တွေ နဲ့ အဆင်မပြေဖြစ်နေတာ မခုလို အလုပ်မလုပ်ရတော့ ကျနော်တို့ ပိုခက်ခဲလာနေရတယ်လို့” သူကပြောပါတယ်။မာန်အောင်မြို့နယ် အတွင်းမှာ နေထိုင်ကြတဲ့ ဒေသခံ လူဦးရေ ၅၀ ရာခိုင်နူန်းလောက်ဟာ ရေလုပ်ငန်းကို အဓိက စီးပွါးရေးတစ်ခုအနေနဲ့ အမှီအခိုပြုနေထိုင်နေကြရတဲ့သူတွေ ဖြစ်ကြတယ်လို့ လည်း ဒေသခံတွေကဆိုပါတယ်။
အဲဒီလို ရေလုပ်ငန်းကို မှီခိုအားထားပြုနေရတဲ့ သူတွေကို ငါးဖမ်းခွင့် လပေါင်းများစွာ ကန့်သတ်ထားတာဟာ မဖြစ်သင့်တဲ့ ကိစ္စတစ်ခု ဖြစ်ပြီး စစ်ကောင်စီအနေ နဲ့ ကမ်းဝေးငါးဖမ်းထွက်ခွင့် မပြုရင်တောင် ကမ်းနီး ငါးဖမ်း ခွင့်ကိုတော့ ပြုသင့်တယ်လို့ ဇရပ်ကုန်းခင်ကျေးရွာ အတွင်းက ရေလုပ်သားတစ်ဦးကတောင်း ဆိုပါတယ်။
“မာန်အောင်မှာ ရှိတဲ့ လူဦးရေ ၅၀ ရာခိုင်နူန်းလောက်က ရေလုပ်ငန်းက မှီခိုနေကြရတာ အခုမာန်အောင်မှာ တိုက်ပွဲလည်း မရှိ ဘာမှလည်း မဖြစ်ပဲ ကုန်ပစ္စည်းတွေ သယ်ယူခွင့်တွေကအစ ပိတ်ထားတော့ ကျနော်တို့ ရေလုပ်သားတွေ အပါအဝင် ဒေသခံ အကုန်လုံးဟာ ဒုက္ခတွေ ခံစားနေကြရတယ်။ ကျနော်တို့ ရေလုပ်သား တွေကိုလည်း ကမ်းဝေးမဖမ်းရရင်တောင် ကမ်းနီးဖမ်းခွင့်ကိုတော့ ခွင့်ပြုသင့်တယ်လို့ ” သူကတောင်း ဆိုပါ တယ် ။
မာန်အောင်မြို့နယ် အတွင်းက ကမ်းနီးကမ်းဝေး ရေလုပ်သားတွေ အားလုံးကို စစ်ကောင်စီဟာ ရခိုင်တေ ကျာ့ပြန်တိုက်ပွဲ ဖြစ်ပွါးချိန်ကတည်းကပင် အကုန်လုံးပိတ်ပင်တားဆီးခဲ့တာ ဖြစ်သလို သွားလာခွင့် ကုန်ပစ္စည်း၊ ဆေးဝါး နဲ့ စားနပ်ရိက္ခာသယ်ယူခွင့်တွေကို ပိတ်ပင်ခြင်းကို ခံထားခဲ့ရတာ ဖြစ်ပါတယ်။
